ନୂଆଦିଲ୍ଲୀ: ଇସ୍ରାଏଲରେ ପ୍ରତିବାଦ ତୀବ୍ର ରୂପ ଧାରଣ କରିଛି । ରାଜ ରାସ୍ତାରେ ହଜାର ହଜାର ଲୋକ ପ୍ରତିବାଦ କରୁଛନ୍ତି । ଗାଜାରେ ଇସ୍ରାଏଲର ଆକ୍ରମଣ ଯୋଗୁଁ ସେଠାରେ ବନ୍ଦୀ ଥିବା ଲୋକମାନଙ୍କ ଜୀବନ ପ୍ରତି ବିପଦ ସୃଷ୍ଟି ହେଉଛି । ତେଣୁ ନେତାନ୍ୟାହୁ ସରକାର ଗାଜା ଯୁଦ୍ଧ ବନ୍ଦ କରିବା ସହ ବନ୍ଧକଙ୍କୁ ମୁକ୍ତ କରନ୍ତୁ ବୋଲି ପ୍ରଦର୍ଶନକାରୀମାନେ ଦାବି କରିଛନ୍ତି । ରିପୋର୍ଟ ଅନୁଯାୟୀ, ପୁଲିସ ଏପର୍ଯ୍ୟନ୍ତ ଜେରୁସାଲେମ ସମେତ ଇସ୍ରାଏଲର ବିଭିନ୍ନ ସହରରୁ ୨୫ ଜଣ ପ୍ରଦର୍ଶନକାରୀଙ୍କୁ ଗିରଫ କରିଛି।
ରାଜଧାନୀ ଅଭିମୁଖେ ଯାଉଥିବା ପ୍ରଦର୍ଶନକାରୀଙ୍କୁ ଅଟକାଇବା ସହ ସେମାନଙ୍କୁ ଗିରଫ କରିଛି ପୁଲିସ । ବିକ୍ଷୋଭକାରୀ ରୁଟ୍ ୧୬ ଦେଇ ଆଜା ଷ୍ଟ୍ରିଟ୍ ଆଡକୁ ଗତି କରିଥିଲେ । ସେଠାରେ ପ୍ରଧାନମନ୍ତ୍ରୀଙ୍କ ବାସଭବନ ରହିଛି । ପୁଲିସ ବଳ ପ୍ରୟୋଗ କରିବା ପରେ ମଧ୍ୟ ଲୋକମାନେ ଥମିବାର ନାଁ ନେଉନାହାଁନ୍ତି। ସୁଡ଼ଙ୍ଗ ବାହାରେ ରାସ୍ତା କଡ଼ରେ ଅଟକ ଥିବା ଜଣେ ପ୍ରତିବାଦକାରୀ କହିଛନ୍ତି, ‘ମୋତେ ଗିରଫ କର, କିନ୍ତୁ ପ୍ରତିବାଦ ଜାରି ରହିବ।’ ଇସ୍ରାଏଲରେ ବନ୍ଧକଙ୍କ ମୁକ୍ତି ପାଇଁ ଦେଶବ୍ୟାପୀ ପ୍ରତିବାଦ ଜାରି ରହିଛି। ତେଲ ଅଭିଭର ହୋଷ୍ଟେଜ୍ ସ୍କୋୟାରରେ ପ୍ରତିବାଦ ସମୟରେ ଗାଜାରୁ ମୁକ୍ତ ହୋଇଥିବା ଜଣେ ବନ୍ଧକ ଆର୍ବେଲ୍ ୟେହୁଦ୍ ଲୋକମାନଙ୍କୁ କହିଥିଲେ, ‘ମୁଁ ବନ୍ଧକ ରହିବା କିପରି ତାହା ପ୍ରତ୍ୟକ୍ଷ ଭାବରେ ଜାଣେ । ମୁଁ ଜାଣେ ଯେ, ସାମରିକ ଚାପ ବନ୍ଧକମାନଙ୍କୁ ମୁକ୍ତ କରିପାରିବ ନାହିଁ । ସେମାନଙ୍କୁ ଫେରାଇ ଆଣିବାର ଏକମାତ୍ର ଉପାୟ ହେଉଛି ଯୁଦ୍ଧ ବରିତି ଏବଂ ଏକ ଚୁକ୍ତିନାମା।’
ପୁଲିସ ଅଧିକାରୀଙ୍କ ଅନୁସାରେ, ଆଜି ସକାଳେ ଦେଶବ୍ୟାପୀ ୨୫ ଜଣ ପ୍ରଦର୍ଶନକାରୀଙ୍କୁ ଗିରଫ କରାଯାଇଛି । ଯୁଦ୍ଧବିରତି ଚୁକ୍ତିନାମା ଏବଂ ଯୁଦ୍ଧ ବନ୍ଦ ଦାବିରେ ଦେଶବ୍ୟାପୀ ପ୍ରତିବାଦ ଓ ରାସ୍ତା ଅବରୋଧ ମଧ୍ୟରେ ଏହି ଗିରଫଦାରୀ ହୋଇଛି। ଇସ୍ରାଏଲର କ୍ୟାବିନେଟ ଗାଜାକୁ ସମ୍ପୂର୍ଣ୍ଣ ଦଖଲ କରିବାକୁ ନିର୍ଦ୍ଦେଶ ଦେବା ପରେ ଏହି ପ୍ରତିବାଦ ଆରମ୍ଭ ହୋଇଛି ।
