ନୂଆଦିଲ୍ଲୀ: ହରିୟାଣାରେ ବିଧାନସଭା ନିର୍ବାଚନର ଫଳାଫଳର ଚିତ୍ର ସ୍ପଷ୍ଟ ହୋଇସାରିଛି । ରାଜ୍ୟରେ ପୁଣି ଥରେ ଗେରୁଆ ପତାକା ଫର ଫର ହୋଇ ଉଡିଛି । ବିଜେପି ପୁଣି ଥରେ ଏଠାରେ ବିଜୟର ମୁକୁଟ ପିନ୍ଧିଛି । ବିଜେପିର ଏହି ଫଳାଫଳ କଂଗ୍ରେସର ଆଶାକୁ ଧୂଳିସାତ୍ କରିଦେଇଛି । ଯାହାର ପ୍ରଭାବ ବର୍ତ୍ତମାନ କଂଗ୍ରେସ ନେତାଙ୍କ ବିବୃତ୍ତିରେ ସ୍ପଷ୍ଟ ଭାବେ ଦେଖାଯାଉଛି । ବରିଷ୍ଠ କଂଗ୍ରେସ ନେତା ଜୟରାମ ରମେଶ ହରିୟାଣା ନିର୍ବାଚନର ଫଳାଫଳକୁ ନେଇ ଅନିୟମିତତା ଅଭିଯୋଗ ଆଣିଛନ୍ତି ।
ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ, ହରିୟାଣା ନିର୍ବାଚନରେ ତନ୍ତ୍ର ବ୍ୟବସ୍ଥା ଜିତିଛି, ହେଲେ ଗଣତନ୍ତ୍ର ହାରିଯାଇଛି । ତାଙ୍କର ସୂଚନାରୁ ସ୍ପଷ୍ଟ ଯେ, ସେ ଏବଂ ତାଙ୍କ ଦଳ ଏହି ଫଳାଫଳକୁ ନେଇ ଅସନ୍ତୁଷ୍ଟ । ସେ କହିଛନ୍ତି ଯେ ହରିୟାଣାର ନିର୍ବାଚନ ଫଳାଫଳକୁ ନେଇ କଂଗ୍ରେସ ଅଭିଯୋଗ କରିବ ।
ଜୟରାମ ରମେଶ ଆହୁରି ମଧ୍ୟ କହିଛନ୍ତି ଯେ, ହରିୟାଣା ନିର୍ବାଚନର ଫଳାଫଳ ଗ୍ରହଣ କରିବା ଆମ ପକ୍ଷେ ସମ୍ଭବ ନୁହେଁ, ଆମ ପ୍ରାର୍ଥୀମାନେ ଉଠାଇଥିବା ଗୁରୁତର ପ୍ରସଙ୍ଗ ଉପରେ ନିର୍ବାଚନ ଆୟୋଗଙ୍କୁ ଅବଗତ କରାଯିବ । ହରିୟାଣାର ଫଳାଫଳ ସଂପୂର୍ଣ୍ଣ ଅପ୍ରତ୍ୟାଶିତ ଏବଂ ଆଶ୍ଚର୍ଯ୍ୟଜନକ । ଫଳାଫଳ ବାସ୍ତବତାର ବିପରୀତ । ଏଠାରେ ଇଭିଏମରେ ତ୍ରୁଟି କରାଯାଇଛି ।
ହରିୟାଣା ବିଷୟରେ ଯାହା ଆତ୍ମଚିନ୍ତନ କରିବାକୁ ପଡିବ, ଆମେ ନିଶ୍ଚିତ ଭାବେ ତାହା କରିବୁ । କିନ୍ତୁ ସର୍ବପ୍ରଥମେ ଆମକୁ ବିଭିନ୍ନ ଜିଲ୍ଲାରୁ ଆସିଥିବା ଅଭିଯୋଗକୁ ନିର୍ବାଚନ ଆୟୋଗଙ୍କ ନିକଟକୁ ପଠାଇବାକୁ ପଡିବ । ଆମେ କଣ କରିଛୁ? ଯାହା ଘଟିଲା ତାହା ବିଶ୍ଳେଷଣ କରିବା ପାଇଁ ନିଶ୍ଚିତ ଭାବରେ ଏକ କମିଟି ଗଠନ କରାଯିବ, କିନ୍ତୁ ଏହି ସମୟରେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଆମର ବିଜୟ ଆମ ଠାରୁ ଛଡ଼ାଇ ନିଆଯାଇଛି । ଫଳାଫଳ ଏହାର ପ୍ରକୃତ ପ୍ରତିଫଳନ ହୋଇନାହିଁ ।
