ନୂଆଦିଲ୍ଲୀ: ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଏକ ବଡ଼ ଝଟକା ଦେଇଛନ୍ତି ଆମେରିକା ସୁପ୍ରିମକୋର୍ଟ। ରାଷ୍ଟ୍ରପତି ଟ୍ରମ୍ପଙ୍କ ଦ୍ବାରା ଅନ୍ୟ ଦେଶ ମାନଙ୍କ ଉପରେ ଲଗାଯାଇଥିବା ଶୁଳ୍କକୁ ଅବୈଧ ଘୋଷଣା କରି ରଦ୍ଧ କରାଯାଇଛି। ତାଙ୍କ ନିଷ୍ପତ୍ତିରେ, କୋର୍ଟ କହିଛନ୍ତି ଯେ, ଟ୍ରମ୍ପ ଏତେ ଦେଶ ଉପରେ ଶୁଳ୍କ ଲଗାଇ ନିଜର ଅଧିକାର କ୍ଷେତ୍ରକୁ ଅତିକ୍ରମ କରିଛନ୍ତି। ନିଷ୍ପତ୍ତିରେ କୁହାଯାଇଛି କି, ଟ୍ରମ୍ପ ଜାତୀୟ ଜରୁରୀକାଳୀନ ପରିସ୍ଥିତିରେ ବ୍ୟବହାର ପାଇଁ ଡିଜାଇନ୍ ହୋଇଥିବା ଏକ ଆଇନ ଅଧୀନରେ ଶୁଳ୍କ ଲଗାଇଛନ୍ତି।
କୋର୍ଟଙ୍କ ଏହି ନିଷ୍ପତ୍ତି ଆମେରିକାର ଅର୍ଥନୀତି, ଉପଭୋକ୍ତା ଏବଂ ରାଷ୍ଟ୍ରପତିଙ୍କ ବାଣିଜ୍ୟ ନୀତି ଉପରେ ଦୂରଗାମୀ ପ୍ରଭାବ ପକାଇବ। ଟ୍ରମ୍ପ ପ୍ରଶାସନ କହିଥିଲେ ଯେ, ସୁପ୍ରିମକୋର୍ଟରେ ପରାଜୟ ହେଲେ, ସରକାରଙ୍କୁ ଅନ୍ୟ ଦେଶ ସହିତ ବାଣିଜ୍ୟ ଚୁକ୍ତି ପ୍ରତ୍ୟାହାର କରିବାକୁ ଏବଂ ଆମଦାନୀକାରୀ ମାନଙ୍କୁ ଯଥେଷ୍ଟ ପରିମାଣର ଅର୍ଥ ଫେରସ୍ତ ଦେବାକୁ ବାଧ୍ୟ କରାଯାଇପାରିବ।
ରାଷ୍ଟ୍ରପତି ନୁହେଁ, ସଂସଦକୁ ଶୁଳ୍କ ଲଗାଇବାର ଅଧିକାର ମିଳିଛି : ସୁପ୍ରିମକୋର୍ଟ
ଟ୍ରମ୍ପ୍ ହେଉଛନ୍ତି ପ୍ରଥମ ରାଷ୍ଟ୍ରପତି ଯିଏ ସଂସଦର ଅନୁମୋଦନ ବିନା ଏକପାଖିଆ ଭାବରେ ଶୁଳ୍କ ଲଗାଇବାର ଅଧିକାର ଦାବି କରିଛନ୍ତି । ୧୯୭୦ ଦଶକର ଏକ ଜରୁରୀକାଳୀନ ଆଇନକୁ ଉଦ୍ଧୃତ କରି ଶୁଳ୍କ ଲଗାଯାଇଥିଲା। ମୁଖ୍ୟ ବିଚାରପତି ଜନ୍ ଜି. ରବର୍ଟସ୍ ଜୁନିଅର କହିଛନ୍ତି ଯେ ଆଇନ ରାଷ୍ଟ୍ରପତିଙ୍କୁ ଶୁଳ୍କ ଲାଗୁ କରିବାକୁ ଅଧିକାର ଦିଏ ନାହିଁ।
ମୁଖ୍ୟ ବିଚାରପତି ଲେଖିଛନ୍ତି, "ରାଷ୍ଟ୍ରପତି ଅସୀମ ପରିମାଣ, ଅବଧି ଏବଂ ପରିସରର ଏକପାଖିଆ ଶୁଳ୍କ ଲାଗୁ କରିବାକୁ ଅସାଧାରଣ କ୍ଷମତା ଦାବି କରିଛନ୍ତି। ଏହି ଦାବିର ପରିସର, ଇତିହାସ ଏବଂ ସାମ୍ବିଧାନିକ ପ୍ରସଙ୍ଗକୁ ଦୃଷ୍ଟିରେ ରଖି, ତାଙ୍କୁ ଏହାକୁ ପ୍ରୟୋଗ କରିବା ପାଇଁ ସ୍ପଷ୍ଟ ସଂସଦୀୟ ଅଧିକାର ପ୍ରଦର୍ଶନ କରିବାକୁ ପଡିବ।"
ଏହା ସହ ପଢନ୍ତୁ : ଭାରତ ସହ ପୁଣି ଉତ୍ତମ ସମ୍ପର୍କ ରଖିବାକୁ ଚାହୁଁଛି ବାଂଲାଦେଶ, ଶପଥ ନେବାର ୩ ଦିନ ଭିତରେ ବଡ ନିଷ୍ପତ୍ତି ନେଲେ ନୂଆ ପ୍ରଧାନମନ୍ତ୍ରୀ…
