ମାଲକାନଗିରି - ମାଲକାନଗିରି ବ୍ଲକ ଅନ୍ତର୍ଗତ ସିନ୍ଦ୍ରିମାଳ ପଞ୍ଚାୟତ ବନ୍ଧଗୁଡା ଗ୍ରାମ ଦେବୀ ପୀଠରେ ଲାଠି ପୂଜା ଅନୁଷ୍ଠିତ ହୋଇଛି। ସୀମାଗୁଡ଼ି ଗ୍ରାମର ମାଉଲି ମାଆ ପୀଠରେ ବଡ଼ଯାତ୍ରା ଉପଲକ୍ଷେ ବିଭିନ୍ନ ଦେବା ଦେବୀ ପୀଠରୁ ଆଜି ଲାଠି ଶୋଭାଯାତ୍ରାରେ ଆସି, ଏକତ୍ରିତ ହୋଇ ପୂଜା ପାଇଛନ୍ତି। ଚେଡେଙ୍ଗା, ସଲିମ, ମହୁପଦର, ମାଥିଲି, ଥାପା ଗୁଡା, ପାଙ୍ଗମ, କତାମେଟା, ସୀମାଗୁଡ଼ି, ବନ୍ଧଗୁଡା ମୁଠା ଦେବା ଦେବୀ ପୀଠରୁ ଲାଠି ଶୋଭାଯାତ୍ରାରେ ଆସିବା ପରେ ପାରମ୍ପରିକ ରୀତିରେ ପୂଜାର୍ଚ୍ଚନା କରାଯାଇ ଯାତ୍ରା ଆରମ୍ଭ ହୋଇଥିଲା। ମାଆଙ୍କ ଏହି ଲାଠି ଯାତ୍ରାରେ ହଜାର ହଜାର ଭକ୍ତ ମାଲକାନଗିରି ଜିଲ୍ଲା ସମେତ ଛତିଶଗଡର ସୀମାନ୍ତ ଗ୍ରାମଗୁଡିକରୁ ଏହି ଯାତ୍ରା ଦେଖିବା ପାଇଁ ଭିଡ ଜମାଇଥିବା ଦେଖିବାକୁ ମିଳିଥିଲା।
ପ୍ରତିବର୍ଷ ମାଘ ମାସ ଶେଷରେ ଏହି ଯାତ୍ରା ଅନୁଷ୍ଠିତ ହୋଇଥାଏ । ଭକ୍ତମାନେ ନିଜର ମାନସିକ ପୂରଣ ହୋଇଥିଲେ ଏଠାରେ ମାଆଙ୍କ ନିକଟରେ ବଳି ମଧ୍ୟ ଦେଇଥାନ୍ତି । ପାରମ୍ପରିକ ବାଦ୍ୟର ତାଳେ ତାଳେ ଭକ୍ତମାନେ କାଳସି ନାଚୁଥିବା ମଧ୍ୟ ଦେଖିବାକୁ ମିଳିଥିଲା। ମାଆ ମାଉଲିଙ୍କ ପୂଜାର୍ଚ୍ଚନା ପାଇଁ ମୁଖ୍ୟ ଜିଲ୍ଲା ପୂଜାରୀ ଲବ ପଡିଆମୀ ପୂଜା କରି ଥିଲେ। ସ୍ଥାନୀୟ ଅଞ୍ଚଳରୁ ଆସିଥିବା ଭକ୍ତମାନଙ୍କ ପାଇଁ ଅର୍ଣ୍ଣ ଭୋଗର ବ୍ୟବସ୍ଥା ମଧ୍ୟ କରାଯାଇଥିଲା।
ଶୃଙ୍ଖଳା ପାଇଁ ମାଆ ମାଉଲି ପୂଜା କମିଟି ତରଫରୁ କଡା ସୁରକ୍ଷାର ବ୍ୟବସ୍ଥା କରାଯାଇଥିବା ଦେଖିବାକୁ ମିଳିଛି । ବିଭିନ୍ନ ଆଦିବାସୀ ଗ୍ରାମଗୁଡିକରୁ ଦେବାଦେବୀଙ୍କ ପୀଠରୁ ଶତାଧିକ ଲାଠି ଧାରି ସିରୁଆ, ଦିସାରି, ଗୁଣିଆ ମାନେ ଆଲୁରମୁଠା ମାଆ ମାଉଲିଙ୍କ ପିଠରେ ପହଁଚି ଥିଲେ। ଏହି ଯାତ୍ରା ଦ୍ୱାରା ଗାଁର ମଙ୍ଗଳ ହେବା ସହ ଜମିରେ ଭଲ ଫସଲ, ବର୍ଷା ହୋଇଥାଏ, ଗ୍ରାମ ଉପରେ ରୋଗ ବାଧକ ଓ ବିପଦ ଆସେ ନାହିଁ,ଭୂତ, ପ୍ରେତ, ଡୁମା ମାନେ ଦୂରେଇ ଯାଇଥାନ୍ତି ଓ ବିଭିନ୍ନ ଗ୍ରାମର ନୂଆଖିଆ, ପୁଷ ପୁନେଇ ସରାସରି ପର୍ବ ଏଠାରେ କରାଯାଇଥାଏ। ମାଆ ମାଉଲି ପୀଠରୁ ବଡ ଯାତ୍ରାର ଶୁଭାରମ୍ଭ ହୁଏ ବୋଲି ପ୍ରବାଦ ରହିଛି, ପୂଜାସ୍ଥଳକୁ ବିଭିନ୍ନ ଗ୍ରାମରୁ ସମସ୍ତ ଭକ୍ତ ମାନେ ପରିବାର ଧରି ଆସିଥାନ୍ତି, ମାଆଙ୍କ ପୀଠରେ ଭୋଗ ଲଗାଇ ଗାଁ ଓ ପରିବାରର ମଙ୍ଗଳ ହୋଇଥାଏ ବୋଲି ଲୋକମାନଙ୍କର ବିଶ୍ଵାସ ରହିଛି।
