ଅହମ୍ମଦାବାଦ,୦୩/୦୮: ଗୁଜରାଟର ଅହମ୍ମଦାବାଦରେ ଶୁକ୍ରବାର କିଛି ସ୍ଥାନରେ ଟ୍ରାଫିକ୍ ପୁଲିସ ପକ୍ଷରୁ ମହିଳାଙ୍କ ସୁରକ୍ଷା ପ୍ରସଙ୍ଗରେ ଲଗାଯାଇଥିବା ପୋଷ୍ଟରକୁ ନେଇ ବିବାଦ ସୃଷ୍ଟି ହୋଇଛି । ସେହି ପୋଷ୍ଟରରେ ଲେଖାଯାଇଥିଲା ଯେ, ଦୁଷ୍କର୍ମ-ଗଣଦୁଷ୍କର୍ମ ଘଟଣାକୁ ଏଡ଼ାଇବାକୁ ମହିଳାମାନେ ବିଳମ୍ବିତ ରାତିରେ ପାର୍ଟିକୁ ଯାଆନ୍ତୁ ନାହିଁ । ବନ୍ଧୁମାନଙ୍କ ସହିତ ଶୂନଶାନ୍ ଅନ୍ଧାରୁଆ ସ୍ଥାନକୁ ଯିବାକୁ ଏଡ଼ାଇ ଚାଲନ୍ତୁ । ଏଭଳି ଆପତ୍ତିଜନକ ସ୍ଲୋଗାନ୍କୁ ବିଭିନ୍ନ ମହଲରୁ ନିନ୍ଦା କରାଯିବା ପରେ ପୋଷ୍ଟରଗୁଡିକୁ ହଟାଯାଇଛି ।
ଅହମ୍ମଦାବାଦର ସୋଲା ଓ ଚଣ୍ଡଲୋଡିଆ ଅଞ୍ଚଳରେ ରାସ୍ତାରେ ଥିବା ଡିଭାଇଡରଗୁଡ଼ିକରେ ‘ସତର୍କତା’ ନାମକ ଏକ ସଂସ୍ଥା ପକ୍ଷରୁ ଗୁଜରାଟୀ ଭାଷାରେ ଏହି ପୋଷ୍ଟର ଲଗାଯାଇଥିଲା । ସେଥିରେ ସଂସ୍ଥାର ନାମ ସହିତ ପ୍ରାୟୋଜକ ଭାବେ ଅହମ୍ମଦାବାଦ ଟ୍ରାଫିକ ପୁଲିସର ନାମ ମଧ୍ୟ ଉଲ୍ଲେଖ ରହିଥିଲା ।
ବିବାଦ ବଢ଼ିବା ପରେ ଟ୍ରାଫିକ ଡିସିପି ସଫିନ୍ ହସନ କହିଛନ୍ତି ଯେ, ଏହି ମାମଲା ସହିତ ଅହମ୍ମଦାବାଦ ସହରର ପୁଲିସର କୌଣସି ସଂପର୍କ ନାହିଁ । ଟ୍ରାଫିକ ନିୟମ ସଂପର୍କରେ ଲୋକଙ୍କୁ ସଚେତନ କରିବା ଭଳି ପୋଷ୍ଟର ଲଗାଇବାକୁ ଟ୍ରାଫିକ୍ ପୁଲିସ ପକ୍ଷରୁ ଏକ ଏନ୍ଜିଓକୁ ଅନୁମତି ଦିଆଯାଇଥିଲା । ସେହି ସଂସ୍ଥାକୁ କେବଳ ସଡ଼କ ସୁରକ୍ଷା ବ୍ୟାନର ଓ ପୋଷ୍ଟର ଲଗାଇବାକୁ ଅନୁମତି ମିଳିଥିଲା । କିନ୍ତୁ ମହିଳାଙ୍କ ସୁରକ୍ଷାକୁ ନେଇ ସଂସ୍ଥା ପକ୍ଷରୁ ଏଭଳି ପୋଷ୍ଟର ଲଗାଇବା ସଂପୂର୍ଣ୍ଣ ଅଗ୍ରହଣୀୟ । ଏହି ପ୍ରସଙ୍ଗରେ ପୁଲିସ କମିଶନର ଜିଏସ୍ ମଲିକ କଡ଼ା ସଂଜ୍ଞାନ ନେଇଛନ୍ତି । ସୋଲା ପୁଲିସ ଷ୍ଟେସନରେ ଏଥିନେଇ ଏକ ଅଭିଯୋଗ ବି କରାଯାଇଛି । କାହାଠାରୁ ଅନୁମତି ପାଇ ଏନ୍ଜିଓ ଅହମ୍ମଦାବାଦର ସଡ଼କରେ ଏହି ପୋଷ୍ଟର ଲଗାଇଥିଲା ସେଥିନେଇ ତଦନ୍ତ କରାଯିବ । ସେପଟେ ଏହି ପ୍ରସଙ୍ଗକୁ ନେଇ ରାଜନୈତିକ ଦଳ ସରକାରଙ୍କୁ ଘେରିଛନ୍ତି ।
ଆମ୍ ଆଦ୍ମୀ ପାର୍ଟି(ଆପ୍)ର ପ୍ରଦେଶ ମୁଖପାତ୍ର କରଣ ବାରୋଟ କଟାକ୍ଷ କରି କହିଛନ୍ତି, ଅହମ୍ମଦାବାଦ ଦେଶର ସବୁଠୁ ସୁରକ୍ଷିତ ସହର ହୋଇଥିବାବେଳେ ଏଭଳି ପୋଷ୍ଟର କାହିଁକି ଲଗାଯାଇଛି। ସରକାର କ’ଣ ଲୋକଙ୍କୁ ସୁରକ୍ଷା ପ୍ରଦାନ କରିପାରିବେ ନାହିଁ । ସେହିପରି ଗୁଜରାଟ କଂଗ୍ରେସର ପ୍ରଦେଶ ଅଧ୍ୟକ୍ଷ ଅମିତ ଚାୱଡ଼ା ମଧ୍ୟ ଏହି ପ୍ରସଙ୍ଗରେ ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି।
