ଭୁବନେଶ୍ୱର,୨୫/୧୦: ବାତ୍ୟା ‘ଦାନା’ ପ୍ରକୋପରୁ ଜୀବନ ରକ୍ଷା ପାଇଁ ଗୁରୁବାର ରାତି ସୁଦ୍ଧା ୬ ଲକ୍ଷ ଲୋକଙ୍କୁ ଆଶ୍ରୟସ୍ଥଳୀକୁ ନିରାପଦ ଭାବେ ସ୍ଥାନାନ୍ତର କରାଯାଇଛି । ୪୪୩୧ ଗର୍ଭବତୀ ମହିଳାଙ୍କୁ ସୁରକ୍ଷିତ ପ୍ରସବ ପାଇଁ ନିକଟସ୍ଥ ସ୍ୱାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରାଯାଇଛି । ରାତି ସୁଦ୍ଧା ୧୬୦୦ ଗର୍ଭବତୀ ଶିଶୁ ଜନ୍ମ ଦେଇଛନ୍ତି ।
ବାତ୍ୟା ସମୟରେ ରାଜ୍ୟରେ ଜନ୍ମନେଲେ ୧୬୦୦ ନବଜାତ ଶିଶୁ। ସମସ୍ତ ନବଜାତକ ଓ ମା ମାନେ ସୁସ୍ଥ ଥିବା ଜଣାପଡିଛି। ଏସଆରସିଙ୍କ କାର୍ଯ୍ୟାଳୟରେ ଗଣମାଧ୍ୟମକୁ ବାତ୍ୟା ମୁକାବିଲା ସଂପର୍କିତ ସୂଚନା ଦେବା ସମୟରେ ଏଭଳି କିଛି ତଥ୍ୟ ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ। ବାତ୍ୟା ପୂର୍ବରୁ ଗର୍ଭବତୀ ଓ ପ୍ରସୂତୀ ମାନଙ୍କୁ ମେଡ଼ିକାଲକୁ ଅଣାଯାଇଥିବା ବେଳେ ରାଜ୍ୟ ସରକାରଙ୍କ ସ୍ବାସ୍ଥ୍ୟ ବିଭାଗ ପକ୍ଷରୁ ବିଭିନ୍ନ ବ୍ୟବସ୍ଥା ଗ୍ରହଣ କରାଯାଇଥିଲା।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଲଗାତାର ସ୍ଥିତି ଉପରେ ନଜର ରଖିଛନ୍ତି । ଘନଘନ ବୈଠକ ଚଳାଇଛନ୍ତି ସକାଳୁ ରାତି ଅଧ ଯାଏ । ମଧ୍ୟାହ୍ନରେ ଲୋକସେବା ଭବନରେ ମୁଖ୍ୟମନ୍ତ୍ରୀ ସ୍ଥିତି ସମୀକ୍ଷା କରିବା ସହ ପ୍ରଭାବିତ ଜିଲ୍ଲାର ଜିଲ୍ଲାପାଳ, ଦାୟିତ୍ୱରେ ଥିବା ମନ୍ତ୍ରୀ, ବରିଷ୍ଠ ଅଧିକାରୀଙ୍କ ସହ କଥା ହୋଇଥିଲେ । ବିଳମ୍ବିତ ରାତିରେ ରାଜସ୍ୱ ମନ୍ତ୍ରୀ ସୁରେଶ ପୂଜାରୀଙ୍କ ସହ ମୁଖ୍ୟମନ୍ତ୍ରୀ ପହଞ୍ଚିଥିଲେ ରେଡକ୍ରସ ଭବନରେ । ସେଠାରେ ପ୍ୟାକିଂ ହେଉଥିବା ରିଲିଫ ସାମଗ୍ରୀର ତଦାରଖ କରିଥିଲେ । ନିଜେ ଚୁଡ଼ା, ବିସ୍କୁଟ ଆଦି ଖାଇ ଏହାର ମାନ ପରୀକ୍ଷା କରିଥିଲେ । ସେତିକି ନୁହେଁ, ରାତି ଅଧରେ ସ୍ୱତନ୍ତ୍ର ରିଲିଫ କମିଶନରଙ୍କ କାର୍ଯ୍ୟାଳୟରେ ପହଞ୍ଚି ସ୍ଥିତି ପରଖିଥିଲେ । ବିଳମ୍ବିତ ରାତିରେ ସାମ୍ବାଦିକ ସମ୍ମିଳନୀ କରିଛନ୍ତି ।
ଓଡ଼ିଶାରେ ବାତ୍ୟା ମୁକାବିଲାର ପ୍ରସ୍ତୁତି ନେଇ ଖୋଦ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ଫୋନରେ ମୁଖ୍ୟମନ୍ତ୍ରୀ ଶ୍ରୀ ମାଝୀଙ୍କ ସହ କଥା ହୋଇଛନ୍ତି । ଓଡ଼ିଶା ସରକାରଙ୍କ କାର୍ଯ୍ୟକୁ ଉଭୟ ପ୍ରଶଂସା କରିବା ସହ କେନ୍ଦ୍ରରୁ ସବୁ ସହଯୋଗ ଦେବାକୁ ପ୍ରତିଶ୍ରୁତି ଦେଇଥିବା ମୁଖ୍ୟମନ୍ତ୍ରୀ ଜଣାଇଛନ୍ତି । ବିଳମ୍ବିତ ରାତିରେ ମୁଖ୍ୟମନ୍ତ୍ରୀ ସୂଚନା ଦେଇଛନ୍ତି, ବାତ୍ୟା ପ୍ରଭାବରେ ବର୍ତ୍ତମାନ ସୁଦ୍ଧା ଜଣେ ବି କେହି ମୃତାହତ ହୋଇନାହାନ୍ତି । ପଶୁ ସମ୍ପଦର ବି କୌଣସି କ୍ଷୟକ୍ଷତି ହୋଇନାହିଁ। କୌଣସି ଘର ନଷ୍ଟ ହୋଇନାହିଁ । ମହାପ୍ରଭୁ ଜଗନ୍ନାଥଙ୍କ ଆଶୀର୍ବାଦ ଆମ ଉପରେ ଏମିତି ରହୁ । ମନ୍ତ୍ରୀ ଓ ଅଫିସରମାନେ ବ୍ଲକ ଓ ଗାଁରେ ଡେରା ପକାଇ ସ୍ଥିତି ପରଖୁଛନ୍ତି । ପ୍ରଭାବିତ ହେଉଥିବା ଜିଲ୍ଲାର ଜିଲ୍ଲାପାଳ, ବିଧାୟକ, ସାଂସଦ ଓ ମନ୍ତ୍ରୀମାନଙ୍କ ସହ ବି କଥା ହୋଇ ସ୍ଥିତି ବାବଦରେ ରିପୋର୍ଟ ନେଇଛି ।
ତଳିଆ ଓ ବିପଦସଙ୍କୁଳ ଅଞ୍ଚଳରୁ ରାତି ସୁଦ୍ଧା ୫ ଲକ୍ଷ ୮୪ ହଜାର ୮୮୮ ଲୋକଙ୍କୁ ସ୍ଥାନାନ୍ତର କରାଯାଇଛି । ଏହି ସଂଖ୍ୟା ୬ ଲକ୍ଷ ପାର୍ କରିଯିବ । ବାଲେଶ୍ୱରରେ ୧ ଲକ୍ଷ ୭୨ ହଜାର ୯୧୬ଜଣ, ମୟୂରଭଞ୍ଜରେ ୧ ଲକ୍ଷ, ଭଦ୍ରକରେ ୭୫ ହଜାର, ଯାଜପୁରରେ ୫୮ ହଜାର, କେନ୍ଦ୍ରାପଡ଼ାରେ ୪୮ ହଜାର ଲୋକଙ୍କୁ ସ୍ଥାନାନ୍ତର କରାଯାଇଛି । ଆଶ୍ରୟସ୍ଥଳୀ ସଂଖ୍ୟା ୮୩୮୨କୁ ବୃଦ୍ଧି ପାଇଥିବାବେଳେ ସେଥିରୁ ୬୦୦୮ଟି କାର୍ଯ୍ୟକ୍ଷମ ରହିଛି । ବାତ୍ୟା ମୁକାବିଲା ପାଇଁ ପ୍ରସ୍ତୁତ ଯୋଜନା ତାହା ଶତ ପ୍ରତିଶତ କାର୍ଯ୍ୟକାରୀ ହୋଇଛି । ରିଲିଫରେ ଚୁଡ଼ା, ଗୁଡ଼, ଚିନି, ବିସ୍କୁଟ, ଶିଶୁ ଖାଦ୍ୟ ଓ ମହମବତୀ ବ୍ୟବସ୍ଥା ହୋଇଛି । ୧୯ ହଜାର ୪୭୬ ପଶୁ ସମ୍ପଦକୁ ଉଚ୍ଚ ସ୍ଥାନରେ ଥିବା ଆଶ୍ରୟସ୍ଥଳୀରେ ରଖାଯାଇଛି । ଗୋଖାଦ୍ୟ ସବୁ ସ୍ଥାନରେ ପହଞ୍ଚିଛି । ସବୁଠି ଗୋଖାଦ୍ୟ ପହଞ୍ଚିଛି ।
ବାତ୍ୟା ସ୍ଥଳଭାଗ ଛୁଇଁଲା ପରେ ସମ୍ଭାବ୍ୟ ଗତିପଥ ସାମାନ୍ୟ ପରିବର୍ତ୍ତନ ହୋଇ କେନ୍ଦୁଝର ଦେଇ ଢେଙ୍କାନାଳ, ଅନୁଗୁଳ ଆଡ଼କୁ ମୁହାଁଇପାରେ । ଏଥିପାଇଁ ଉପରୋକ୍ତ ଜିଲ୍ଲାରେ ଲୋକଙ୍କୁ ନିରାପଦ ସ୍ଥାନକୁ ସ୍ଥାନାନ୍ତର କରିବା ପାଇଁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦିଆଯାଇଛି । ସେ ସବୁ ଅଞ୍ଚଳରେ ପବନ ପହଞ୍ଚିଲାବେଳକୁ ପବନର ବେଗ କମିବା ସହ ବର୍ଷା ବି କମିଥିବ । ତା’ ଛଡ଼ା ହୀରାକୁଦ ଜଳଭଣ୍ଡାରରେ ଜଳସ୍ତର ନିୟନ୍ତ୍ରଣରେ ଅଛି । ତେଣୁ ପ୍ରତିକୂଳ ପରିସ୍ଥିତି ଉପୁଜି ନପାରେ ।
ଏସ୍ଆରସି କାର୍ଯ୍ୟାଳୟର ସୂଚନା ଅନୁସାରେ ୧୧ଟି ଜିଲ୍ଲାର ୬୪ଟି ବ୍ଲକର ୨୧୬୩ଟି ଗାଁ, ୧୩ଟି ସହରାଞ୍ଚଳର ୬୪ଟି ୱାର୍ଡ ବାତ୍ୟାରେ ପ୍ରଭାବିତ ହେଉଛି । ଗୁରୁବାର ସନ୍ଧ୍ୟା ସୁଦ୍ଧା ୮୬୨ କୁଇଣ୍ଟାଲ ଚୁଡ଼ା, ୯୭ କୁଇଣ୍ଟାଲ ଗୁଡ଼ ରିଲିଫ ଆକାରରେ ବଣ୍ଟା ହୋଇଛି । ଲଗାଣ ବର୍ଷା ଯୋଗୁ ୫ଶହରୁ ଅଧିକ ଗୃହ ପାଳିତ ପଶୁ ପ୍ରଭାବିତ ହୋଇଛନ୍ତି । ସମୀକ୍ଷା ବେଳେ ମୁଖ୍ୟମନ୍ତ୍ରୀ ଜିରୋ କାଜୁଆଲିଟି, ଡାକ୍ତରଖାନାରେ ନିରବଚ୍ଛିନ୍ନ ବିଦ୍ୟୁତ୍ ସେବା, ପ୍ରଭାବିତ ଅଞ୍ଚଳରେ ପର୍ଯ୍ୟାପ୍ତ ପରିମାଣର କିରୋସିନ, ପେଟ୍ରୋଲ, ଡିଜେଲ ମହଜୁଦ ରଖିବା ନେଇ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଥିଲେ ।
ବାତ୍ୟା କ୍ଷତିଗ୍ରସ୍ତ ବିଦ୍ୟୁତ୍ ଖୁଣ୍ଟ ଓ ଟ୍ରାନ୍ସଫର୍ମର ତୁରନ୍ତ ମରାମତି କରି ବିଦ୍ୟୁତ ଯୋଗାଣ ବ୍ୟବସ୍ଥା ପୁନଃକ୍ଷମ କରିବା ପାଇଁ ଅତିରିକ୍ତ ଟିମ୍ ମହଜୁଦ ରଖିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ । ବର୍ତ୍ତମାନ ସୁଦ୍ଧା ୨୧୩ଟି ଡାକ୍ତରୀ ଦଳ, ୧୨୦ଟି ପଶୁ ଚିକିତ୍ସକ ଦଳ ନିୟୋଜିତ ହୋଇଛନ୍ତି । ସନ୍ଧ୍ୟା ସୁଦ୍ଧା ୩୮୫ଟି ତ୍ୱରିତ କାର୍ଯ୍ୟ ନିର୍ବାହୀକୁ ନିୟୋଜିତ କରାଯାଇଛି । ସେଥିମଧ୍ୟରୁ ୧୯ଟି ଏନ୍ଡିଆର୍ଏଫ୍ ଟିମ୍, ୫୧ଟି ଓଡ୍ରାଫ ଟିମ୍, ୯୫ଟି ଓଏଫ୍ଡିସି ଓ ୨୨୦ଟି ଅଗ୍ନିଶମ ବାହିନୀକୁ ପ୍ରଭାବିତ ଅଞ୍ଚଳରେ ମୁତୟନ କରାଯାଇଛି । ଗ୍ରାମ୍ୟ ଉନ୍ନୟନ ବିଭାଗ ତରଫରୁ ରାସ୍ତା ସଫା ଓ ସଂଯୋଗୀକରଣ ପାଇଁ ୨୫୬ଟି ଟିମ୍ ନିୟୋଜିତ ହୋଇଛନ୍ତି । ସେହିଭଳି ବାତ୍ୟା ପରବର୍ତ୍ତୀ ସମ୍ଭାବ୍ୟ ବନ୍ୟା ପରିସ୍ଥିତିକୁ ତୀକ୍ଷଣ ନଜର ରଖିଛନ୍ତି ସରକାର । ଏ ସମ୍ପର୍କରେ ବିଭାଗୀୟ ସଚିବ ଅନୁ ଗର୍ଗ ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଛନ୍ତି । ଲଗାଣ ବର୍ଷା ଯୋଗୁଁ ଜଳ ଭଣ୍ଡାରଗୁଡିକର ସ୍ଥିତି ସମ୍ପର୍କରେ ଜଳ ସମ୍ପଦ ବିଭାଗ ନଜର ରଖିଛି । ଜଳଭଣ୍ଡାରଗୁଡ଼ିକର ଜଳସ୍ତର କମ ଅଛି । ତେବେ ସ୍ଥିତିକୁ ଦେଖି ଜଳ ଭଣ୍ଡାର ପରିଚାଳନା କରିବା ପାଇଁ ନିର୍ଦ୍ଦେଶ ଜାରି ହୋଇଛି ।
