ନୂଆଦିଲ୍ଲୀ,୨୧/୦୮: ଜାତୀୟ ରାଜଧାନୀ ଦିଲ୍ଲୀରେ ପୁଣି ବୋମା ଧମକ । ସ୍କୁଲକୁ ବୋମାରେ ଉଡ଼ାଇଦେବାକୁ ଆସିଛି ଧମକପୂର୍ଣ୍ଣ ମେସେଜେ। ଦିଲ୍ଲୀର ୫ଟି ସ୍କୁଲକୁ ଇମେଲ୍ ଜରିଆରେ ମେସେଜେ ଆସିଛି । ଦିଲ୍ଲୀ ଅଗ୍ନିଶମ ବିଭାଗ ଅନୁଯାୟୀ, ପ୍ରସାଦ ନଗର ଦ୍ୱାରକା ସେକ୍ଟର-୫ ଏବଂ ଅନ୍ୟାନ୍ୟ ସ୍ଥାନରେ ଥିବା ସ୍କୁଲକୁ ଧମକ ମିଳିଛି । ଏନେଇ ଦିଲ୍ଲୀ ପୁଲିସ ଏବଂ ଅଗ୍ନିଶମ ଦଳ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ସେହିପରି ଗତକାଲି ଦିଲ୍ଲୀର ପ୍ରାୟ ୫୦ଟି ସ୍କୁଲକୁ ବୋମା ଧମକ ମିଳିଥିଲା।
ସୂଚନା ଅନୁଯାୟୀ, ଦ୍ୱାରକା ସେକ୍ଟର-୫ରେ ଅବସ୍ଥିତ ବିଜିଏସ୍ ଇଣ୍ଟରନ୍ୟାସନାଲ ପବ୍ଲିକ୍ ସ୍କୁଲ ସମେତ ୫ଟି ସ୍କୁଲକୁ ଧମକପୂର୍ଣ୍ଣ ଇମେଲ ଆସିଛି। ଦିଲ୍ଲୀ ପୁଲିସ ଏବଂ ଅଗ୍ନିଶମ ବିଭାଗ ଘଟଣାସ୍ଥଳରେ ଉପସ୍ଥିତ ଥିବା ବେଳେ ସ୍କୁଲ ବାହାରେ ପୁଲିସ ଫୋର୍ସ ମୁତୟନ କରାଯାଇଛି। ଏଥିସହ ଟିମ୍ ସର୍ଚ୍ଚ ଅପରେସନ ଆରମ୍ଭ କରିଛି । ଏନେଇ ଅଗ୍ନିଶମ ବିଭାଗ ସ୍କୁଲଗୁଡ଼ିକୁ ବିପଦ ସମ୍ପର୍କରେ ସଦ୍ୟତମ ସୂଚନା ଦେଇଛି। ଯେଉଁଥିରେ କୁହାଯାଇଛି ଯେ ପ୍ରସାଦ ନଗରରେ ଅବସ୍ଥିତ ଆନ୍ଧ୍ର ଏଜୁକେସନ୍ ସୋସାଇଟି ସିନିୟର ସେକେଣ୍ଡାରୀ ସ୍କୁଲ, ଦ୍ୱାରକା ସେକ୍ଟର ୫ରେ ଅବସ୍ଥିତ ବିଜିଏସ୍ ଇଣ୍ଟରନ୍ୟାସନାଲ୍ ପବ୍ଲିକ୍ ସ୍କୁଲ, ଛାୱଲାରେ ଅବସ୍ଥିତ ରାଓ ମାନ ସିଂହ ସିନିୟର ସେକେଣ୍ଡାରୀ ସ୍କୁଲ, ଦ୍ୱାରକା ସେକ୍ଟର ୧ରେ ଅବସ୍ଥିତ ମ୍ୟାକ୍ସଫୋର୍ଟ ସ୍କୁଲ ଏବଂ ଦ୍ୱାରକା ସେକ୍ଟର ୧୦ରେ ଅବସ୍ଥିତ ଇନ୍ଦ୍ରପ୍ରସ୍ଥ ଇଣ୍ଟରନ୍ୟାସନାଲ୍ ସ୍କୁଲ ସମେତ ୫ଟି ସ୍କୁଲକୁ ଆଜି ସକାଳେ ବୋମା ଧମକ ମିଳିଛି । ପ୍ରକାଶ ଥାଉକି, ଗତ କିଛି ଦିନ ମଧ୍ୟରେ, ଦିଲ୍ଲୀର ସ୍କୁଲ ଏବଂ କଲେଜଗୁଡ଼ିକୁ ଧମକପୂର୍ଣ୍ଣ ମେଲ୍ ପଠାଯିବାର ଅନେକ ଘଟଣା ସାମ୍ନାକୁ ଆସିଛି। ୨୦ ଅଗଷ୍ଟ ୨୦୨୫ରେ, କେବଳ ଗୋଟିଏ କି ଦୁଇଟି ନୁହେଁ ବରଂ ଦିଲ୍ଲୀର ୫୦ଟି ସ୍କୁଲକୁ ବୋମା ଧମକ ମିଳିଥିଲା। ରିପୋର୍ଟ ଅନୁସାରେ, ସକାଳ ୭ଟା ୪୦ରେ ଏବଂ ତା'ପରେ ସକାଳ ୭ଟା ୪୨ ରେ ଦୁଇଟି ସ୍କୁଲକୁ ଧମକ ମିଳିଥିଲା। ଏହାପରେ ପୁଲିସ ଟିମ୍ ଏବଂ ଏଜେନ୍ସିଗୁଡ଼ିକ ଏକ ସର୍ଚ୍ଚ ଅପରେସନ୍ ଆରମ୍ଭ କରିଥିଲେ।
