ନୂଆଦିଲ୍ଲୀ,୨୯/୦୭: ଭିଡ଼ ଭିତରକୁ ବନ୍ଧୁକ କରି ମାଡିଗଲେ ସନ୍ଦିଗ୍ଧ ଯୁବକ । କେହି କିଛି ବୁଝିବା ଆଗରୁ ବନ୍ଧୁକରୁ ଆଖିବୁଜା ଗୁଳାମାଡ଼ କଲେ । ଭୟରେ ଜୀବନ ବଞ୍ଚାଇବାକୁ ଦୌଡିବାକୁ ଲାଗିଲେ ଲୋକ । ଆର୍ତ୍ତ ଚିତ୍କାରରେ କମ୍ପୁଥିଲା ସ୍ଥାନୀୟ ଅଞ୍ଚଳ । ଆମେରିକା ନ୍ୟୁୟର୍କ ସିଟିର ମିଡଟାଉନ୍ ମାନହାଟନ୍ରେ ସୋମବାର ସଂଧ୍ୟାରେ ଆଖିବୁଜା ଗୁଳିମାଡ଼ ହୋଇଛି । ଏଥିରେ ୫ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ଅନେକ ଆହତ ହୋଇଛନ୍ତି । ଫାୟାରିଂରେ ଜଣେ ପୁଲିସ ଅଫିସର୍ଙ୍କର ମୃତ୍ୟୁ ହୋଇଥିବା ଖବର ମିଳିଛି । ସନ୍ଦିଗ୍ଧ ବନ୍ଧୁକଧାରୀ ଯୁବକର ବି ମୃତ୍ୟୁ ହୋଇଛି ।
ରିପୋର୍ଟ ଅନୁଯାୟୀ, ୟୁଏସ୍ର ବଡ଼ ଅଫିସ୍ ବିଲ୍ଡିଂରେ ପସି ସନ୍ଦିଗ୍ଧ ଯୁବକ ଫାୟାରିଂ କରିଥିଲା । ଏହାପରେ ସେ ନିଜେ ଆତ୍ମହତ୍ୟା କରିଥିବା କୁହାଯାଉଛି । ବନ୍ଧୁକଧାରୀ ଲାସ୍ ଭେଗାସର ୨୭ ବର୍ଷୀୟ ଶେନ୍ ତମୁରା ବୋଲି ଚିହ୍ନଟ ହୋଇଛି । ଜଣେ ପୋଲିସ ଅଧିକାରୀ, ବନ୍ଧୁକଧାରୀ ସମେତ ୫ ଜଣଙ୍କର ମୃତ୍ୟୁ ହୋଇଛି । ଅନେକ ସାଧାରଣ ନାଗରିକ ଆହତ ହୋଇଛନ୍ତି । ନ୍ୟୁୟର୍କ ସିଟି ମେୟର ଏରିକ୍ ଆଡାମ୍ସ ଏକ୍ସରେ କହିଛନ୍ତି ଯେ, ଜଣେ ପୁଲିସ ଅଧିକାରୀଙ୍କୁ ହତ୍ୟା କରାଯାଇଛି । ତାଙ୍କ ପରିବାରକୁ ସମବେଦନା ଜଣାଉଛି । ହେଲେ ପୁଲିସ ବିଭାଗ ମୁଖପାତ୍ର କହିଛନ୍ତି ତାଙ୍କ ପୁଲିସ୍ ଅଧିକାରୀଙ୍କ ମୃତ୍ୟୁ ହୋଇଛି କି ନାହିଁ ସେମାନେ ନିଶ୍ଚିତ କରିପାରିବେ ନାହିଁ ।
ଶେନ୍ ତମୁରା କିଏ?
ତମୁରା ଲାସ୍ ଭେଗାସର ବାସିନ୍ଦା ବୋଲି ଜଣାପଡିଛି । ତାଙ୍କ ବୟସ ୨୭ ବର୍ଷ । ସେ ଜଣେ ପୂର୍ବତନ ଫୁଟବଲ୍ ଖେଳାଳି ଏବଂ ତାଙ୍କ ପାଖରେ ନେଭାଡାରୁ ଏକ ଗୁପ୍ତ ବହନ ପରମିଟ୍ ଥିବା ଜଣାପଡ଼ିଛି । ଯାହାର ଏକ ଫଟୋ ସୋସିଆଲ ମିଡିଆରେ ଭାଇରାଲ ହୋଇଛି । ତମୁରା ସୋମବାର ସନ୍ଧ୍ୟା ୬:୩୦ ପୂର୍ବରୁ ମିଡଟାଉନ୍ ମାନହାଟନର ୩୪୫ ପାର୍କ ଆଭେନ୍ୟୁରେ ଏକ କୋଠା ଉପରକୁ ଆକ୍ରମଣ କରିଥିଲା । ଆଖିବୁଜା ଗୁଳି ଚଳାଇଥିଲା । ଜଣେ ପୋଲିସ ଅଧିକାରୀ ଏବଂ ଅନ୍ୟ ତିନି ଜଣଙ୍କୁ ନିର୍ମମ ଭାବେ ହତ୍ୟା କରିଥିଲେ । ପରେ ସେ ୩୩ତମ ମହଲାରୁ ମୃତ ଅବସ୍ଥାରେ ଉଦ୍ଧାର ହୋଇଥିଲା ।
ଘଟଣା ପରେ ଏଫ୍ବିଆଇ ଘଟଣାସ୍ଥଳରେ ପହଞ୍ଚିଛନ୍ତି । ଟିମ୍ କ୍ରାଇମ୍ ସିନ୍ର ରିପୋର୍ଟ ପ୍ରଦାନ କରିବ । ପୁଲିସ ତଦନ୍ତ ଜାରି ରଖିଛି । ବନ୍ଧୁକଧାରୀର ଉଦ୍ଦେଶ୍ୟ କଣ ଥିଲା । ସେ ଏକା ଥିଲା ନା କୌଣସି ଗ୍ୟାଙ୍ଗ ସହ ଜଡ଼ିତ ଥିଲା ତାର ତଦନ୍ତ ଚାଲିଛି ।
