ନୂଆଦିଲ୍ଲୀ: ଅଷ୍ଟ୍ରେଲିଆ ପାଇଁ ବିପଦ ଆଣିଛି ବାତ୍ୟା ‘ଆଲଫ୍ରେଡ୍’ । ବାତ୍ୟା ସ୍ଥଳଭାଗ ସ୍ପର୍ଶ କରିବା ପୂର୍ବରୁ ପୂର୍ବ ଅଷ୍ଟ୍ରେଲିଆର ବିଭିନ୍ନ ସ୍ଥାନରେ ପ୍ରବଳ ପବନ ସହ ବର୍ଷା ଆରମ୍ଭ ହୋଇଯାଇଛି । ବାତ୍ୟାର ଭୟାବହତାକୁ ନଜରରେ ରଖି ସ୍କୁଲ, କଲେଜ୍ ବନ୍ଦ କରିଦିଆଯାଇଛି । ସାର୍ବଜନୀନ ପରିବହନ ବାଧାପ୍ରାପ୍ତ ହୋଇଥିବା ବେଳେ ବିଦ୍ୟୁତ ଯୋଗାଣ ବନ୍ଦ ହୋଇଛି । ସମ୍ଭାବ୍ୟ ବନ୍ୟାକୁ ଦୃଷ୍ଟିରେ ରଖି ଉପକୂଳବର୍ତ୍ତୀ ଅଞ୍ଚଳର ଲୋକେ ସୁରକ୍ଷିତ ସ୍ଥାନକୁ ଚାଲିଯାଇଛନ୍ତି । ପାଣିପାଗ ବିଜ୍ଞାନ ବ୍ୟୁରୋର ପରିଚାଳକ ମ୍ୟାଟ୍ କୋଲୋପିଙ୍କ ଅନୁସାରେ, ଘୂର୍ଣ୍ଣିଝଡ଼ ଆଲଫ୍ରେଡ୍ ଶନିବାର (ସ୍ଥାନୀୟ ସମୟ) ସକାଳେ ସନ୍ସାଇନ୍ କୋଷ୍ଟ ଅଞ୍ଚଳ ଏବଂ ଗୋଲ୍ଡ କୋଷ୍ଟ ସହର ମଧ୍ୟରେ କ୍ୱିନ୍ସଲ୍ୟାଣ୍ଡରରେ ସ୍ଥଳଭାଗ ଛୁଇଁବ ବୋଲି ଆଶା କରାଯାଉଛି ।
ଦୁଇଟି ପର୍ଯ୍ୟଟନ ସହର ମଧ୍ୟରେ ବ୍ରିସବେନ୍ରେ ଆତଙ୍କ ରଚିପାରେ ବାତ୍ୟା ଆଲଫ୍ରେଡ୍ । ବ୍ରିସବେନ୍, ଅଷ୍ଟ୍ରେଲିଆର ତୃତୀୟ ସର୍ବାଧିକ ଜନସଂଖ୍ୟା ବିଶିଷ୍ଟ ସହର । ୨୦୩୨ରେ ଏହି ସହରରେ ଅଲିମ୍ପିକ୍ ଆୟୋଜନ ହେବ । ବାତ୍ୟା ଲ୍ୟାଣ୍ଡଫଲ୍ କରିବା ପୂର୍ବରୁ ଉପକୂଳରେ ଥିବା ଖୋଲା ସ୍ଥାନଗୁଡ଼ିକରେ ୮୦ ରୁ ୯୦ କିଲୋମିଟରବେଗରେ ପବନ ବହିବା ଆରମ୍ଭ ହୋଇଛି। ପବନର ବେଗ ଆହୁରି ବଢ଼ିପାରେ ବୋଲି କୁହାଯାଉଛି । ୧୯୭୪ ମସିହାରେ ଘୂର୍ଣ୍ଣିଝଡ଼ ଜୋ’ ଗୋଲ୍ଡ କୋଷ୍ଟରେ ମାଡ଼ ହୋଇଥିଲା । ବାତ୍ୟା ପ୍ରଭାବରେ ପ୍ରବଳ ବର୍ଷା ଏବଂ ପ୍ରଳୟଙ୍କରୀ ବନ୍ୟା ସାଧାରଣ ଜୀବନ ଯାତ୍ରାକୁ ବ୍ୟାପକ ପ୍ରଭାବିତ କରିଥିଲା । ବାତ୍ୟା ଜୋ’ ପରେ ଏବେ 'ଆଲଫ୍ରେଡ୍' ବ୍ରିସବେନ ନିକଟବର୍ତ୍ତୀ ଉପକୂଳ ଅତିକ୍ରମ କରିବାକୁ ଯାଉଛି । ବାତ୍ୟା ଆଲଫ୍ରେଡ୍ ଅତିକ୍ରମ କରିବାକୁ ଥିବା ଅଞ୍ଚଳରେ ୪୦ ଲକ୍ଷରୁ ଅଧିକ ଲୋକେ ବସବାସ କରୁଛନ୍ତି ।
ବାତ୍ୟାର ମୁକାବିଲା ଲାଗି ନିୟୋଜିତ ଅଧିକାରୀମାନେ କହିଛନ୍ତି ଯେ, ଗୁରୁବାର ନ୍ୟୁ ସାଉଥ୍ ୱେଲ୍ସର ୪,୫୦୦ ଘର ଏବଂ ବ୍ୟବସାୟିକ ପ୍ରତିଷ୍ଠାନ ପ୍ରବଳ ପବନ ଯୋଗୁଁ ପ୍ରଭାବିତ ହୋଇଛି । ବର୍ଷା ଯୋଗୁଁ ସମଗ୍ର ଅଞ୍ଚଳରେ ନଦୀଗୁଡିକର ଜଳସ୍ତର ବୃଦ୍ଧି ପାଇଛି । ବିପଦକୁ ନଜରରେ ରଖି ଉଦ୍ଧାରକାରୀ ଦଳଗୁଡ଼ିକ ନ୍ୟୁ ସାଉଥ୍ ୱେଲ୍ସ ପାର୍ଶ୍ୱର ନିମ୍ନ ଅଞ୍ଚଳରୁ ବାସିନ୍ଦାଙ୍କୁ ସ୍ଥାନାନ୍ତର କରିଛନ୍ତି । ଅସ୍ୱାଭାବିକ ଉଚ୍ଚ ଜୁଆର ଲୋକଙ୍କ ଭୟ ବଢ଼ାଇ ଦେଇଛି । ବୁଧବାର ରାତିରେ ଲୋକପ୍ରିୟ ଗୋଲ୍ଡ କୋଷ୍ଟ ବେଳାଭୂମିରେ ୧୨.୩ ମିଟର (୪୦ ଫୁଟ) ଉଚ୍ଚ ଜୁଆର ରେକର୍ଡ ହୋଇଥିଲା ବୋଲି ଅଧିକାରୀମାନେ କହିଛନ୍ତି ।
