ପୁରୀ,୨୧/୬ : ଶୁକ୍ରବାର ଅଣସର ପିଣ୍ଡିରେ ଠାକୁରଙ୍କୁ ଚକା ଉପରେ ସ୍ଥାପନ କରାଯାଇଛି। ଅନବସର ସେବାପୂଜାର ଦଶମୀ ତିଥିରେ ବଡ଼ଦେଉଳରେ ଦାରୁବ୍ରହ୍ମ ଜାଗ୍ରତ ଅବସ୍ଥାକୁ ଫେରିଛନ୍ତି । ତିନିଟି ଚକା ଆସନକୁ ଦାରୁବିଗ୍ରହ ବିଜେ ହୋଇଛନ୍ତି । ଦଇତାପତି ଗୋଷ୍ଠୀଗତ ଭାବେ ଏହି ସେବା କରିଛନ୍ତି । ଗୁପ୍ତସେବା ଅବସରରେ ଶ୍ରୀବିଗ୍ରହଙ୍କ ଚକା ବିଜେ ନୀତି ଅନୁଷ୍ଠିତ ହୋଇଛି । ଏଥିସହ ରାଜବୈଦଙ୍କ ଦ୍ୱାରା ପ୍ରସ୍ତୁତ ଦଶମୂଳ ମହୌଷଧି ଶ୍ରୀମନ୍ଦିରରେ ପହଞ୍ଚିଛି। ମହୌଷଧି ସେବନ ପରେ ଠାକୁରେ ସମ୍ପୂର୍ଣ୍ଣ ସୁସ୍ଥ ହେବେ ।
ଗୁପ୍ତ ସେବା ପରମ୍ପରା ଅନୁସାରେ ରାଜବୈଦ ୧୦ ପ୍ରକାର ଚେରମୂଳି ସଂଗ୍ରହ କରି ଏହି ମହୌଷଧୀ ପ୍ରସ୍ତୁତ କରିଥିଲେ । ଦିଅଁମାନେ ଜ୍ୱରରେ ପଡ଼ିଲା ପରଠାରୁ ମହୌଷଧି ପ୍ରସ୍ତୁତି ଆରମ୍ଭ ହେଲା । ଚେରମୂଳିକୁ ଧୋଇ ଶୁଖାଇ ଗୁଣ୍ଡକରିବା ପରେ ଦୁଗ୍ଧ, ଖୁଆ, ଘିଅ, ସର, ମସଲା, ମହୁ, ଓ କର୍ପୂର ଆଦି ମିଶାଇ ପାଗ ହୁଏ । ପରେ ଏହାକୁ ଗୁଳାକରି ବଢ଼ାରେ ବାଢ଼ି ଶ୍ରୀମନ୍ଦିର ପହଞ୍ଚାଯାଇଥିଲା । ପୂର୍ବ ରାତିରୁ ଶ୍ରୀମନ୍ଦିରରେ ଠାକୁରଙ୍କ ପହୁଡ଼ ନୀତି ସମ୍ପନ୍ନ ହୋଇ ନଥିଲା । ଚକାବିଜେ ନୀତି ଅବସରରେ ଶ୍ରୀମନ୍ଦିରରେ ସ୍ୱତନ୍ତ୍ର ନୀତି ଅନୁଷ୍ଠିତ ହୋଇଥିଲା । ଠାକୁରମାନଙ୍କ ମଙ୍ଗଳାଳତି ବଢିବା ପରେ ଅବକାଶ, ଗୋପାଳବଲ୍ଲଭ, ସକାଳ ଧୂପ, ଭୋଗମଣ୍ଡପ ନୀତି ହୋଇ ମଧ୍ୟାହ୍ନ ଧୂପ, ଦ୍ୱିତୀୟ ଭୋଗମଣ୍ଡପ ଓ ଦକ୍ଷିଣୀ ଘର ଭୋଗ ଶେଷ ହୋଇଥିଲା । ଏହାପରେ ଜୟବିଜୟ ଦ୍ୱାର ବନ୍ଦ କରାଯାଇ ବେହେରଣ ଦ୍ୱାର ଫିଟିଥିଲା । ୩ଟି ଚକଡାକୁ ଆଣି ଅଣସର ପିଣ୍ଡିରେ ସ୍ଥାପନ କରାଗଲା । ଦଇତାପତି ସେବକମାନେ ଗୋଷ୍ଠୀଗତ ସେବା ଜରିଆରେ ଠାକୁରମାନଙ୍କୁ ଚକା ଉପରେ ବିଜେ କରାଇଥିଲେ । ପରେ ଚକଟା ଓ ପଣା ଭୋଗ ଅର୍ପଣ କରାଯାଇଥିଲା ।
