ନୂଆଦିଲ୍ଲୀ,୩୧/୧୦: ଦିଲ୍ଲୀ-ଏନ୍ସିଆରରେ ମୋବାଇଲ୍ ଟାୱାରରୁ ଦାମୀ ଉପକରଣ ଚୋରି କରୁଥିବା ଏକ ଆନ୍ତଃରାଜ୍ୟ ଗ୍ୟାଙ୍ଗର ପର୍ଦ୍ଦାଫାସ ହୋଇଛି । ଦିଲ୍ଲୀ ପୁଲିସର କ୍ରାଇମବ୍ରାଞ୍ଚ ଏ ସଂକ୍ରାନ୍ତରେ ଅଦ୍ୟାବଧି ୫୨ ଜଣଙ୍କୁ ଗିରଫ କରିଛି । ଏହି ସମୟରେ ପୁଲିସ ୪୧୪ଟି ରିମୋଟ୍ ରେଡିଓ ୟୁନିଟ୍(ଆରଆରୟୁ), ୧୧୦ଟି ବେସ୍ ବ୍ୟାଣ୍ଡ ୟୁନିଟ୍(ବିବିୟୁ), ୧୬୧ଟି ବ୍ୟାଟେରୀ, ଆରଆରୟୁ ଟେଷ୍ଟିଂ ମେସିନ୍ ଜବତ କରିଛି । ଜବତ ସାମଗ୍ରୀର ମୂଲ୍ୟ ୧୦ କୋଟିରୁ ଅଧିକ ହେବ । ଅଭିଯୁକ୍ତମାନେ ମୋବାଇଲ୍ ଟାୱାରରୁ ବିଭିନ୍ନ ଦାମୀ ଉପକରଣ ଚୋରି କରି ତାକୁ ହଂକଂ ଓ ଅନ୍ୟ ଦେଶଗୁଡ଼ିକୁ ରପ୍ତାନୀ କରୁଥିଲେ । ସେଥିରୁ ସେମାନେ ବିପୁଳ ପରିମାଣର ଟଙ୍କା ରୋଜଗାର କରିଥିବା ଆଶଙ୍କା କରାଯାଉଛି । ଏମାନେ ଅତି କମ୍ରେ ୨୫୦ରୁ ଅଧିକ ଚୋରିରେ ସଂପୃକ୍ତ ଥିବା କୁହାଯାଉଛି ।
ସ୍ପେଶାଲ କମିଶନର ଅଫ୍ ପୁଲିସ(ଅପରାଧ) ଦେବେଶ ଶ୍ରୀବାସ୍ତବଙ୍କ ଅନୁସାରେ, ଜବତ ଉପକରଣଗୁଡିକ ମୋବାଇଲ୍ ଟାୱାରର କାର୍ଯ୍ୟ କରିବା ଲାଗି ଗୁରୁତ୍ୱପୂର୍ଣ୍ଣ ହୋଇଥିବାବେଳେ ଖୁବ୍ ଦାମୀ । ଉପକରଣଗୁଡି଼କୁ ଦକ୍ଷିଣ ପଶ୍ଚିମ ଦିଲ୍ଲୀର ମହିପାଳପୁର ଓ ପୂର୍ବ ଦିଲ୍ଲୀର ଲକ୍ଷ୍ମୀ ନଗରରେ ସାଗର ଭଟ୍ଟନାଗର ନାମକ ଜଣେ ବ୍ୟକ୍ତିଙ୍କର ଗୋ-ଡାଉନ୍ରେ ରଖାଯାଇଥିଲା । ଜଣେ ଅଭିଯୁକ୍ତ ଜୁବେରଙ୍କ ଭାଇ ତାକୁ ପୂର୍ବ ୟୁପି ଓ ବିହାରର ବିକ୍ରେତାଙ୍କ ନିକଟରୁ ୟୁନିଟ୍ ପିଛା ୭୦ ହଜାର ଟଙ୍କା ଦେଇ କିଣିଥିଲେ । ରେଳବାଇ ମାଧ୍ୟମରେ ତାକୁ ଅନ୍ୟତ୍ର ପଠାଯିବାର ଥିଲା ।
