ନୂଆଦିଲ୍ଲୀ,୨୬/୧୧: ସୁଧୁରୁଛି ଦିଲ୍ଲୀ ଏନସିଆରରେ ପ୍ରଦୂଷଣ ସ୍ଥିତି । ଯାହାକୁ ନେଇ ସ୍କୁଲ ଖୋଲିବାକୁ ଅନୁମତି ଦେଇଛି CAQM ।  ଏହା ସହିତ ଅନଲାଇନ୍ ମୋଡରେ ମଧ୍ୟ ଅଧ୍ୟୟନ ଜାରି ରହିବ ବୋଲି ବ୍ୟବସ୍ଥା କରାଯାଇଛି। ଯେଉଁ  ଛାତ୍ରମାନେ ଏପରି ପରିସ୍ଥିତିରେ ବିଦ୍ୟାଳୟକୁ ଆସିବାକୁ ଇଚ୍ଛା କରନ୍ତି ନାହିଁ ସେମାନେ ଘରେ ରହି ପଢିପାରିବେ ପାଠ। ଏନେଇ ଦିଲ୍ଲୀ ଏନସିଆର  ସ୍କୁଲଗୁଡ଼ିକରେ ଉଭୟ ଅନଲାଇନ ଓ ଅଫଲାଇନ ମୋଡରେ ପାଠ ପଢିପାରିବେ ପିଲା । 

ନିକଟରେ ଦିଲ୍ଲୀ ଏନସିଆରରେ AQI ୪୬୦ ଅତିକ୍ରମ କରିଥିଲା । ଯାହା ପରେ ଦିଲ୍ଲୀ ଏନସିଆରରେ ଦଶମ ଶ୍ରେଣୀ ପର୍ଯ୍ୟନ୍ତ ସ୍କୁଲ ବନ୍ଦ କରିବାକୁ ଏବଂ ଅନଲାଇନ୍ ଅଧ୍ୟୟନ ଆରମ୍ଭ କରିବାକୁ CAQM ନିର୍ଦ୍ଦେଶ ଦେଇଥିଲା। ତେବେ ଗତ ଦୁଇ ଦିନ ମଧ୍ୟରେ ପ୍ରଦୂଷଣର ମାତ୍ରା କ୍ରମାଗତ ଭାବେ ହ୍ରାସକୁ ଦୃଷ୍ଟିରେ ରଖି ସୋମବାର ବିଳମ୍ବିତ ରାତିରେ ସ୍କୁଲଗୁଡ଼ିକୁ ଅଫଲାଇନ ମୋଡରେ ଖୋଲିବାକୁ ଅନୁମତି ଦିଆଯାଇଛି। ସେହିପରି  ରାଜ୍ୟ ସରକାର ନିଷ୍ପତ୍ତି ନେବେ ଯେ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଅଫଲାଇନ ପାଠପଢା ହେବ କି ନାହିଁ। ଏହି ପ୍ରସଙ୍ଗରେ ଦିଲ୍ଲୀ ସରକାର ନିଷ୍ପତ୍ତି ନେବେ। ସେହିପରି ଅନ୍ୟପଟେ  ଉତ୍ତରପ୍ରଦେଶ ସରକାର ଏନସିଆରର ନୋଏଡା ଏବଂ ଗାଜିଆବାଦ ବିଷୟରେ ନିଷ୍ପତ୍ତି ନେବେ ଏବଂ ଗୁରୁଗ୍ରାମ-ଫରିବାଦ ବିଷୟରେ ହରିୟାଣା ସରକାର ନିଷ୍ପତ୍ତି ନେବେ। CAQM ର ନିର୍ଦ୍ଦେଶ ଅନୁଯାୟୀ, ଛାତ୍ର ଏବଂ ଅଭିଭାବକମାନଙ୍କୁ ମଧ୍ୟ ଅନଲାଇନ୍ ମୋଡରେ ଶିକ୍ଷାର ବିକଳ୍ପ ପ୍ରଦାନ କରିବାକୁ ପଡିବ ।ଏଥିରୁ ସ୍ପଷ୍ଟ ହୋଇଛି ଯେ ଯଦି ପ୍ରଦୂଷଣର ପରିସ୍ଥିତିକୁ ଦୃଷ୍ଟିରେ ରଖି ଛାତ୍ରମାନେ ବିଦ୍ୟାଳୟକୁ ଆସିବାକୁ ଚାହୁଁ ନାହାଁନ୍ତି, ତେବେ ସେମାନେ ସ୍କୁଲ ଆସିବାକୁ ବାଧ୍ୟ କରାଯିବ ନାହିଁ।