ନୂଆଦିଲ୍ଲୀ ୧୧/୦୬: ପାକିସ୍ତାନରେ ଏବେ ଗଧ ମୂଲ୍ୟ ଆକାଶଛୁଆଁ । ଦେଶର ଅଧିକାଂଶ ଦିନ ମଜୁରିଆଙ୍କ ଜୀବିକାର ଏହା ଏକମାତ୍ର ଉତ୍ସ । କିନ୍ତୁ ଲକ୍ଷାଧିକ ଟଙ୍କା ଦେଇ ଗଧ କିଣିବାରେ ସେମାନେ ସକ୍ଷମ ନୁହନ୍ତି । ପାକିସ୍ତାନ ବଜାରରେ ଗୋଟିଏ ଗଧର ମୂଲ୍ୟ ପ୍ରାୟ ୨ ଲକ୍ଷ ଟଙ୍କା । ୮ ବର୍ଷ ତଳେ ଏହା ୩୦ ହଜାର ଟଙ୍କା ଥିଲା । ଗଧ ମୂଲ୍ୟରେ ହଠାତ୍ ବୃଦ୍ଧିର କାରଣ ଚୀନ୍ । ଚୀନ୍ ମୋଟା ଅଙ୍କ ଦେଇ ପାକିସ୍ତାନରୁ ଗଧ କିଣୁଥିବାରୁ ପାକ୍ ଲୋକଙ୍କ ଜୀବିକାରେ ଏହାର ପ୍ରଭାବ ପଡୁଛି । ପାକିସ୍ତାନରେ ହଠାତ୍ ଗଧ ମୂଲ୍ୟ ବଢ଼ିବାର କାରଣ ଚୀନ୍ର ବହୁ-ବିଲିଅନ ଡଲାର ଏଜିଆଓ ଉଦ୍ୟୋଗ । ଏଜିଆଓ ଏକ ଜିଲେଟିନ୍ ।
ଚୀନ୍ର ପାରମ୍ପରିକ ଔଷଧରେ ଏହା ବ୍ୟବହୃତ ହୁଏ । ଗଧ ଚମଡ଼ାକୁ ପାଣିରେ ଫୁଟାଇ ତାକୁ ବହଳିଆ କରି ଏହି ଔଷଧ ପ୍ରସ୍ତୁତ କରାଯାଏ । କ୍ଲାନ୍ତି-ରୋଧୀ ଗୁଣ, ପ୍ରତିରକ୍ଷା ପ୍ରଣାଳୀରେ ସୁଧାର, ଟ୍ୟୁମର୍କୁ ଦବାଇବା ସହିତ ଆନେମିଆ-ରୋଧୀ ପ୍ରଭାବ ଯୋଗୁ ଏହି ଔଷଧ ଚୀନ୍ର କ୍ଲିନିକ୍ମାନଙ୍କରେ ବ୍ୟାପକ ବ୍ୟବହୃତ ହୁଏ । ତେବେ ପଶୁ ଅଧିକାର ସମର୍ଥକଙ୍କ ଅନୁସାରେ, ଗଧ ଆମଦାନି, ଖାସ୍କରି ତା’ର ଖୋଳ ପ୍ରତି ଚୀନ୍ର ରୁଚି ନୂଆ ନୁହେଁ ।
ଚୀନ୍ର ଏଜିଆଓ ଉଦ୍ୟୋଗ ଗତ ୫ ବର୍ଷରେ ୧୬୦ ପ୍ରତିଶତ ବଢ଼ିଛି । ଏଥିରୁ ପ୍ରତିବର୍ଷ ଲକ୍ଷାଧିକ ଗଧଙ୍କ ଚମଡ଼ାର ଆବଶ୍ୟକତା ବଢ଼ିଛି । ଏହି ଚାହିଦା ଚୀନ୍ର ଅନେକ ଘରୋଇ କମ୍ପାନିକୁ ପାକିସ୍ତାନ ସମେତ ଅନ୍ୟ ଦେଶରୁ ଗଧ ଆମଦାନିର ସୁଯୋଗ ଦେଇଛି । ଚଳିତ ବର୍ଷ ଏପ୍ରିଲରେ ଚୀନ୍ର ଏକ ପ୍ରତିନିଧିମଣ୍ଡଳ ପାକିସ୍ତାନର ଜାତୀୟ ଖାଦ୍ୟ ନିରାପତ୍ତା ଓ ଅନୁସନ୍ଧାନ ସଂଘୀୟ ମନ୍ତ୍ରୀ ରାଣା ତନଭୀର ହୁସେନଙ୍କ ସହ ଦେଶରେ ଗଧ ଫାର୍ମର ପ୍ରତିଷ୍ଠା ଉପରେ ଆଲୋଚନା କରିଥିଲା ।
ପାକିସ୍ତାନର ଅବଦୁଲ ରଶିଦ ଜଣେ ଦିନ ମଜୁରିଆ । ତାଙ୍କ ଜୀବିକା ଉପାର୍ଜନର ଏକମାତ୍ର ଜରିଆ ଗଧ । ତାଙ୍କ ପୋଷା ଗଧ ଟାଇଗର୍ର ଗତ ସପ୍ତାହରେ ଦୁର୍ଘଟଣା ଯୋଗୁ ମୃତ୍ୟୁ ହୋଇଥିଲା । ନୂଆ ଗଧ କିଣିବା ତାଙ୍କ ପାଇଁ କାଠିକର ପାଠ ହୋଇଛି । କରାଚୀରେ ସ୍ଥିତ ଦେଶର ସବୁଠୁ ବଡ଼ ଗଧ ବଜାର ଲ୍ୟାରୀରେ ତାଙ୍କର ଭଲ ସମ୍ପର୍କ ଥାଇ ମଧ୍ୟ ସବୁଠୁ ଶସ୍ତା ଓ ସୁସ୍ଥ ଗଧ ୧ ଲକ୍ଷ ୫୫ ହଜାରରେ ମିଳୁଛି । ଏତେ ଟଙ୍କା ଯୋଗାଡ଼ କରିବାରେ ସେ ସକ୍ଷମ ନୁହନ୍ତି । ତାଙ୍କର ବାର୍ଷିକ ଆୟ ୪ ଲକ୍ଷରୁ ମଧ୍ୟ କମ୍ । ଗଧ ଅନେକ ଉଦ୍ୟୋଗ ସହ ଅଙ୍ଗାଙ୍ଗୀ ଭାବେ ଜଡ଼ିତ । ଗରିବ ଦିନ ମଜୁରିଆ ଗଧ ପିଠିରେ ଭାରି ଜିନିଷ ଲଦି ସବୁ ପ୍ରକାର ରାସ୍ତାରେ ଅନେକ କିମି ଚାଲି ମାଲ୍ ପରିବହନ କରି ଦୈନିକ ୧୫ଶହରୁ ୨ ହଜାର ଟଙ୍କା ରୋଜଗାର କରନ୍ତି ।
