ରାମଚଣ୍ଡୀ,୧୪/୦୧: ଆଉ ମାତ୍ର ୩ ସପ୍ତାହ ପରେ ମାଘ ସପ୍ତମୀ ବୁଡ଼ । ଏ ବର୍ଷ ଚନ୍ଦ୍ରଭାଗା ତୀର୍ଥରେ ରେକର୍ଡ ସଂଖ୍ୟକ ଶ୍ରଦ୍ଧାଳୁ ବୁଡ଼ ପକାଇବେ ବୋଲି ଅନୁମାନ କରାଯାଉଛି । ହେଲେ ଜିଲ୍ଲା ପ୍ରଶାସନ ଓ କୋଣାର୍କ ଏନ୍ଏସି ପକ୍ଷରୁ ଏ ପର୍ଯ୍ୟନ୍ତ ପ୍ରସ୍ତୁତି ଆରମ୍ଭ ହୋଇନି । ଏହି ତୀର୍ଥ ଜଳରେ ସ୍ନାନ ସାରି ସୂର୍ଯ୍ୟ ଦର୍ଶନ ଓ ଦାନ କଲେ ସମସ୍ତ ପାପରୁ ମୁକ୍ତି ମିଳିଥାଏ ବୋଲି ଶ୍ରଦ୍ଧାଳୁଙ୍କ ମନରେ ବିଶ୍ୱାସ ରହିଛି । ପ୍ରତିବର୍ଷ ମାଘବୁଡ଼ ପାଇଁ ତିନି ପର୍ଯ୍ୟାୟରେ ପ୍ରସାଶନର ବୈଠକ ଅନୁଷ୍ଠିତ ହେଉଥିବା ବେଳେ ଚଳିତ ବର୍ଷ ମାତ୍ର ଗୋଟିଏ ଥର ବୈଠକ ହୋଇଛି । ପ୍ରଶାସନିକ ଅଧିକାରୀମାନେ ଚୁପ୍ ବସିଛନ୍ତି ।
ଗତ ୨୭ ତାରିଖରେ କୋଣାର୍କ ଯାତ୍ରୀନିବାସ ସମ୍ମିଳନୀ କକ୍ଷରେ ପ୍ରଥମ ସମନ୍ୱୟ ବୈଠକ ଅନୁଷ୍ଠିତ ହୋଇଥିଲା । ବୁଡ଼ର ୭ଦିନ ପୂର୍ବରୁ ତୀର୍ଥ ପୁଷ୍କରିଣୀ ଜଳ ନିଷ୍କାସନ ଓ ପଙ୍କ ଉଦ୍ଧାର କାର୍ଯ୍ୟ ଶେଷ କରିବା ପାଇଁ ନିର୍ଦ୍ଦେଶ ଦିଆଯାଇଥିଲା । ମାତ୍ର ଏ ପର୍ଯ୍ୟନ୍ତ ପୁଷ୍କରିଣୀ ଜଳ ନିଷ୍କାସନ କାର୍ଯ୍ୟ ଆରମ୍ଭ ହୋଇନି । ପୁଷ୍କରିଣୀ ଚତୁଃପାଶ୍ୱର୍ ଅଳିଆ ଆବର୍ଜନାରେ ଭର୍ତ୍ତି ହୋଇ ରହିଛି । ଫଳରେ ଶ୍ରଦ୍ଧାଳୁମାନେ ସମସ୍ୟାର ସମ୍ମୁଖୀନ ହେବା ଆଶଙ୍କା ଦେଖାଦେଇଛି । ମାଘ ସପ୍ତମୀ ବୁଡ଼ ବେଳେ ଏକ ସପ୍ତାହ ମଧ୍ୟରେ କାର୍ଯ୍ୟ ତରବରିଆ ଭାବେ କରାଯାଉଛି । ଅଧିକାରୀମାନେ ସମୟ ଅଭାବ ଦର୍ଶାଇ ଦୋଷ ଛଡ଼ାଉଛନ୍ତି । ଠିକାଦାର ମନଇଛା କାମ କରି କାର୍ଯ୍ୟାଦେଶ ନେଉଛନ୍ତି । ପୁଷ୍କରିଣୀକୁ ଠିକ୍ ଭାବେ ସଫା କରାଯାଉ ନଥିବାରୁ ଜଳ ପତ୍ତନ କମ୍ ରହୁଛି । ଅଳିଆ ଆବର୍ଜନା ବି ପଡ଼ି ରହୁଥିବା ଦେଖିବାକୁ ମିଳୁଛି । ଫଳରେ ଶ୍ରଦ୍ଧାଳୁମାନେ ବୁଡ଼ ପକାଇବା ସମୟରେ ଅସନ୍ତୋଷ ପ୍ରକାଶ କରିଥାନ୍ତି । ଏନେଇ ବିଭିନ୍ନ ସମୟରେ ବୁଦ୍ଧିଜୀବୀ ଓ ଶ୍ରଦ୍ଧାଳୁମାନେ ଜିଲ୍ଲା ପ୍ରସାଶନ ନିକଟରେ ଅଭିଯୋଗ କରିଥିବା ନଜିର ରହିଛି ।
ଏବେ ତୀର୍ଥ ପୁଷ୍କରିଣୀରେ ମାତ୍ର ଅଣ୍ଟାଏ ପାଣି ରହିଥିବାବେଳେ ଜଳ ଗୋଳିଆ ଓ ଆବର୍ଜନା ଭର୍ତ୍ତି ହୋଇ ରହିଛି । ମାଘ ସପ୍ତମୀ ପୂର୍ବରୁ ପୁଷ୍କରିଣୀରୁ ପଙ୍କ ଉଦ୍ଧାର କାର୍ଯ୍ୟ ହେଉଥିଲେ ମଧ୍ୟ ଦଳପୂର୍ଣ୍ଣ ଗୋଳିଆ ପାଣି ଶ୍ରଦ୍ଧାଳୁଙ୍କ ପାଇଁ ସମସ୍ୟା ସୃଷ୍ଟି କରୁଛି । ତୀର୍ଥ ପୁଷ୍କରଣୀରୁ ତୁରନ୍ତ ଜଳ ନିଷ୍କାସନ କାର୍ଯ୍ୟ ଆରମ୍ଭ ପାଇଁ ଜିଲ୍ଲା ପ୍ରଶାସନ ପଦକ୍ଷେପ ନେବା ନିମନ୍ତେ ବିଭିନ୍ନ ସଙ୍ଗଠନ ପକ୍ଷରୁ ଦାବି ହେଉଛି ।
