ନୂଆଦିଲ୍ଲୀ: ଦକ୍ଷିଣ ଭାରତରେ କରୋନା ଭାଇରସ୍ ମାମଲା କ୍ରମାଗତ ଭାବରେ ବୃଦ୍ଧି ପାଉଛି । ସେହିଭଳି ରାଜଧାନୀ ଦିଲ୍ଲୀ ସଂଲଗ୍ନ ଗାଜିଆବାଦରେ ମଧ୍ୟ କରୋନା ଭାଇରସ୍ ସଂକ୍ରମଣ ବଢ଼ିଛି । ବିଶ୍ୱ ସ୍ତରରେ କ୍ରମାଗତ ଭାବରେ ବୃଦ୍ଧି ପାଉଥିବା କରୋନା ଭାଇରସ ମାମଲା ଯୋଗୁଁ ସ୍ୱାସ୍ଥ୍ୟ ବିଭାଗର ଚିନ୍ତା ବଢ଼ିଯାଇଛି । ଭାରତରେ ଏହାର ମାମଲାଗୁଡ଼ିକ ମନ୍ଥର ଗତିରେ ବୃଦ୍ଧି ପାଉଥିଲେ ବି ଲୋକଙ୍କ ମନରେ ଆଶଙ୍କା ସୃଷ୍ଟି ହୋଇଛି । ଏପର୍ଯ୍ୟନ୍ତ ଦେଶରେ ମୋଟ୍ କରୋନାର ସକ୍ରିୟ ମାମଲା ୩୫୦ରେ ପହଞ୍ଚିଛି। ଯଦି ଆମେ ଦିଲ୍ଲୀ ବିଷୟରେ କହିବା, ତେବେ ୨୩ଟି ସକ୍ରିୟ ମାମଲା ରିପୋର୍ଟ ହୋଇଛି ।
ଗାଜିଆବାଦରେ ମୋଟ ୪ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଦିଲ୍ଲୀ ଏନସିଆରରେ ବଢ଼ୁଥିବା କରୋନା ମାମଲାକୁ ଦୃଷ୍ଟିରେ ରଖି ସ୍ୱାସ୍ଥ୍ୟ ବିଭାଗ ପ୍ରସ୍ତୁତି ଆରମ୍ଭ କରିଦେଇଛି । ପରିସ୍ଥିତି ଉପରେ କଡ଼ା ନଜର ରଖାଯାଇଛି । ଦିଲ୍ଲୀରେ ସମସ୍ତ ୨୩ଟି ସକ୍ରିୟ ମାମଲାକୁ ଟ୍ରେସ୍ କରିବା ପାଇଁ ପ୍ରୟାସ କରାଯାଉଛି । ସମସ୍ତ ହସ୍ପିଟାଲ ସହିତ ଯୋଗାଯୋଗ କରାଯାଉଛି ଏବଂ ସ୍ୱାସ୍ଥ୍ୟ ସୁବିଧା ଉନ୍ନତ କରିବା ପାଇଁ ନିର୍ଦ୍ଦେଶ ଦିଆଯାଇଛି ।
ଦିଲ୍ଲୀର ସ୍ୱାସ୍ଥ୍ୟମନ୍ତ୍ରୀ ଡକ୍ଟର ପଙ୍କଜ ସିଂହ କହିଛନ୍ତି ଯେ, ବର୍ତ୍ତମାନ ସମୟରେ କରୋନାର ବଢ଼ୁଥିବା ମାମଲା ଚିନ୍ତାର ବିଷୟ ନୁହେଁ । ଲୋକଙ୍କୁ ଭୟଭୀତ ହେବାର କୌଣସି ଆବଶ୍ୟକତା ନାହିଁ । ଏଥିପାଇଁ ୮ ଜଣ ବରିଷ୍ଠ ଅଧିକାରୀଙ୍କୁ ନେଇ ଏକ ଦଳ ଗଠନ କରାଯାଇଛି । ସେମାନେ ବଢ଼ୁଥିବା କରୋନା ମାମଲା ଉପରେ ନଜର ରଖିଛନ୍ତି । ଦିଲ୍ଲୀର ସମସ୍ତ ସରକାରୀ ଏବଂ ଘରୋଇ ହସ୍ପିଟାଲ ସହିତ ଯୋଗାଯୋଗ କରାଯାଉଛି । ଡାକ୍ତରଖାନାଗୁଡ଼ିକରେ ଶଯ୍ୟା ଏବଂ ପର୍ଯ୍ୟାପ୍ତ ଅମ୍ଳଜାନ ମହଜୁଦ ରଖିବାକୁ କୁହାଯାଇଛି ।
