ଭୁବନେଶ୍ୱର,୧୮/୧୦: ଲମ୍ବା ଘଣ୍ଟା ଚକଟା । ଘନଘନ ତର୍ଜମା । ବୈଷୟିକ ଟିମ୍ର ଜୋରଦାର କସରତ । ସରକାରଙ୍କ ମାରାଥନ ବୈଠକ । ଶେଷରେ କଳ୍ପନା ଛକ ଟ୍ରାଫିକ ସମସ୍ୟାର ସମାଧାନ ପାଇଁ ବାଟ ବାହାର କରିଛି ପୂର୍ତ୍ତ ବିଭାଗ । କଟକ ରୋଡରୁ ଲୁଇସ୍ ରୋଡ୍ ଭାୟା କଳ୍ପନା ଛକ ଉପର ଦେଇଯିବ ଅତ୍ୟାଧୁନିକ ଫ୍ଲାଏଓଭର । ବଡ଼ କଥା ହେଲା, କଳ୍ପନା ଛକ ଓ ମ୍ୟୁଜିୟମ ଛକରେ ଫ୍ଲାଏଓଭର ଉପରେ ରହିବ ଦୁଇଟି ଗୋଲେଇ (ରୋଟାରୀ) । ଗୋଟିଏ ଗୋଲେଇ ଦେଇ ରାଜମହଲ ଛକକୁ ଓ ଅନ୍ୟଟିରେ ମାଉସୀ ମା’ ଛକ ଦିଗରେ ଯିବାକୁ ହେବ । ଖୁବଶୀଘ୍ର ଏହି ପ୍ରକଳ୍ପ ପାଇଁ ଟେଣ୍ଡର ଆହ୍ୱାନ କରିବ ପୂର୍ତ୍ତ ବିଭାଗ । ସମ୍ଭବତଃ ଆସନ୍ତା ନଭେମ୍ବର କିମ୍ବା ଡିସେମ୍ବରରେ ଟେଣ୍ଡର ଡକାଯିବ ।
ଲକ୍ଷ୍ମୀସାଗର ପଟୁ ଆସିଲେ ପୁରୁଣା ଷ୍ଟେସନ ବଜାର ଅତିକ୍ରମ କରିବା ପରେ ପରେ ଆରମ୍ଭ ହେବ ଏହି ଫ୍ଲାଏଓଭର । କଳ୍ପନା ଛକ, ମ୍ୟୁଜିୟମ ଛକ ଉପର ଦେଇଯିବ । ଲୁଇସ୍ ରୋଡ୍ ଉପର ହୋଇ ରବି ଟକିଜ୍ ପୂର୍ବରୁ (ପେଟ୍ରୋଲ ପମ୍ପ ପାଖରେ) ସରିବ । ରବି ଟକିଜ ଛକ ଉପର ଦେଇ ଫ୍ଲାଏଓଭର ନେବାକୁ ପୂର୍ବରୁ ଯୋଜନା ଥିଲା । ମାତ୍ର ରବି ଟକିଜ ପରେ ପରେ ମୁକ୍ତେଶ୍ୱର ମନ୍ଦିର ଥିବାରୁ ଭାରତୀୟ ପ୍ରତ୍ନତତ୍ତ୍ୱ ପ୍ରାଧିକରଣ (ଏଏସ୍ଆଇ)ର ଅନୁମତି ବିନା ଫ୍ଲାଏଓଭର ହୋଇପାରିବନି । ତେଣୁ ଆଗାମୀ ଦିନରେ ଏଏସ୍ଆଇ ଅନୁମତି ମିଳିବା ପରେ ରବି ଟକିଜ ଉପର ଦେଇ ଫ୍ଲାଏଓଭର ଯିବ । ବର୍ତ୍ତମାନ ରବି ଟକିଜ ପୂର୍ବରୁ ଫ୍ଲାଏ ଓଭର ସରିବ । ପ୍ରସ୍ତାବିତ ଫ୍ଲାଏଓଭର ଚଉଡ଼ା ୩ ଲେନ୍ ରହିବା ସମ୍ଭାବନା ଅଛି । ଉଭୟ ପାଶ୍ୱର୍ରେ ଦେଢ଼ ଲେନ୍ ରହିବ । ଏହାବାଦ୍ ତଳେ ସର୍ଭିସ୍ ରାସ୍ତା ପୂର୍ବଭଳି ରହିବ । କଟକ ରୋଡ ପଟୁ ଫ୍ଲାଏଓଭର ଉପରେ ଆସୁଥିବା ଗାଡ଼ିମୋଟର ଉପରେ ଥିବା କଳ୍ପନା ଛକ ଉପର ଗୋଲେଇ ଦେଇ ରାଜମହଲକୁ ଯିବେ । ସେହିପରି ମ୍ୟୁଜିୟମ ଛକରେ ବି ଫ୍ଲାଏଓଭର ଗୋଲେଇରେ ମାଉମୀ ମା’ ଛକ ପଟକୁ ଯିବାକୁ ହେବ ।
ପ୍ରସ୍ତାବିତ ଯୋଜନା ଅନୁସାରେ ରାଜମହଲ ଓଭରବ୍ରିଜ୍ ଯେଉଁଠି ସରିଛି, ତାର କିଛି ଆଗରେ ଏକ ରେଳ ଓଭରବ୍ରିଜ୍ ଅଛି । ସେଠାରୁ କିଛି ବାଟ ଆଗକୁ ଗଲେ ରାସ୍ତାର ଡାହାଣ ପାଶ୍ୱର୍ରେ ଫରଚ୍ୟୁନ୍ ହୋଟେଲ ପାଖରୁ ଫ୍ଲାଏଓଭର ଆରମ୍ଭ ହେବ । ଏଠାରୁ ଉପରକୁ ଉଠି କଳ୍ପନା ଛକ ଆଡ଼କୁ ଯିବାକୁ ହେବ । କଳ୍ପନା ଛକରୁ ଫ୍ଲାଏଓଭରର ଡେଣା ଉଭୟ ଦିଗକୁ (ବାମ/ଡାହାଣ) ଲମ୍ବିବ । ଗୋଟିଏ ପାଶ୍ୱର୍ କଟକ ରୋଡ ଆଡ଼କୁ ଓ ଅନ୍ୟଟି ମ୍ୟୁଜିୟମ୍ ଛକ ଆଡ଼କୁ ।
ରବି ଟକିଜ୍ ଛକରେ ଯେଭଳି ଭିଡ଼ ନ ହେବ, ସେଥିପାଇଁ ଛକକୁ ଭାଙ୍ଗି ପ୍ରଶସ୍ତ କରାଯିବ । ରବି ଟକିଜ୍ ଛକରୁ ସାନିଟାରିୟମ୍ ରାସ୍ତାକୁ ଚଉଡ଼ା କରିବାକୁ ମଧ୍ୟ ପୂର୍ତ୍ତ ବିଭାଗ ଯୋଜନା କରିଛି । କଳ୍ପନା ଛକ, ମ୍ୟୁଜିୟମ୍ ଛକ, ଭଞ୍ଜ କଳାମଣ୍ଡପ ଛକ, ଲୁଇସ୍ ରୋଡ୍ ଛକ ଓ ରବି ଟକିଜ୍ ଛକକୁ ଚଉଡ଼ା କରିବା ସହ ଏହାକୁ ସମ୍ପୂର୍ଣ୍ଣ ନୂଆ ରୂପ ଦିଆଯିବ। କଳ୍ପନା ଫ୍ଲାଏଓଭର ପାଇଁ ପ୍ରାୟ ୪୨୮ କୋଟି ଟଙ୍କା ଖର୍ଚ୍ଚ ଆକଳନ କରାଯାଇଛି ।
