ଭୁବନେଶ୍ୱର,୦୮/୦୩ (ଚାନ୍ଦିନୀ ମହାପାତ୍ର): ବାମ ହାତ ଅଚଳ । ଡାହାଣ ହାତର କେବଳ ୩ଟି ଆଙ୍ଗୁଠି କାମ କରୁଛି । ଏହି ତିନି ଆଙ୍ଗୁଠିରେ କମ୍ପ୍ୟୁଟର ଚଳାଇ ବିଦ୍ୟାଳୟରେ ପିଲାମାନଙ୍କୁ ଦେଉଛନ୍ତି କମ୍ପ୍ୟୁଟର ଶିକ୍ଷା । ଅଧିକାଂଶ ଲୋକ କମ୍ପ୍ୟୁଟର ଚଳାଇବାକୁ ୨ ହାତର ସାହାଯ୍ୟ ନେଇଥାନ୍ତି । ସେପରି ସ୍ଥଳେ ସେ ୩ ଆଙ୍ଗୁଠିରେ କମ୍ପ୍ୟୁଟର ଚଲାଉଛନ୍ତି । କେବେ ନିଜକୁ ଭିନ୍ନକ୍ଷମ ବୋଲି ମନେକରି ନାହାନ୍ତି । ଏଭଳି ଜଣେ ଦୃଢମନା ମହିଳା ହେଉଛନ୍ତି ଦୀପ୍ତିମୟୀ ପ୍ରଧାନ (୪୬) ।
ତାଙ୍କ ଘର ଜଗତସିଂହପୁର । ଏବେ ରହୁଛନ୍ତି ଡୁମୁଡୁମାରେ । ପରିବାର କହିଲେ କେବଳ ୧୪ ବର୍ଷର ଝିଅଟିଏ । ୨ ବର୍ଷ ତଳେ ହୃଦ୍ଘାତରେ ସ୍ୱାମୀଙ୍କର ବିୟୋଗ ହୋଇଥିଲା । ହେଲେ ଜୀବନର ଝଡ଼ରେ ସେ ଡରିନଯାଇ ନିଜ ମନକୁ ଆହୁରି ଦୃଢ଼ କଲେ । ଅଭ୍ୟାସ ଦ୍ୱାରା ସବୁକିଛି ସମ୍ଭବ ବୋଲି କହି ନିଜକୁ ନିଜେ ଦୃଢ଼ କଲେ । ଆଉ ଏବେ ସେ ଅନ୍ୟମାନଙ୍କ ପାଇଁ ସାଜିଛନ୍ତି ଉଦାହରଣ ।
ପିଲାବେଳୁ ତାଙ୍କର ବାମ ହାତ ଅଚଳ । ଡାହାଣ ହାତର କେବଳ ୩ଟି ଆଙ୍ଗୁଠି କାମ କରୁଛି । ୩ ଆଙ୍ଗୁଠିରେ ସେ ଏକ ବେସରକାରୀ ବିଦ୍ୟାଳୟରେ ପିଲାମାନଙ୍କୁ କମ୍ପ୍ୟୁଟର ଶିକ୍ଷା ଦେଉଛନ୍ତି । କେବଳ ସେତିକି ନୁହେଁ ଅବସର ସମୟରେ ଡାଟା ଏଣ୍ଟ୍ରି କାମ ମଧ୍ୟ କରିଥାନ୍ତି । ସେଥିରୁ ରୋଜଗାର ଅର୍ଥରେ ଝିଅର ପଢ଼ାଠୁ ଆରମ୍ଭ କରି ପରିବାର ଖର୍ଚ୍ଚ ତୁଲାଉଛନ୍ତି । ପ୍ରାୟ ୧୫ ବର୍ଷ ହେବ ସେ ସ୍କୁଲ ପିଲାମାନଙ୍କୁ କମ୍ପ୍ୟୁଟର ଶିକ୍ଷା ଦେଉଛନ୍ତି । ସେ ବାବଦରେ ମାସିକ ୧୫ ହଜାର ଟଙ୍କା ରୋଜଗାର କରିପାରୁଛନ୍ତି ।
ଦୀପ୍ତିମୟୀ କହନ୍ତି, ଲଗାତାର ସେହି ଆଙ୍ଗୁଠିରେ କାମ କଲେ ଦରଜ ହୁଏ । ତେବେ ତାକୁ ଖାତିର ନ କରି ମୁଁ ନିଷ୍ଠାର ସହ କାର୍ଯ୍ୟ କରିବାକୁ ଚେଷ୍ଟା କରେ । ପିଲାବେଳୁ ଘରଲୋକଙ୍କ ପ୍ରଚେଷ୍ଟା ଫଳରେ ମୁଁ ଏମ୍ଏ ପାସ୍ କରିବା ସହ କମ୍ପ୍ୟୁଟର ଶିକ୍ଷା ଗ୍ରହଣ କରିଥିଲି । ସେଥିପାଇଁ ଏବେ ନିଜ ଗୋଡ଼ରେ ଠିଆ ହୋଇପାରିଛି ।
