ଭୁବନେଶ୍ୱର,୨୯/୦୬: ବର୍ଷା ଆରମ୍ଭ ହେଉଛି । ରାଜଧାନୀରେ ଡେଙ୍ଗୁ ରୋଗୀ ସଂଖ୍ୟା ୧୦୦ ଛୁଇଁଲାଣି । ସଂଖ୍ୟା ଦିନକୁ ଦିନ ବଢି ଚାଲିଛି। କେବଳ ଜୁନ୍ ମାସରେ ବହୁସଂଖ୍ୟକ ଡେଙ୍ଗୁ ପଜିଟିଭ ଚିହ୍ନଟ ହୋଇଛନ୍ତି । ବର୍ଷ ଆରମ୍ଭରୁ ସଂଖ୍ୟା ବଢ଼ିଲାଣି । ଆଗକୁ ପରିସ୍ଥିତି ଅସମ୍ଭାଳ ହେବା ଆଶଙ୍କା ଦେଖାଦେଇଛି ।
ଏପ୍ରିଲ ମାସରେ ମାତ୍ର ୬ ଜଣ ରୋଗୀ ଚିହ୍ନଟ ହୋଇଥିଲେ । ମେ ମାସରେ ସଂଖ୍ୟା ୧୪ । ଜୁନ୍ ମାସ ଶେଷ ସୁଦ୍ଧା ମୋଟ ୫୦ରୁ ଅଧିକ ରୋଗୀ ଚିହ୍ନଟ ହେଲେଣି । ସାଲିଆ ସାହିରୁ ୬ ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି । ଶିଖରଚଣ୍ଡି ନଗରରୁ ୫, ୟୁନିଟ-୩ ଏବଂ ସହିଦନଗରରୁ ୪ ରୋଗୀ ଚିହ୍ନଟ ହୋଇଛନ୍ତି । ପ୍ରତି ମାସରେ ସଂଖ୍ୟା ବଢିଚାଲିଛି । ଜୁଲାଇ ଏବଂ ଅଗଷ୍ଟ ମାସରେ ବର୍ଷାର ପରିମାଣ ବଢ଼ିବ । ହେଲେ ବିଏମ୍ସି ପକ୍ଷରୁ ଆଖିଦୃଶିଆ କୌଣସି ପଦକ୍ଷୋପ ନିଆଯାଉନି ।
ବିଭିନ୍ନ ସ୍ଥାନରେ ଟାୟାର, ପାଣିକୁଣ୍ଡ, ଥର୍ମୋକୁଲ ଗଦା ହୋଇରହିଛି । ଏହି ସବୁରେ ପାଣି ରହି ମଶା ଲାର୍ଭା ସୃଷ୍ଟି ହେଉଛି । ସବୁଠୁ ଅଧିକ ସରକାରୀ କ୍ୱାର୍ଟର୍ସରେ ମଶା ବଂଶ ବୃଦ୍ଧି ପାଉଛି । କ୍ୱାର୍ଟର୍ସ ପଛପଟେ ପୁଳାପୁଳା ଅବଢ଼ା ହାଣ୍ଡି ପଡ଼ିରହିଛି । ଏହି ସବୁ ମଶା ଉତ୍ସ ଯୋଗୁଁ ସ୍ଥିତି ଆଗକୁ ଜଟିଳ ହେବାକୁ ଯାଉଛି । ବିଏମ୍ସି ପକ୍ଷରୁ ବିଭିନ୍ନ ସ୍ଥାନରେ ଭଲ ଭାବରେ ସଫେଇ କରାଯାଉନି । ଫଳରେ ମଶା ବଂଶ ବୃଦ୍ଧି ପାଉଛି । ଡେଙ୍ଗୁ ମଶା ଠାରୁ ସାଧାରଣ ମଶାର ସାନ୍ଦ୍ରତା ବଢିଛି ।
