ନୂଆଦିଲ୍ଲୀ: ଆମେରିକା କାନାଡା ସହିତ ସମସ୍ତ ବାଣିଜ୍ୟ ଆଲୋଚନାକୁ ସ୍ଥଗିତ ରଖିଛି। ଗୁରୁବାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓଟାୱା ଉପରେ ପୂର୍ବତନ ଆମେରିକା ରାଷ୍ଟ୍ରପତି ରୋନାଲ୍ଡ ରେଗାନଙ୍କ ଏକ ବିଜ୍ଞାପନକୁ ମିଥ୍ୟା ଭାବରେ ପ୍ରସାରଣ କରିଥିବା ଅଭିଯୋଗ କରିଛନ୍ତି। ବିଜ୍ଞାପନରେ ରେଗାନଙ୍କୁ ଶୁଳ୍କ ବିରୁଦ୍ଧରେ କଥା ହେଉଥିବା ଦେଖିବାକୁ ମିଳୁଛି । ଏହି ବିଜ୍ଞାପନକୁ ନେଇ ଟ୍ରମ୍ପ କାନାଡା ଉପରେ ଏବେ କ୍ରୋଧିତ।
ଟ୍ରୁଥ୍ ସୋସିଆଲରେ ଏକ ପୋଷ୍ଟରେ ଟ୍ରମ୍ପ ଲେଖିଛନ୍ତି କି, "କାନାଡାର ଖରାପ ବ୍ୟବହାର ଯୋଗୁଁ, ସେମାନଙ୍କ ସହିତ ସମସ୍ତ ବାଣିଜ୍ୟ ଆଲୋଚନା ବନ୍ଦ କରାଯାଇଛି।" କିଛି ସପ୍ତାହ ପୂର୍ବରୁ, କାନାଡା ପ୍ରଧାନମନ୍ତ୍ରୀ ମାର୍କ କାର୍ନି ହ୍ୱାଇଟ୍ ହାଉସରେ ଡୋନାଲ୍ଡ ଟ୍ରମ୍ପଙ୍କୁ ଭେଟିଥିଲେ ଏବଂ ଏହି ସାକ୍ଷାତ ସମୟରେ ଦୁଇ ନେତାଙ୍କ ମଧ୍ୟରେ ହୋଇଥିବା ଆଲୋଚନାରୁ ଜଣାପଡ଼ିଥିଲା ଯେ ଦୁଇ ଦେଶ ମଧ୍ୟରେ ସମ୍ପର୍କ ଉନ୍ନତ ହେଉଛି।
କାନାଡାର ଆମେରିକା ଶୁଳ୍କକୁ ସମାଲୋଚନା କରୁଥିବା ଏକ ବିଜ୍ଞାପନ ଏବେ ପୁଣିଥରେ ଟ୍ରମ୍ପଙ୍କୁ କ୍ରୋଧିତ କରିଛି। ବିଜ୍ଞାପନରେ ରୋନାଲ୍ଡ ରେଗାନଙ୍କୁ ଚେତାବନୀ ଦେଇ ଦର୍ଶାଯାଇଛି ଯେ, ବିଦେଶୀ ସାମଗ୍ରୀ ଉପରେ ଶୁଳ୍କ ନିଯୁକ୍ତିରେ କ୍ଷତି ଏବଂ ବାଣିଜ୍ୟ ଯୁଦ୍ଧର କାରଣ ହୋଇଥାଏ।
ଟ୍ରୁଥ୍ ସୋସିଆଲରେ ତାଙ୍କ ପୋଷ୍ଟରେ ଟ୍ରମ୍ପ ଲେଖିଛନ୍ତି, "ରୋନାଲ୍ଡ ରିଗାନ୍ ଫାଉଣ୍ଡେସନ୍ ଘୋଷଣା କରିଛି ଯେ, କାନାଡା ଭୁଲଭାବରେ ଏକ ବିଜ୍ଞାପନ ବ୍ୟବହାର କରିଛି। ଏହା ଏକ ମିଥ୍ୟା ବିଜ୍ଞାପନ, ଯେଉଁଥିରେ ରୋନାଲ୍ଡ ରିଗାନ୍ ଶୁଳ୍କ ବିଷୟରେ ନକାରାତ୍ମକ କଥା କହୁଛନ୍ତି। ଏହି ବିଜ୍ଞାପନର ମୂଲ୍ୟ ୭୫୦୦୦୦୦୦ ଡଲାର। କାନାଡା କେବଳ ଆମେରିକାର ସୁପ୍ରିମକୋର୍ଟ ଏବଂ ଅନ୍ୟାନ୍ୟ ଅଦାଲତର ନିଷ୍ପତ୍ତିରେ ହସ୍ତକ୍ଷେପ କରିବା ପାଇଁ ଏହା କହିଛି।
ଆମେରିକା ଏହି ଘୋଷଣା ଏପରି ଏକ ସମୟରେ କରିଛି, ଯେତେବେଳେ ଦୁଇ ଦେଶ ଇସ୍ପାତ ଏବଂ ଆଲୁମିନିୟମ ସମ୍ପର୍କରେ କ୍ଷେତ୍ର ଚୁକ୍ତିନାମା ଉପରେ ଆଲୋଚନା କରୁଛନ୍ତି । ଟ୍ରମ୍ପଙ୍କ ଘୋଷଣା ପରେ, ମାର୍କ କାର୍ନି କହିଛନ୍ତି ଯେ ଯଦି ଆଲୋଚନା ବିଫଳ ହୁଏ,ତେବେ ଓଟାୱା ଆମେରିକାକୁ ଏହାର ବଜାରରେ ଅନୁଚିତ ପ୍ରବେଶ କରିବାକୁ ଦେବ ନାହିଁ।
ଟ୍ରମ୍ପ କାନାଡିଆନ୍ ସାମଗ୍ରୀ ଉପରେ ୩୫ ପ୍ରତିଶତ ଶୁଳ୍କ ଲାଗୁ କରିଥିଲେ। ସେ ଧାତୁ ଉପରେ ୫୦ ପ୍ରତିଶତ ଶୁଳ୍କ ଏବଂ ଅଟୋମୋବାଇଲ୍ ଉପରେ ୨୫ ପ୍ରତିଶତ ଶୁଳ୍କ ସମେତ କ୍ଷେତ୍ର-ନିର୍ଦ୍ଦିଷ୍ଟ ଶୁଳ୍କ ମଧ୍ୟ ଘୋଷଣା କରିଥିଲେ। ଗତ କିଛି ସପ୍ତାହ ମଧ୍ୟରେ ଆମେରିକା ଏବଂ କାନାଡା ମଧ୍ୟରେ ସମ୍ପର୍କରେ ସାମାନ୍ୟ ଉନ୍ନତି ଆସୁଥିଲା, କିନ୍ତୁ ଟ୍ରମ୍ପଙ୍କ ସଦ୍ୟତମ ଘୋଷଣା ନୂତନ ଉତ୍ତେଜନା ସୃଷ୍ଟି କରିପାରେ।
