କଟକ ୩୧/୧୦: ଐତିହାସିକ ବାଲିଯାତ୍ରାରେ ପ୍ରଥମ ଥର ପାଇଁ ତଳ ପଡ଼ିଆରେ ଖୋଲିବ ଦହିବରା ହାଟ । ପ୍ରସିଦ୍ଧ ଦହିବରା ବ୍ୟବସାୟୀ ସ୍ୱର୍ଗତଃ ରଘୁନାଥ ସାସମଲଙ୍କ ଉଦ୍ଦେଶ୍ୟରେ ଖୋଲିବ ଏହି ହାଟ । ଯେଉଁଠି କଟକ ସହରରେ ଲୋକପ୍ରିୟ ୪ ଜଣ ଦହିବରା ବ୍ୟବସାୟୀ ପସରା ମେଲାଇବେ ।
ରାଜ୍ୟ ସମେତ ରାଜ୍ୟ ବାହାରୁ ଆସୁଥିବା ଲୋକମାନେ ମେଳା ବୁଲା ସାଙ୍ଗକୁ କଟକ ଦହିବରାର ଆନନ୍ଦ ଉଠାଇପାରିବେ । ସାଧାରଣତଃ ଉପର ପଡ଼ିଆରେ କଟକ ଦହିବରା ସମେତ ବିଭିନ୍ନ ପ୍ରସିଦ୍ଧ ଖାଦ୍ୟ ଷ୍ଟଲ୍ ଖୋଲିଥାଏ । କିନ୍ତୁ ଦହିବରାକୁ ଜିଆଇ ମାନ୍ୟତା ପ୍ରଦାନ ଦାବିରେ ପ୍ରଶାସନ ପକ୍ଷରୁ ପ୍ରଥମ ଥର ପାଇଁ ନିଆରା ପଦକ୍ଷେପ ନିଆଯାଉଛି । ଏଥିରେ ଓରମାସ୍ ସମ୍ମୁଖରେ ଏକ ଦହିବରା ହାଟ ଖୋଲିବ । ସେଠାରେ କୃଷକ ବଜାରର ବାବୁଲା ଦହିବରା, ବିଡାନାସୀର ରଘୁ ଦହିବରା, କନିକା ଛକର ତ୍ରିନାଥ ଦହିବରା ଓ ଚାନ୍ଦିନୀଚୌକର ସନ୍ତ ଦହିବରା ମିଳିବ । ଯାହା ଖାଦ୍ୟପ୍ରେମୀଙ୍କୁ ବେଶ୍ ମାତ୍ରାରେ ସୁହାଇବ ବୋଲି ଦହିବରା ସଂଘର ସଂପାଦକ କେଦାରନାଥ ସାସମଲ୍ ସୂଚନା ଦେଇଛନ୍ତି ।
