ନୂଆଦିଲ୍ଲୀ: ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏନ.ଚନ୍ଦ୍ରବାବୁ ନାଇଡୁ ଆଜି (ମଙ୍ଗଳବାର) ଏକ ବଡ ସୂଚନା ଦେଇଛନ୍ତି । ନାଇଡୁ କହିଛନ୍ତି ଯେ, ଭଗବାନ ଭେଙ୍କଟେଶ୍ୱର ସ୍ୱାମୀଙ୍କ ଜଣେ ଭକ୍ତ ତାଙ୍କ ବ୍ୟବସାୟିକ ସଫଳତା ପାଇଁ ପ୍ରଭୂଙ୍କ ଉପରେ ଖୁସି ହୋଇ ତାଙ୍କୁ ୧୨୧ କିଲୋଗ୍ରାମ ସୁନା ଦାନ କରିବାକୁ ନିଷ୍ପତି ନେଇଛନ୍ତି। ଭକ୍ତଙ୍କ ଦ୍ୱାରା ପ୍ରଦାନ କରାଯିବାକୁ ଥିବା ସୁନାର ମୂଲ୍ୟ ପ୍ରାୟ ୧୪୦ କୋଟି ଟଙ୍କା ବୋଲି ସେ କହିଛନ୍ତି। ତେବେ ଭକ୍ତ ଜଣକ ନିଜ ନାମ ଗୋପନ ରଖିବାକୁ ଚାହାଁନ୍ତି, ମୁଖ୍ୟମନ୍ତ୍ରୀ ମଙ୍ଗଳଗିରିରେ ଏକ ଦାରିଦ୍ର୍ୟ ନିରାକରଣ କାର୍ଯ୍ୟକ୍ରମରେ ଏହା କହିଛନ୍ତି।
ନାଇଡୁ କହିଛନ୍ତି ଯେ, ଏହି ଭକ୍ତ ଏକ କମ୍ପାନୀ ଆରମ୍ଭ କରିବାର ସ୍ୱପ୍ନ ଦେଖିଥିଲେ। ଭଗବାନ ଭେଙ୍କଟେଶ୍ୱର ସ୍ୱାମୀଙ୍କ ଆଶୀର୍ବାଦରେ ତାଙ୍କ କମ୍ପାନୀ କେବଳ ନିର୍ମିତ ହୋଇନଥିଲା, ବରଂ ଏହା ବହୁତ ସଫଳତା ମଧ୍ୟ ପାଇଛି । ନାଇଡୁ କହିଛନ୍ତି, 'ଏହି ଭକ୍ତ ନିଷ୍ପତ୍ତି ନେଇଛନ୍ତି ଯେ ସେ ତାଙ୍କ ପ୍ରଗତିର ଶ୍ରେୟ ଭଗବାନଙ୍କୁ ଦେବେ। ତେଣୁ ଏବେ ସେ ଭେଙ୍କଟେଶ୍ୱର ସ୍ୱାମୀଙ୍କୁ ୧୨୧ କିଲୋ ସୁନା ପ୍ରଦାନ କରୁଛନ୍ତି।' ସେ ଆହୁରି କହିଛନ୍ତି ଯେ,ଏହି ଭକ୍ତ ତାଙ୍କ କମ୍ପାନୀର ୬୦ ପ୍ରତିଶତ ଅଂଶ ବିକ୍ରି କରି୧.୫ ବିଲିୟନ ଆମେରିକୀୟ ଡଲାର ରୋଜଗାର କରିଛନ୍ତି।
ମୁଖ୍ୟମନ୍ତ୍ରୀ ନାଇଡୁ କହିଛନ୍ତି ଯେ, ଭକ୍ତ ତାଙ୍କ ସମ୍ପତ୍ତିର ଏକ ଅଂଶ ଭଗବାନଙ୍କୁ ସମର୍ପିତ କରିବାକୁ ଚାହାଁନ୍ତି, କାରଣ ସେ ଭାବନ୍ତି ଯେ, ଏସବୁ ଭଗବାନ ଭେଙ୍କଟେଶ୍ୱରଙ୍କ କୃପା ଯୋଗୁଁ ଘଟିଛି। ନାଇଡୁ ଏହା ମଧ୍ୟ କହିଛନ୍ତି ଯେ ଭଗବାନ ଭେଙ୍କଟେଶ୍ୱର ସ୍ୱାମୀଙ୍କ ମୂର୍ତ୍ତି ପ୍ରତିଦିନ ପ୍ରାୟ ୧୨୦ କିଲୋ ସୁନା ଅଳଙ୍କାରରେ ସଜାଯାଏ। ଯେତେବେଳେ ଏହି ଭକ୍ତ ଏହା ଜାଣିଲେ,ସେ ୧୨୧ କିଲୋ ସୁନା ଦାନ କରିବାକୁ ନିଷ୍ପତ୍ତି ନେଇଥିଲେ।
ଭଗବାନ ଭେଙ୍କଟେଶ୍ୱର ସ୍ୱାମୀଙ୍କ ମନ୍ଦିର ଆନ୍ଧ୍ରପ୍ରଦେଶର ତିରୁପତିରେ ଅବସ୍ଥିତ ଏବଂ ଏହାକୁ ବିଶ୍ୱର ସବୁଠାରୁ ପ୍ରସିଦ୍ଧ ଏବଂ ଧନୀ ମନ୍ଦିର ମଧ୍ୟରୁ ଗୋଟିଏ ବୋଲି ବିବେଚନା କରାଯାଏ। ଏହି ମନ୍ଦିର ଭଗବାନ ବିଷ୍ଣୁଙ୍କ ଅବତାର ଭେଙ୍କଟେଶ୍ୱରଙ୍କୁ ସମର୍ପିତ। ପ୍ରତିବର୍ଷ ଲକ୍ଷ ଲକ୍ଷ ଭକ୍ତ ଏଠାକୁ ଦର୍ଶନ ପାଇଁ ଆସନ୍ତି। ମନ୍ଦିରଟି ଏହାର ମହିମା, ଆଧ୍ୟାତ୍ମିକ ଗୁରୁତ୍ୱ ଏବଂ ଦାନ ପରମ୍ପରା ପାଇଁ ଜଣାଶୁଣା। ଭକ୍ତମାନେ ପ୍ରତିବର୍ଷ ଏହି ମନ୍ଦିରକୁ କୋଟି କୋଟି ଟଙ୍କା ମୂଲ୍ୟର ସୁନା,ରୂପା ଏବଂ ନଗଦ ଅର୍ପଣ କରନ୍ତି ।
