ନୂଆଦିଲ୍ଲୀ,୦୯ /୦୭: ବଲିଉଡର ସୁପରହିଟ୍ ଫିଲ୍ମ 'ଫିର୍ ହେରାଫେରି' ତ ସମସ୍ତେ ଦେଖିଥିବେ । ସେ ଫିଲ୍ମରେ ଯେତେବେଳେ ୩ ସାଙ୍ଗଙ୍କୁ ଟଙ୍କା ଲୋଭ ଆସିଥିଲା । ରାତାରାତି ଧନୀ ହେବା ନିଶା ଚଢିଥିଲା । ରାଜୁ (ଅକ୍ଷୟ କୁମାର) ଶ୍ୟାମ (ସୁନୀଲ ସେଟ୍ଟୀ) ଏବଂ ବାବୁ ଭାଇୟା (ପରେଶ ରାୱଲ) ୩ ଜଣ ଲକ୍ଷ୍ମୀ ଚିଟ୍ ଫଣ୍ଡର ପରିଚାଳିକା ଅନୁରାଧା (ବିପାଶା ବସୁ)ଙ୍କୁ ୧ କୋଟି ଟଙ୍କା ଦେଇଥିଲେ । ଶେଷରେ, ଯେତେବେଳେ ୩ଜଣ ୨୧ ଦିନ ପରେ ୧ କୋଟି ଟଙ୍କା ବଦଳରେ ୨ କୋଟି ଆଣିବାକୁ ଯାଆନ୍ତି, ଜାଣନ୍ତି ଯେ ଅନୁରାଧା, ଯାହାକୁ ସେମାନେ ଟଙ୍କା ଦେଇଥିଲେ, ସେ ସେମାନଙ୍କୁ ଲୁଟି ନେଇଛନ୍ତି । ଏ ତ ଥିଲା ଫିଲ୍ମ କାହାଣୀ । ହେଲେ ବାସ୍ତବରେ କିଛି ଏମିତି ଘଟଣା ସାମ୍ନାକୁ ଆସିଛି । କର୍ଣ୍ଣାଟକର ବେଙ୍ଗାଲୁରୁରେ ବଲିଉଡ୍ ଫିଲ୍ମ ‘ଫିର୍ ହେରାଫେରି’ର କାହାଣୀ ଭଳି ଏକ ମାମଲା ସାମ୍ନାକୁ ଆସିଛି ।
କେରଳର ଏକ ଦମ୍ପତି ଲୋକଙ୍କଠାରୁ କୋଟି କୋଟି ଟଙ୍କା ଠକି ନେଇ ଫେରାର ହୋଇଯାଇଛନ୍ତି । ଅଭିଯୁକ୍ତ ଟୋମି ଓ ସାଇନି ତାଙ୍କ ଫାଇନାନ୍ସ କମ୍ପାନିରେ ବିନିଯୋଗ କଲେ ବହୁ ଅଧିକ ରିଟର୍ଣ୍ଣ ଦେବା ଲୋଭ ଦେଖାଇ ଲୋକଙ୍କଠୁ ଟଙ୍କା ନେଉଥିଲେ ବୋଲି ଜଣାପଡି଼ଛି । ଏ ଦମ୍ପତ୍ତି ଦୀର୍ଘ ୨୫ ବର୍ଷ ହେଲା ବେଙ୍ଗାଲୁରୁରେ ରହି ଆସୁଛନ୍ତି । ‘ଏ ଆଣ୍ଡ ଏ ଚିଟ୍ସ ଆଣ୍ଡ ଫାଇନାନ୍ସ’ ନାମକ ଏକ ଚିଟ୍ ଫଣ୍ଡ ସଂସ୍ଥା ଚଳାଉଥିଲେ । ସେଥିରେ ବିନିଯୋଗ କଲେ ଲୋକଙ୍କୁ ୧୫ରୁ ୨୦ ପ୍ରତିଶତ ରିଟର୍ଣ୍ଣ ଦେବାର ଲୋଭ ଦେଖାଉଥିଲେ । ପ୍ରଥମେ ଲୋକଙ୍କ ବିଶ୍ୱାସ ଜିତି ନିରନ୍ତର ରିଟର୍ଣ୍ଣ ଦେଇ ଆସୁଥିଲେ । ନିକଟରେ ଟଙ୍କା ଦେବା ବନ୍ଦ କରି ଫେରାର ହୋଇଯାଇଥିଲେ ।
ଅଧିକ ପଢନ୍ତୁ...ପୁଲୱାମା ଆକ୍ରମଣ ନେଇ ଚାଞ୍ଚଲ୍ୟକର ଖୁଲାସା : ଇ-କମର୍ସ ୱେବସାଇଟ୍ରୁ କିଣା ହୋଇଥିଲା ବିସ୍ଫୋରକ
ଏହାପରେ ସେମାନଙ୍କ କମ୍ପାନିରେ ଅର୍ଥ ବିନିଯୋଗ କରିଥିବା ପ୍ରାୟ ୩୦୦ ବିନିଯୋଗକାରୀ ପୁଲିସର ଦ୍ୱାରସ୍ଥ ହୋଇଥିଲେ । ରାମମୂର୍ତ୍ତି ନଗର ପୁଲିସ ଷ୍ଟେସନରେ ଏତଲା ଦାଏର ହୋଇଛି । ଦମ୍ପତି ଲୋକଙ୍କୁ ସେମାନଙ୍କ ଜୀବନସାରାର ସଞ୍ଚିତ ଅର୍ଥ, ପିଲାଙ୍କ ଶିକ୍ଷା, ବିବାହ ଓ ମେଡିକାଲ୍ ଖର୍ଚ୍ଚ ବାବଦରେ ରଖିଥିବା ଅର୍ଥକୁ ସେମାନଙ୍କ କମ୍ପାନିରେ ବିନିଯୋଗ କରିବାକୁ ପ୍ରବର୍ତ୍ତାଉଥିଲେ । ଏହା ଏକ ସୁରକ୍ଷିତ ଆର୍ଥିକ ଯୋଜନା ଥିବାରୁ କିଛି ଲୋକ ନିଜ ସମ୍ପତ୍ତି ବିକ୍ରି କରି ବି ସେଥିରେ ବିନିଯୋଗ କରିଥିଲେ । ବର୍ତ୍ତମାନ କମ୍ପାନିର ଅଫିସ୍ ବନ୍ଦ ହୋଇଯାଇଛି । ଦମ୍ପତି ମୋବାଇଲ୍ ଫୋନ୍ ସ୍ୱିଚ୍ ଅଫ୍ କରି ଫେରାର ହୋଇଯାଇଛନ୍ତି । ପୁଲିସ ସେମାନଙ୍କୁ ଧରିବା ଲାଗି ବିଭିନ୍ନ ସ୍ଥାନରେ ତଲାସୀ କରୁଛି । ଦମ୍ପତି ସେମାନଙ୍କ ସମସ୍ତ ସ୍ଥାବର ଓ ଅସ୍ଥାବର ସମ୍ପତ୍ତି ବିକ୍ରି କରି ଫେରାର ହୋଇଥିବା ଆଶଙ୍କା କରାଯାଉଛି ।
