କେସିଙ୍ଗା,୦୮/୦୬: ଭବାନୀପାଟଣାଠାରୁ ବ୍ରହ୍ମପୁର ପର୍ଯ୍ୟନ୍ତ କେତେକ ସରକାରୀ ଓ ବେସରକାରୀ ଯାତ୍ରୀବାହୀ ବସ୍ ଭାୟା ନର୍ଲା ଓ ମ.ରାମପୁର ରାସ୍ତା ଦେଇ ଚଳାଚଳ କରୁଛି । ହେଲେ ଭାୟା ପାଷ୍ଟିକୁଡ଼ି, ଉତ୍କେଲା, କେସିଙ୍ଗା, ଅମାଠ ଛକ, ତୁଣ୍ଡଲା, ପଲମ, ଯୋରାଡବ୍ରା ରାସ୍ତାଦେଇ ଭବାନୀପାଟଣା-ବ୍ରହ୍ମପୁର ପର୍ଯ୍ୟନ୍ତ କୌଣସି ଯାତ୍ରୀବାହୀ ବସ୍ ନଥିବା ଯୋଗୁଁ ଅଞ୍ଚଳବାସୀ ସିଧାସଳଖ ବ୍ରହ୍ମପୁର ଯିବା ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି । କେସିଙ୍ଗା ଅଞ୍ଚଳବାସୀଙ୍କ ପାଇଁ ବ୍ରହ୍ମପୁରକୁ ଯିବାକୁ ହେଲେ ୩୫କିଲୋମିଟର ଭବାନୀପାଟଣା ସହରକୁ ଯିବାକୁ ପଡ଼ିଥାଏ । ତେଣୁ ପାଷ୍ଟିକୁଡି, ଉତ୍କେଲା, କେସିଙ୍ଗା, ଅମାଠ ଛକ, ତୁଣ୍ଡଲା, ପଲମ ଛକ, ଯୋରାଡବରା ଛକ ଓ ମ.ରାମପୁର ରାସ୍ତାଦେଇ ଭବାନୀପାଟଣା-ବ୍ରହ୍ମପୁର ପର୍ଯ୍ୟନ୍ତ ଏକ ସରକାରୀ ବସ୍ ଚଳାଚଳ କରିବା ପାଇଁ ଦୀର୍ଘଦିନ ହେଲା ଦାବି ହୋଇଆସୁଛି ।
ପ୍ରକାଶ ଯେ, ଭବାନୀପାଟଣାରୁ ବ୍ରହ୍ମପୁରକୁ ପ୍ରାୟ ପ୍ରତିଦିନ ରାଜ୍ୟ ସଡ଼କ ପରିବହନ ନିଗମର ଏକ ସରକାରୀ ହାଇଟେକ୍ ବସ ନର୍ଲା ଓ ମ.ରାମପୁର ରାସ୍ତାଦେଇ ଦୀର୍ଘବର୍ଷ ହେଲା ଚଳାଚଳ କରୁଛି । ଏହି ସରକାରୀ ବସ୍ ସହ ଆହୁରି ଚାରିଟି ଘରୋଇ ବସ ମଧ୍ୟ ଏହି ରାସ୍ତାରେ ଯାତାୟାତ କରୁଛି । ଏହି ହାଇଟେକ୍ ସରକାରୀ ବସ୍କୁ ଭବାନୀପାଟଣା ଭାୟା କେସିଙ୍ଗା, ଅମାଠ ଛକ, ପଲମ ଛକ, ମ.ରାମପୁର ଦେଇ ଚଳାଇବାକୁ କଳାହାଣ୍ଡି ତାଲୁକା ବାଣାୟତ ଓଡ଼ିଆ ସମାଜ ଦାବି କରିଛି । ଏନେଇ ସମାଜ ପକ୍ଷରୁ ବାଣିଜ୍ୟ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନାଙ୍କ ନିକଟରେ ଦାବି ଉପସ୍ଥାପନ କରାଯାଇଛି । କଳାହାଣ୍ଡିରୁ ଅନେକ ଯାତ୍ରୀ ବିଭିନ୍ନ କାର୍ଯ୍ୟରେ ଓ ଛାତ୍ରଛାତ୍ରୀ ପଢିବା ପାଇଁ ବ୍ରହ୍ମପୁରକୁ ଯାଇଥାନ୍ତି । ସରକାରୀ ଓ ବେସରକାରୀ ବସ ଗୋଟିଏ ମାର୍ଗରେ ଯାଉଥିବାରୁ ଅନ୍ୟମାନେ ଏହାର ସୁବିଧା ପାଇପାରୁନାହାନ୍ତି । ସରକାରୀ ବସଟି ଭବାନୀପାଟଣାରୁ ବାହାରି ଭାୟା କେସିଙ୍ଗା, ଅମାଠ ଛକ,ପଲମ୍ ଛକ, ମ.ରାମପୁର ଦେଇ ବ୍ରହ୍ମପୁରକୁ ଚଳାଚଳ କଲେ ଭବାନୀପାଟଣା ସମେତ କେସିଙ୍ଗା, କର୍ଲାମୁଣ୍ଡା, ନର୍ଲା, ମ. ରାମପୁର ଓ ବଲାଙ୍ଗିର ଜିଲ୍ଲାର ଟିଟିଲାଗଡ ବ୍ଲକ ଅଞ୍ଚଳର ଲୋକେ ଉପକୃତ ହୋଇପାରିବେ ବୋଲି ବାଣାୟତ ଓଡ଼ିଆ ସମାଜର ସମ୍ପାଦକ ରମେଶ ଜେନା କହିଛନ୍ତି । ଏଣୁ ବାଣିଜ୍ୟ ଓ ପରିବହନ ମନ୍ତ୍ରୀ ଏଥିପ୍ରତି ସ୍ୱତନ୍ତ୍ର ଦୃଷ୍ଟିଦେଇ ପଦକ୍ଷେପ ନେବାକୁ ବିଭିନ୍ନ ମହଲରେ ଦାବି ହେଉଛି ।
