ପାରାଦ୍ଵୀପ, ୨୭/୧୦: ପୂର୍ବ ଶତ୍ରୁତାକୁ ନେଇ ଯୁବକକୁ ମରଣାନ୍ତକ ଆକ୍ରମଣ । ଡ୍ୟୁଟି ସାରି ବଜାରରେ ଠିଆ ହୋଇଥିବା ବେଳେ ଯୁବକଙ୍କୁ ଲୁହା ରଡ଼ରେ ଆକ୍ରମଣ କଲେ ଦୁଇ ଜଣ ଯୁବକ । ଗୁରୁତର ଯୁବକ ଜଣକ ରାକେଶ ପରିଡା ଏବଂ ଆକ୍ରମଣକାରୀ ଗଣେଶ ଦାସ, ମାନସ ଦାସ ବୋଲି ଜଣାପଡ଼ିଛି । ଜଗତସିଂହପୁର ଜିଲ୍ଲା ପାରାଦ୍ୱୀପ ଗଡ଼ ବଜାରରେ ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଆକ୍ରମଣକାରୀଙ୍କ ସହ ରାକେଶ ପରିଡାଙ୍କର ପୂର୍ବରୁ କୌଣସି କାରଣରୁ ଶତ୍ରୁତା ଥିଲା । ଏହାର ପ୍ରତିଶୋଧ ନେବାକୁ ଯାଇ ଏଭଳି ମରଣାନ୍ତକ ଆକ୍ରମଣ କରିଥିଲେ ଦୁଇ ଜଣ ଯୁବକ । ରାକେଶ ଶନିବାର ରାତିରେ ଡ୍ୟୁଟି ସାରି ପାରାଦ୍ଵୀପ ଗଡ଼ ବଜାରରେ ଠିଆ ହୋଇଥିଲେ । ଏହି ସମୟରେ ଗଣେଶ ଦାସ ଓ ମାନସ ଦାସ ଏକ ବାଇକ୍ରେ ଆସି ଏକ ଲୁହା ରଡ଼ରେ ରାକେଶଙ୍କ ମୁଣ୍ଡକୁ ଆକ୍ରମଣ କରିଥିଲେ । ଫଳରେ ରାକେଶଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା । ଆକ୍ରମଣ ସମୟରେ ସେହିଠାରେ ସେ ପଡ଼ିଯିବାରୁ ରାକେଶଙ୍କ ପଛ ମୁଣ୍ଡ ମଧ୍ୟ ମାଡ ହୋଇଥିଲା । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇ ଯୁବକଙ୍କୁ ଗୁରୁତର ଅବସ୍ଥାରେ ନିକଟସ୍ଥ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଇଥିଲେ । ଏନେଇ ଯୁବକଙ୍କ ମା ଲକ୍ ଥାନାରେ ଏକ ଲିଖିତ ଅଭିଯୋଗ କରିଥିଲେ । ଏହା ସହ ଉଭୟ ଯୁବକ ତାଙ୍କ ବଡ଼ ପୁଅକୁ ମଧ୍ୟ ମାରିବାକୁ ଧମକ ଦେଇଥିବା ଏତଲାରେ ଦର୍ଶାଇ ଦୃଢ କାର୍ଯ୍ୟାନୁଷ୍ଠାନ ନେବା ପାଇଁ ଦାବି କରିଛନ୍ତି ରାକେଶଙ୍କ ମା । ଉକ୍ତ ଅଭିଯୋଗ ଆଧାରରେ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି ଲକ୍ ଥାନା ପୋଲିସ ।
