ନରସିଂହପୁର, ୧୬/୦୬: କଟକ ଜିଲ୍ଲା ନରସିଂହପୁର ବ୍ଲକ ଅନ୍ତର୍ଗତ ଡିମିରିଆ ଗାଁରେ ଝାଡାବାନ୍ତିରେ ଜଣେ ମହିଳାଙ୍କ ମୃତ୍ୟୁ ହୋଇଛି । ମୃତ ମହିଳା ଜଣଙ୍କ ଶାନ୍ତିଲତା ନାଏକ (୫୫ ବର୍ଷ) ବୋଲି ଜଣାପଡ଼ିଛି । ତାଙ୍କ ପରିବାରର ଦେବସ୍ମିତା ନାଏକ (୨୭ବର୍ଷ), ବିଶ୍ୱଜିତ ନାଏକ (୧୨ ବର୍ଷ), ଅଭିଜିତ ନାଏକ (୮ ବର୍ଷ) ଝାଡାବାନ୍ତିରେ ଆକ୍ରାନ୍ତ ହୋଇଛନ୍ତି।
ସୂଚନା ମୁତାବକ, ଦେବସ୍ନାନ ପୂର୍ଣ୍ଣିମାରେ ଶାନ୍ତି ଲତାଙ୍କ ଭାଇ ପୂର୍ବତନ ଗ୍ରାମରକ୍ଷୀ ସୁରସେନ ନାଏକଙ୍କ (୭୦ ବର୍ଷ) କିଡ଼ନୀ ରୋଗରେ ମୃତ୍ୟୁ ଘଟିଥିଲା। ଏହାର କିଛି ଦିନ ମଧ୍ୟରେ ହିଁ ଶାନ୍ତି ଲତା ଝାଡ଼ାବାନ୍ତିରେ ଆକ୍ରାନ୍ତ ହୋଇଥିଲେ । ରବିବାର ଦିନ ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ ନରସିଂହପୁର ମେଡିକାଲକୁ ଚିକିତ୍ସା ପାଇଁ ଆଣାଯାଇଥିଲା । ସେଠାରେ ତାଙ୍କର ମୃତ୍ୟୁ ଘଟିଛି । ଏହି ଘଟଣା ପରେ ଡିମିରିଆ ଗାଁରେ ଶୋକର ଛାୟା ଖେଳିଯାଇଛି।
