କଟକ,୦୩/୧୧: ବାତ୍ୟା ‘ଦାନା’ ପାଇଁ ତଳିଆ ଅଞ୍ଚଳରେ ରହୁଥିବା ପ୍ରାୟ ୩୦ ହଜାର ଲୋକଙ୍କୁ ସ୍ଥାନାନ୍ତର କରାଯିବ ବୋଲି ପ୍ରଶାସନ ପକ୍ଷରୁ ପ୍ରଥମେ ସୂଚନା ଦିଆଯାଇଥିଲା । ପରେ ଏହି ସଂଖ୍ୟା ୪୬ ହଜାର ହୋଇଗଲା । କିନ୍ତୁ ବାତ୍ୟା କ୍ଷୟକ୍ଷତି ସଂକ୍ରାନ୍ତରେ ରାଜ୍ୟ ସରକାରଙ୍କୁ ଯେଉଁ ରିପୋର୍ଟ ଦିଆଯାଇଛି ସେଥିରେ ୬୦ ହଜାର ଲୋକଙ୍କୁ ସ୍ଥାନାନ୍ତର ଓ ଥଇଥାନ କରାଯାଇଥିବା ଦର୍ଶାଯାଇ ଖର୍ଚ୍ଚ ଦାବି କରାଯାଇଛି । ପୁଣି ଅନ୍ୟ ଏକ ରିପୋର୍ଟରେ ୪୬ ହଜାର ଲୋକଙ୍କୁ ସ୍ଥାନାନ୍ତର ନେଇ ସୂଚନା ପ୍ରଦାନ କରାଯାଇଛି । ଉଭୟ ରିପୋର୍ଟରେ ଖର୍ଚ୍ଚ କିନ୍ତୁ ସମାନ । ପ୍ରଶାସନର ଏଭଳି ବିଭ୍ରାନ୍ତିକର ତଥ୍ୟ ଲୋକଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି । ଏଭଳି ବିଭ୍ରାନ୍ତିକର ତଥ୍ୟ ପ୍ରଶାସନ ପକ୍ଷରୁ ଜାଣିଶୁଣି ଦିଆଯାଇଛି ନା’ ଏହା ପଛରେ ଆଉ କିଛି କାରଣ ରହିଛି ସେ ନେଇ ସନ୍ଦେହ ଦେଖା ଦେଇଛି ।
ବାତ୍ୟା ଦାନା ଅକ୍ଟୋବର ୨୪ ରାତିରୁ ଆରମ୍ଭ ହୋଇ ୨୫ ତାରିଖ ପର୍ଯ୍ୟନ୍ତ ସକ୍ରିୟ ରହିବ ବୋଲି ପାଣିପାଗ ବିଭାଗ ପକ୍ଷରୁ ସତର୍କ କରି ଦିଆଯାଇଥିଲା । ଏହା ପୂର୍ବରୁ ୨୨ ଏବଂ ୨୩ ତାରିଖ କଟକ ଜିଲ୍ଲା ପାଇଁ ରେଡ୍ ୱାର୍ଣ୍ଣିଂ ଜାରି କରାଯାଇଥିଲା । ଅର୍ଥାତ କଟକ ଜିଲ୍ଲାକୁ ପ୍ରବଳରୁ ଅତିପ୍ରବଳ ବର୍ଷା ହେବ ବୋଲି ପାଣିପାଗ ବିଭାଗ ଆଶଙ୍କା କରିଥିଲା । ସ୍ଥିତି ମୁକାବିଲା ପାଇଁ ପ୍ରଶାସନ ପକ୍ଷରୁ ପ୍ରସ୍ତୁତି ମଧ୍ୟ ଜୋର୍ଦାର୍ କରାଯାଇଥିଲା । ବାତ୍ୟାର ପ୍ରାୟ ଦୁଇଦିନ ଆଗରୁ ପ୍ରଶାସନ ପକ୍ଷରୁ ବିଭିନ୍ନ ତଳିଆ ଅଞ୍ଚଳରୁ ଲୋକମାନଙ୍କୁ ବାତ୍ୟା ଆଶ୍ରୟସ୍ଥଳୀ, ସ୍କୁଲ୍ ଆଦିକୁ ସ୍ଥାନାନ୍ତର ଉଦ୍ୟମ ଆରମ୍ଭ ହୋଇଥିଲା । ଏହି ଉଦ୍ଧାର କାର୍ଯ୍ୟ ୨୪ ତାରିଖ ରାତିଯାଏ ଚାଲିଥିଲା । ସ୍ଥାନାନ୍ତର ହୋଇଥିବା ଲୋକମାନଙ୍କୁ ମାଗଣାରେ ଖାଦ୍ୟ ଯୋଗାଇ ଦିଆଯାଇଥିଲା । ଏଥିପାଇଁ ୭୪୮ଟି ରିଲିଫ୍ କ୍ୟାମ୍ପ ଖୋଲାଯାଇଥିଲା । ଯେଉଁଥିରେ ୬୦ ହଜାର ୮୯୫ ଜଣ ଲୋକଙ୍କୁ ଉଦ୍ଧାର କରାଯାଇ ମାଗଣାରେ ଖାଦ୍ୟ ଯୋଗାଇ ଦିଆଯାଇଥିବା ନେଇ ବାତ୍ୟାର ଦିନକ ପରେ ଅର୍ଥାତ ୨୬ ତାରିଖ ଦିନ ପ୍ରଶାସନ ପକ୍ଷରୁ ରିପୋର୍ଟରେ ଦର୍ଶାଯାଇଥିଲା । ଏଥିପାଇଁ ପ୍ରଶାସନ ପକ୍ଷରୁ ୧ କୋଟି ୬ ଲକ୍ଷ ୫ ହଜାର ୧୯୫ ଟଙ୍କା ଖର୍ଚ୍ଚ ହୋଇଥିବା ନେଇ ଗଣମାଧ୍ୟମକୁ ସୂଚନା ମଧ୍ୟ ଦିଆଯାଇଥିଲା । କିନ୍ତୁ ଏବେ ପ୍ରଶାସନ ପକ୍ଷରୁ ଦିଆଯାଉଥିବା ଆଉ ଏକ ରିପୋର୍ଟରେ ଖାଲୁଆ ଅଞ୍ଚଳରୁ ୪୬ ହଜାର ୩୦୮ ଜଣଙ୍କୁ ଉଦ୍ଧାର କରାଯାଇ ବିଭିନ୍ନ ବାତ୍ୟା ଆଶ୍ରୟସ୍ଥଳୀରେ ଥଇଥାନ କରାଯାଇଥିବା କୁହାଯାଇଛି ।
ଏହି ରିପୋର୍ଟକୁ ରାଜ୍ୟ ସରକାରଙ୍କୁ ମଧ୍ୟ ପ୍ରଦାନ କରାଯାଇଥିବା ପ୍ରଶାସନ କହିଛି । ଯେଉଁଥିରେ ନିଆଳିରେ ୪ ହଜାର ୨୭୪, ନିଶ୍ଚିନ୍ତକୋଇଲିରେ ୩ ହଜାର ୬୬୩, ମାହାଙ୍ଗାରେ ୩ ହଜାର ୫୬୩, ଆଠଗଡ଼ରେ ୩ ହଜାର ୪୬୮ ଲୋକଙ୍କୁ ଉଦ୍ଧାର କରାଯାଇଛି । ଅନ୍ୟାନ୍ୟ ବ୍ଲକ୍ଗୁଡ଼ିକରେ ଅଢ଼େଇ ହଜାରରୁ ହଜାରେ ପର୍ଯ୍ୟନ୍ତ ଲୋକଙ୍କୁ ଉଦ୍ଧାର କରାଯାଇଥିବା ପ୍ରଶାସନ ଦର୍ଶାଇଛି। ୧ କୋଟି ୬ ଲକ୍ଷ ଟଙ୍କାରୁ କେବଳ ଖାଦ୍ୟରେ ୭୪ ଲକ୍ଷ ୪୯ ହଜାର ୨ ଶହ ଟଙ୍କା ଖର୍ଚ୍ଚ ହୋଇଥିବା ଦର୍ଶାଯାଇଛି । ଅନ୍ୟାନ୍ୟ ଖର୍ଚ୍ଚ ନାଁରେ ୩୩ ଲକ୍ଷ ୮୨ ହଜାର ୧୩୧ ଟଙ୍କା ଖର୍ଚ୍ଚ ହୋଇଥିବା ଦର୍ଶାଯାଇଛି । ପ୍ରଶାସନର ଏଭଳି ଦୁଇ ପ୍ରକାର ତଥ୍ୟକୁ ନେଇ ପ୍ରଶ୍ନ ଉଠୁଛି। ଏ ସଂକ୍ରାନ୍ତରେ ଜିଲ୍ଲା ଜରୁରିକାଳୀନ ଅଧିକାରୀ ଅମ୍ଳାନ ଅପରାଜିତା ମିଶ୍ର କହିଛନ୍ତି ଯେ, ୬୦ ହଜାର ଲୋକଙ୍କୁ ଉଦ୍ଧାର କରାଯାଇଥିବା ତଥ୍ୟ ସମ୍ପର୍କରେ ସେ କିଛି ଜାଣନ୍ତି ନାହିଁ । ଏଭଳି କିଛି ତଥ୍ୟ ତାଙ୍କ ପାଖରେ ନାହିଁ । ଜିଲ୍ଲାରେ ମୋଟ୍ ୪୬ ହଜାର ୩୦୮ ଜଣଙ୍କୁ ଆଶ୍ରୟସ୍ଥଳୀରେ ରଖାଯାଇଥିବା ନେଇ ରାଜ୍ୟ ସରକାରଙ୍କୁ ତଥ୍ୟ ପ୍ରଦାନ କରାଯାଇଛି । ସେହି ହିସାବରେ ଖର୍ଚ୍ଚ ହିସାବ ମଧ୍ୟ ଦାଖଲ କରାଯାଇଛି ବୋଲି ସେ କହିଛନ୍ତି ।
