ଭୁବନେଶ୍ୱର, ୦୨/୦୩: ସ୍ନାତକ ନାମଲେଖା ପାଇଁ ଶନିବାରଠୁ ଆରମ୍ଭ ହୋଇଛି ଏକକ ବିଶ୍ୱବିଦ୍ୟାଳୟ ପ୍ରବେଶିକା ପରୀକ୍ଷା (ସିୟୁଇଟି) ୟୁଜି ଆବେଦନ । ମାର୍ଚ୍ଚ ୨୨ ତାରିଖ ଯାଏ ଆବେଦନ ସୁଯୋଗ ମିଳିବ । ୨୩ ତାରିଖ ମଧ୍ୟରେ ଆବେଦନକାରୀ ନିଜର ଫର୍ମ ଫି ଦାଖଲ କରିପାରିବେ । ମାର୍ଚ୍ଚ ୨୪ରୁ ୨୬ ତାରିଖ ମଧ୍ୟରେ ଫର୍ମ ସଂଶୋଧନର ସୁଯୋଗ ମିଳିବ । ମେ ୮ରୁ ଜୁନ୍ ୧ ତାରିଖ ମଧ୍ୟରେ ପରୀକ୍ଷା ହେବ । ସିୟୁଇଟି ୟୁଜି ନାମଲେଖା ଆବେଦନ ପାଇଁ ସାଧାରଣ ବର୍ଗର ଶିକ୍ଷାର୍ଥୀ ୧୦୦୦ ଟଙ୍କା ଫର୍ମ ଫି ଦେବ । ଏଥିରେ ସର୍ବାଧିକ ୩ଟି ବିଷୟ ପାଇଁ ଆବେଦନ କରିପାରିବ । ଯଦି ଏବାଦ୍ ଅନ୍ୟ ବିଷୟ ପାଇଁ ଫର୍ମ ପୂରଣ କରନ୍ତି ତେବେ ପ୍ରତି ବିଷୟ ପାଇଁ ଆଉ ୪୦୦ ଟଙ୍କା ଅତିରିକ୍ତ ।
ସେହିପରି ଓବିସି ଓ ଇଡବ୍ଲୁଏସ୍ ଆବେଦନକାରୀଙ୍କ ପାଇଁ ୯୦୦ ଟଙ୍କା ରହିଛି । ଅତିରିକ୍ତ ବିଷୟ ପାଇଁ ୩୭୫ ଟଙ୍କା ରହିଛି । ଏସ୍ସି, ଏସ୍ଟି, ଭିନ୍ନକ୍ଷମ ଓ ତୃତୀୟ ଲିଙ୍ଗି ବର୍ଗର ଶିକ୍ଷାର୍ଥୀଙ୍କ ପାଇଁ ୮୦୦ ଟଙ୍କା ରହିଛି । ୩ଟି ବିଷୟ ବାଦ୍ ଅତିରିକ୍ତ ବିଷୟ ପାଇଁ ଆଉ ୩୫୦ ଟଙ୍କା ଦେବାକୁ ପଡ଼ିବ । ୩୭ଟି ବିଷୟରେ ପରୀକ୍ଷା ହେବ । ଏଥିରୁ ୧୩ ଭାଷା ଓ ୨୩ଟି ସ୍ୱତନ୍ତ୍ର ବିଷୟ ଓ ଗୋଟିଏ ଟି ଜେନେରାଲ୍ ଆପ୍ଟିଚ୍ୟୁଟ୍ ଟେଷ୍ଟ ହେବ । ପରୀକ୍ଷାରେ ଠିକ୍ ଉତ୍ତର ଦେଲେ ୫ ମାର୍କ ମିଳିବ । ଭୁଲ୍ ଥିଲେ ୧ ମାର୍କ ମାଇନସ୍ ହେବ । ପ୍ରତ୍ୟେକ ପେପରରେ ୫୦ଟି ପ୍ରଶ୍ନ ଆସିବ । ପ୍ରତ୍ୟେକ ପେପରର ସମୟ ୧ ଘଣ୍ଟା ରହିବ ।
