ନୂଆଦିଲ୍ଲୀ: କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ ରବିବାର ଇନ୍ଦିରା ଭବନରେ ହରିୟାଣା ଏବଂ ମଧ୍ୟପ୍ରଦେଶର ନବନିଯୁକ୍ତ ଜିଲ୍ଲା କଂଗ୍ରେସ କମିଟି (ଡିସିସି) ସଭାପତି ମାନଙ୍କ ସହିତ ଏକ ବୈଠକ ସମୟରେ କେନ୍ଦ୍ର ଉପରେ ଜୋରଦାର୍ ଆକ୍ରମଣ କରିଛନ୍ତି। ସେ ଅଭିଯୋଗ କରିଛନ୍ତି ଯେ 'ଭୋଟ ଚୋରି' ପରେ, ବିଜେପି ଏବେ ୩୦ ଦିନ ମଧ୍ୟରେ ବିରୋଧୀ ସରକାରଙ୍କୁ ଭାଙ୍ଗିବା ଲକ୍ଷ୍ୟରେ ନୂତନ ବିଲ୍ ମାଧ୍ୟମରେ 'କ୍ଷମତା ଚୋରି' କରିବାକୁ ଚେଷ୍ଟା କରୁଛି।

ସେ କହିଛନ୍ତି କି, ସରକାର ଆଣିଥିବା ବିଲ୍ ନାଗରିକ ମାନଙ୍କର ସେମାନଙ୍କର ନିର୍ବାଚିତ ସରକାର ଗଠନ କିମ୍ବା ହଟାଇବାର ଅଧିକାର ଛଡ଼ାଇ ନେବ। ଏହି ଅଧିକାର ଇଡି ଏବଂ ସିବିଆଇ ଭଳି ଏଜେନ୍ସି ଗୁଡ଼ିକୁ ଦିଆଯିବ । ଖଡଗେ ଅଭିଯୋଗ କରିଛନ୍ତି କି, 'ଏହା ଗଣତନ୍ତ୍ର ଉପରେ ବୁଲଡୋଜର ଚଲାଇବା ପରି।'

କଂଗ୍ରେସ ଅଧ୍ୟକ୍ଷ ଆହୁରି କହିଛନ୍ତି ଯେ,ରାହୁଲ ଗାନ୍ଧୀ ସମ୍ପ୍ରତି କର୍ଣ୍ଣାଟକର ମହାଦେବପୁରା ନିର୍ବାଚନ ମଣ୍ଡଳୀରେ ଏକ ଯୋଜନାବଦ୍ଧ ଷଡ଼ଯନ୍ତ୍ର ଅଧୀନରେ ଭୋଟ କିପରି 'ଚୋରି' କରାଯାଇଥିଲା ସେ ବିଷୟରେ ଏକ ସମ୍ବୋଧନ ସମୟରେ ବିସ୍ତୃତ ସୂଚନା ଉପସ୍ଥାପନ କରିଥିଲେ। ସେ କହିଥିଲେ, 'କଂଗ୍ରେସ ୬ ମାସର ତଦନ୍ତ ପରେ ଏସବୁ ପାଇଲା।'

ମୌସୁମୀ ଅଧିବେଶନ ଉପରେ ମତ ଦେଇ ସେ କହିଛନ୍ତି ଯେ, ବିରୋଧୀ ଦଳ ସଂସଦ କାର୍ଯ୍ୟ କରୁ ଏବଂ ପ୍ରମୁଖ ସାଧାରଣ ପ୍ରସଙ୍ଗ ଉପରେ ବିତର୍କ କରୁ, କିନ୍ତୁ ବିଜେପି ସରକାର ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (SIR) ଏବଂ ଅଭିଯୋଗ କରାଯାଇଥିବା 'ଭୋଟ ଚୋରି' ଭଳି ପ୍ରସଙ୍ଗରେ ଆଲୋଚନାକୁ ଏଡ଼ାଇ ଚାଲିଥିଲେ। ବିଜେପି ଉପରେ ଅଭିଯୋଗ ଆଣି ଖଡଗେ କହିଛନ୍ତି ଯେ ସରକାର SIR ବ୍ୟବହାର କରି ବିରୋଧୀଙ୍କ ଭୋଟ ଛଡ଼ାଇ ନେବାକୁ ଚାହୁଁଛନ୍ତି।

କଂଗ୍ରେସ ସଭାପତି ବିଜେପି ଉପରେ ବିରୋଧୀ ଭୋଟ ହ୍ରାସ କରିବା ପାଇଁ ଭୋଟର ତାଲିକାର SIR ବ୍ୟବହାର କରୁଥିବା ଅଭିଯୋଗ କରିଥିଲେ ଏବଂ ଭୋଟର ତାଲିକା ଉପରେ କଡ଼ା ନଜର ରଖିବାକୁ ଦଳୀୟ କର୍ମୀଙ୍କୁ ଅନୁରୋଧ କରିଥିଲେ ଯାହା ଦ୍ୱାରା ବିଜେପି ବୁଥ୍ ସ୍ତରରେ କଂଗ୍ରେସ ସମର୍ଥକଙ୍କ ନାମ ହଟାଇବା ପାଇଁ ଷଡ଼ଯନ୍ତ୍ର କରିପାରିବ ନାହିଁ।