ନୂଆଦିଲ୍ଲୀ ୨୪/୦୩: ଯେ କୌଣସି ବିପଦର ମୁକାବିଲା କରିବାକୁ ଇସ୍ରାଏଲ ନିଜ ନାଗରିକଙ୍କୁ ସାମରିକ ତାଲିମ ଦେଇଥାଏ । ୨୦୨୩ ଅକ୍ଟୋବର ୭ରେ ହମାସ୍ ଆତଙ୍କବାଦୀ ଇସ୍ରାଏଲରେ ପଶି ଆକ୍ରମଣ କରିବା ପରଠାରୁ ଇସ୍ରାଏଲ ଆହୁରି ସତର୍କ ହୋଇ ଏହାର ନାଗରିକଙ୍କୁ ଅତ୍ୟାଧୁନିକ ସୁରକ୍ଷା କୌଶଳ ଶିଖାଉଛି । ଏବେ ଇହୁଦୀଙ୍କ ସୁରକ୍ଷା ପାଇଁ ଇସ୍ରାଏଲରେ ବେଶ୍ ଡିମାଣ୍ଡରେ ଅଛି କେ୯ ସିକ୍ୟୁରିଟି ଡଗ୍ ପ୍ରୋଟେକ୍ସନ ।
ରିପୋର୍ଟ ଅନୁସାରେ, ପୂରା ଇସ୍ରାଏଲ୍ରେ ଟ୍ରେନ୍ଡ ଆସଲ୍ଟ ଡଗ୍ ବା ତାଲିମପ୍ରାପ୍ତ ଆକ୍ରମଣାତ୍ମକ କୁକୁରର ଚାହିଦା ବହୁମାତ୍ରାରେ ବଢ଼ିଛି । ଇହୁଦୀ ସମୁଦାୟ ଆତଙ୍କୀଙ୍କ ଆକ୍ରମଣରୁ ବର୍ତ୍ତିବା ପାଇଁ କେ୯ କୁକୁର ପଛରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରୁଛନ୍ତି । ଇସ୍ରାଏଲ ସେନା ପାଖରେ ଥିବା ଓକେଇଟିଜେଡ୍ (କେ୯) ୟୁନିଟ୍ ଅନେକ ବିସ୍ଫୋରକକୁ ଖୋଜି ହଜାର ହଜାର ଜୀବନ ବଞ୍ଚାଇଛି । ଅଦ୍ୟାବଧି ଆତଙ୍କବାଦ ବିରୋଧୀ ମିଶନରେ ୨୪ କେ୯ କୁକୁରଙ୍କ ଜୀବନ ଗଲାଣି ।
ଇସ୍ରାଏଲୀ ମିଡିଆ ରିପୋର୍ଟ ଅନୁସାରେ, ପୂର୍ବରୁ ପ୍ରୋଟେକ୍ସନ ଡଗ୍ ପ୍ରାୟ ୩୦ ହଜାର ଡଲାରରେ ବିକ୍ରି ହେଉଥିଲା । କିନ୍ତୁ ହମାସ୍ ଆକ୍ରମଣ ପରେ ଏହାର ଚାହିଦା ଆକାଶଛୁଆଁ ହୋଇଛି । ଏବେ ଏହି କୁକୁରକୁ ଲୋକେ ୭୫ ହଜାର ଡଲାର(ପ୍ରାୟ ୬୫ ଲକ୍ଷ)ରୁ ୧ ଲକ୍ଷ ୨୫ ହଜାର ଡଲାର (ପ୍ରାୟ ୧ କୋଟି ୭୫ ହଜାର)ରେ ମଧ୍ୟ କିଣୁଛନ୍ତି । ବିଶେଷକରି ଇସ୍ରାଏଲ ନାଗରିକ କେ୯ କୁକୁର କ୍ରୟ କରୁଛନ୍ତି । ପୂର୍ବରୁ ଏହି କମ୍ପାନୀ ବର୍ଷକୁ ମାତ୍ର ୫ରୁ ୧୦ କୁକୁର ବିକ୍ରି କରିପାରୁଥିଲା । ହେଲେ ଚଳିତବର୍ଷ କମ୍ପାନୀର ୨୦ରୁ ଅଧିକ କୁକୁର ବିକ୍ରି ପାଇଁ ଅର୍ଡର ପାଇଛି । ଏବେ କମ୍ପାନୀ ୪୫ କୁକୁରକୁ ତାଲିମ ଦେଉଛି । ପ୍ରାୟ ୧୮ ମାସ ଧରି ଏହି କୁକୁରଙ୍କୁ ଟ୍ରେନିଂ ଦିଆଯାଏ । ପରେ ତାହାକୁ ନୂଆ ମାଲିକ ପାଖକୁ ପଠାଯାଏ । ଇସ୍ରାଏଲ ପ୍ରୋଟେକ୍ସନ କେ୯ ନାମକ ଏକ ଆମେରିକୀୟଇସ୍ରାଏଲୀ କମ୍ପାନୀ ଏହିଭଳି ମିଲିଟାରୀ ତାଲିମପ୍ରାପ୍ତ କୁକୁର ବିକ୍ରି କରୁଛି ।
ସୂଚନା ଅନୁସାରେ, ୨୦୨୧ରେ ଏହି କମ୍ପାନୀ ସ୍ଥାପନ କରାଯାଇଥିଲା । ପୂରା ଦୁନିଆରେ ଯେ କେହି ବି କମ୍ପାନୀର ୱେବସାଇଟ୍ ଜରିଆରେ ଅନ୍ଲାଇନରେ ଏହି କୁକୁର କିଣିପାରିବେ । ବର୍ତ୍ତମାନର ବୈଶ୍ୱିକ ସ୍ଥିତି ଏବଂ ଚ୍ୟାଲେଞ୍ଜକୁ ଦୃଷ୍ଟିରେ ରଖି କେ୯ କୁକୁରଙ୍କୁ ତାଲିମ ଦିଆଯାଇଥାଏ । ୱେବସାଇଟରେ ପ୍ରତ୍ୟେକ କୁକୁରର ନାମ, ପ୍ରଜାତି ଏବଂ ମୂଲ୍ୟ ଲେଖାଯାଇଛି । ବିଭିନ୍ନ ଦେଶର ସେନାରେ କେ୯ କୁକୁର ଅଛନ୍ତି । ଏହି କୁକୁର ଆଘ୍ରାଣ ମାଧ୍ୟମରେ ବିସ୍ଫୋରକର ସନ୍ଧାନ କରିବାରେ ମାହିର । ଏଥିସହ ଆସଲ୍ଟ ଡଗ୍ ବା ଆକ୍ରମଣାତ୍ମକ କୁକୁରକୁ ଆତଙ୍କବାଦୀଙ୍କ ସହ ଲଢ଼ିବା ପାଇଁ ତାଲିମ ଦିଆଯାଇଥାଏ । ଏହା କବଳରୁ ମୁକୁଳିବା କାଠିକର ପାଠ । ଏଥିସହ ଛୋଟ ପିଲାଙ୍କ ସହ ଖାପ ଖୁଆଇ ରହିବା ଏବଂ ସେମାନଙ୍କୁ ମଧ୍ୟ ସୁରକ୍ଷା ଦେବା ଲାଗି ଏହି କୁକୁରକୁ ତାଲିମ ଦିଆଯାଇଥାଏ ।
