ନୂଆଦିଲ୍ଲୀ,୦୨/୦୬: ପୁଣି କଡ଼ ଲେଉଟାଇଛି କରୋନା । ଦିନକୁ ଦିନ ସଂକ୍ରମଣ ବଢୁଛି । ଭୟ ଘାରୁଛି । ପୁଣି ପେରିବ କି ମାସ୍କ ? ଫେରିବ କି କଟକଣା ? ଦେଶରେ ୪ ହଜାର ମୁହାଁ ହୋଇଛି ସଂକ୍ରମଣ ମାମଲା । ସ୍ୱାସ୍ଥ୍ୟ ବିଭାଗ ରିପୋର୍ଟ ଅନୁସାରେ ବର୍ତ୍ତମାନ ଦେଶରେ ୩୭୫୮ ପଜିଟିଭ କେସ୍ ରହିଛି । ମୃତକଙ୍କ ସଂଖ୍ୟା ୨୮ରେ ପହଞ୍ଚିଛି । ରାଜଧାନୀ ଦିଲ୍ଲୀରେ ମୋଟ ୪୩୬ ମାମଲା ରହିଛି । ଗତ ୨୪ ଘଣ୍ଟାରେ ଦେଶରେ ୨୦୩ ନୂଆ ମାମଲା ସାମ୍ନାକୁ ଆସିଛି ।
କେନ୍ଦ୍ର ସ୍ୱାସ୍ଥ୍ୟମନ୍ତ୍ରଣାଳୟ ପକ୍ଷରୁ ମିଳିଥିବା ରିପୋର୍ଟ ଅନୁସାରେ,କୋଭିଡ଼-୧୯ର ନୂଆ ଭାରିଏଣ୍ଟ ମାମଲା ଧିରେ ଧିରେ ବଢିବାରେ ଲାଗିଛି । ଗତ ୨୪ ଘଣ୍ଟାରେ ୨୦୩ ନୂଆ ମାମଲା ସାମ୍ନାକୁ ଆସିଥିବା ବେଳେ ୪ ଜଣଙ୍କର ମୃତ୍ୟୁ ହୋଇଛି । ଯେଉଁଥିରେ ଜଣେ ଦିଲ୍ଲୀ, ଜଣେ ତାମିଲାନାଡୁ, ଜଣେ ମହାରାଷ୍ଟ୍ର ଓ କେରଳରୁ ରହିଛନ୍ତି । ଦିଲ୍ଲୀର ଜଣେ ୨୨ ବର୍ଷୀୟ ଯୁବତୀଙ୍କର ମୃତ୍ୟୁ ହୋଇଛି । ସେ ଟିବି ଓ ଯକୃତ ସମସ୍ୟାରେ ପୀଡିତ ଥିଲେ । ତାମିଲନାଡୁରେ ୨୫ ବର୍ଷୀୟ ଯୁବକ ଓ ମହାରାଷ୍ଟ୍ରରେ ୪୪ ବର୍ଷୀୟ ଆକ୍ରାନ୍ତଙ୍କର ମୃତ୍ୟୁ ହୋଇଛି । ଦେଶରେ ବର୍ତ୍ତମାନ ୩୯୬୧ ସକ୍ରିୟ ମାମଲା ରହିଛି । ଗତ ୨୪ ଘଣ୍ଟାରେ ୩୭୦ ଆକ୍ରାନ୍ତ ସୁସ୍ଥ ହୋଇଛନ୍ତି । ୧୪୩୫ ମାମଲା ସହ କେରଳ ଆଗରେ ରହିଛି । ମହାରାଷ୍ଟ୍ରରେ ୫୦୬, ଦିଲ୍ଲୀରେ ୪୮୩, ଗୁଜରାଟରେ ୩୩୮ ଓ ପଶ୍ଚିମବଙ୍ଗରେ ୩୩୧ ସଂକ୍ରମଣ ମାମଲା ରହିଛି ।
ଓମିକ୍ରନର ସବଭାରିଏଣ୍ଟ LF.7,XFG,JN.1 ଏବଂ NB.1.8.1 କାରଣରୁ ସଂକ୍ରମଣ ବଢୁଛି । ଯଦିଓ ନୂଆ ଭାରିଏଣ୍ଟ ମାରାତ୍ମକ ନୁହେଁ କିନ୍ତୁ ସ୍ୱାସ୍ଥ୍ୟ ମନ୍ତ୍ରଣାଳୟ ହସ୍ପିଟାଲଗୁଡିକୁ ସଜାଗ ରହିବାକୁ ନିର୍ଦ୍ଦେଶ ଦେଇଛନ୍ତି । ବିଶ୍ୱ ସ୍ୱାସ୍ଥ୍ୟ ସଂଗଠନ ଭାରିଏଣ୍ଟ ମାରାତ୍ମକ ନୁହେଁ ବୋଲି କହିଛି ।
