ନୂଆଦିଲ୍ଲୀ: ଇନ୍ଦୋରର ରାଜା ରଘୁବଂଶୀ ହତ୍ୟା ମାମଲା ସମଗ୍ର ଦେଶକୁ ଦୋହଲାଇ ଦେଇଛି। କୋର୍ଟରେ ଅଭିଯୁକ୍ତ ପତ୍ନୀ ସୋନମ ରଘୁବଂଶୀଙ୍କ ହତ୍ୟାରେ ସାମିଲ ଥିବା ନେଇ ସ୍ବୀକାର କରିଛି । ଏହା ପରେ ପୁଣି ଥରେ ସମ୍ପର୍କରେ ଥିବା ବିଶ୍ବାସ ଏବଂ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି । ଏହି ମାମଲାରେ ବାଗେଶ୍ବର ଧାମର ଧୀରେନ୍ଦ୍ର ଶାସ୍ତ୍ରୀଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଯେଉଁଥିରେ ସେ ଏପରି ମାମଲାକୁ ନେଇ ଏକ ବ୍ୟଙ୍ଗାତ୍ମକ ମନ୍ତବ୍ୟ ଦେଇଛନ୍ତି ଏବଂ ପୁରୁଷମାନଙ୍କ ଚିନ୍ତାକୁ ଉଜାଗର କରିଛନ୍ତି ।
ଭାଇରାଲ ଭିଡିଓରେ ଧୀରେନ୍ଦ୍ର ଶାସ୍ତ୍ରୀଙ୍କୁ କହୁଥିବାର ଶୁଣିବାକୁ ମିଳୁଛି ଯେ, ଆଜିକାଲି ଭାରତରେ ସ୍ତ୍ରୀମାନଙ୍କର ଏକ ବଡ଼ ଟ୍ରେଣ୍ଡ ଚାଲିଛି। ନୀଳ ଡ୍ରମ୍ ସହିତ ଭୟଙ୍କା ଦେବୀମାନେ ପ୍ରକଟ ହେଉଛନ୍ତି । ଆପଣ ଭାରତର ଖବର ଶୁଣି ନାହାଁନ୍ତି କି ? ଏଠାରେ ଧୀରେନ୍ଦ୍ର ଶାସ୍ତ୍ରୀ ସ୍ପଷ୍ଟ ଭାବରେ ମେରଠ ହତ୍ୟା ମାମଲାକୁ ଇଙ୍ଗିତ କରିଥିଲେ । ସେଠାରେ ମୁସ୍କାନ ରସ୍ତୋଗୀ ତାଙ୍କ ପ୍ରେମିକ ସାହିଲ ସହିତ ମିଶି ତାଙ୍କ ସ୍ବାମୀଙ୍କୁ ହତ୍ୟା କରିଥିଲେ ଏବଂ ତାଙ୍କ ଶରୀରକୁ ଖଣ୍ଡ ଖଣ୍ଡ କରି ନୀଳ ଡ୍ରମ୍ରେ ଲୁଚାଇ ଦେଇଥିଲେ ।
ଧୀରେନ୍ଦ୍ର ଶାସ୍ତ୍ରୀ ଏଥିକିରେ ଅଟକି ନାହାନ୍ତି । ସେ ଆହୁରି କହିଛନ୍ତି, ଆଉ ଏକ ନୂଆ ଖବର ଆସିଛି, ସୋନମ! କାହାଣୀଗୁଡ଼ିକ ଦେଖନ୍ତୁ! ଆମ ପରି ଅବିବାହିତ ପୁରୁଷମାନେ ଭୟଭୀତ ହେବା ଆରମ୍ଭ କରିଛନ୍ତି । ତାଙ୍କର ଏହି ବକ୍ତବ୍ୟରେ, ଦର୍ଶକମାନେ ଜୋରରେ ହସୁଥିବା ଦେଖିବାକୁ ମିଳିଛି । ଦର୍ଶକମାନେ ମଧ୍ୟ ଏହି ଭୟ ଏବଂ ବ୍ୟଙ୍ଗ ସହିତ ସହମତ ହୋଇଥିବା ପରି ମନେ ହେଉଛି । ସେ ଆହୁରିକହିଛନ୍ତି, ‘ପୂର୍ବରୁ ମୁଁ ଭାବୁଥିଲି ଯେ, ଆରେଞ୍ଜ ମ୍ୟାରେଜ୍ ଠିକ୍। ତା’ପରେ ମୁଁ ଭାବୁଥିଲି ଯେ, ପ୍ରେମ ବିବାହ ଠିକ୍। ଏବେ ଉଭୟ ବେକାର ଲାଗୁଛି। ଯେବେଠାରୁ ମୁଁ ଏହି ରାଜା ହତ୍ୟା ଘଟଣା ଶୁଣିଛି । ଏବେ ବିବାହ ହିଁ ବେକାର ଲାଗୁଛି ।’
