ନୂଆଦିଲ୍ଲୀ, ୨୭।୭: ସଂସଦର ମନସୁନ୍ ଅଧିବେଶନ ଚାଲିଥିବା ବେଳେ ଆଜି ଏକ ବଡ଼ ରାଜନୈତିକ ଘଟଣାକ୍ରମ ଦେଖିବାକୁ ମିଳିଛି । କେନ୍ଦ୍ର ଶିକ୍ଷାମନ୍ତ୍ରୀ ପଦରୁ ଇସ୍ତଫା ଦେବା ପରେ ବିଜେପି ନେତା ଧର୍ମେନ୍ଦ୍ର ପ୍ରଧାନ ସୋମବାର, ୨୭ ଜୁଲାଇ ଦିନ ପ୍ରଥମ ଥର ପାଇଁ ସଂସଦରେ ପହଞ୍ଚିଛନ୍ତି । ସଂସଦ ପରିସରରେ ପହଞ୍ଚିବାକ୍ଷଣି ଭାରତୀୟ ଜନତା ପାର୍ଟି ଏବଂ ଏନଡିଏ ସାଂସଦମାନେ ମକର ଦ୍ୱାର ନିକଟରେ ତାଙ୍କୁ ସ୍ୱାଗତ କରିଥିଲେ । ଏହି ଅବସରରେ ନେତାମାନେ 'ଧର୍ମେନ୍ଦ୍ର ପ୍ରଧାନ ଜିନ୍ଦାବାଦ' ନାରା ଦେଇଥିବା ବେଳେ ବିଜେପି ସାଂସଦ ସଞ୍ଜୟ ଜାୟସୱାଲ ତାଙ୍କୁ ପଗଡ଼ି ପିନ୍ଧାଇ ସମ୍ବର୍ଦ୍ଧିତ କରିଥିଲେ । ଧର୍ମେନ୍ଦ୍ର ପ୍ରଧାନ ସେଠାରେ ପହଞ୍ଚିବା ପୂର୍ବରୁ ହିଁ ବିଜେପି ସାଂସଦମାନେ ମକର ଦ୍ୱାର ନିକଟରେ ଏକାଠି ହୋଇ ତାଙ୍କୁ ଅପେକ୍ଷା କରି ରହିଥିଲେ । ସେ ସଂସଦ ପରିସରକୁ ପ୍ରବେଶ କରିବା ମାତ୍ରେ ଦଳୀୟ ସାଂସଦମାନେ ତାଙ୍କୁ ଭିତରକୁ ପାଛୋଟି ନେଇଥିଲେ ଏବଂ ଏକତା ପ୍ରଦର୍ଶନ କରି ଏକ ସ୍ୱତନ୍ତ୍ର ଟୋପି ମଧ୍ୟ ଭେଟି ଦେଇଥିଲେ ।
ଏହା ବି ପଢ଼ନ୍ତୁ... Anti-Paper Leak Bill: ପେପର୍ ଲିକ୍ ରୋକିବାକୁ ଆସିଲା ବିଲ୍...ବିରୋଧୀଙ୍କ ହଙ୍ଗାମା ଭିତରେ ଲୋକସଭାରେ ହେଲା ଆଗତ
କହିରଖୁ କି, ଗତ ୨୫ ଜୁଲାଇ ଦିନ ଧର୍ମେନ୍ଦ୍ର ପ୍ରଧାନ କେନ୍ଦ୍ର ଶିକ୍ଷାମନ୍ତ୍ରୀ ପଦରୁ ଇସ୍ତଫା ଦେଇଥିଲେ । ପେପର ଲିକ୍କୁ ନେଇ ଛାତ୍ରମାନଙ୍କ ଦେଶବ୍ୟାପୀ ଚାଲିଥିବା ବିରୋଧ ପ୍ରଦର୍ଶନର ସୁଯୋଗ ନେବାକୁ ଚେଷ୍ଟା କରୁଥିବା 'ରାଷ୍ଟ୍ର-ବିରୋଧୀ ଶକ୍ତି'ଗୁଡ଼ିକୁ ରୋକିବା ପାଇଁ ସେ ଏହି ନିଷ୍ପତ୍ତି ନେଇଥିବା କହିଥିଲେ । ଲଗାତାର ବିରୋଧ ପ୍ରଦର୍ଶନ ଏବଂ ବଢ଼ୁଥିବା ରାଜନୈତିକ ଚାପ ମଧ୍ୟରେ ଏନଡିଏର କୌଣସି ବରିଷ୍ଠ ମନ୍ତ୍ରୀଙ୍କ ଏପରି ଇସ୍ତଫା ଦେବା ଏକ ବିରଳ ଘଟଣା ଥିଲା । ଆନ୍ଦୋଳନକାରୀ ତଥା କେନ୍ଦ୍ର ସରକାରଙ୍କ ମଧ୍ୟରେ ହେବାକୁ ଥିବା ତୃତୀୟ ପର୍ଯ୍ୟାୟ ଆଲୋଚନାର କିଛି ଘଣ୍ଟା ପୂର୍ବରୁ ଏହି ପଦକ୍ଷେପ ନିଆଯାଇଥିଲା ।
