ଭୁବନେଶ୍ୱର ୧୬/୦୧: ଦୁନିଆର ସବୁ ବାପାମା’ ନିଜ ପିଲାକୁ ଖୁବ୍ ଭଲ ପାଇଥାନ୍ତି । ତଥାପି ଅନେକ ସମୟରେ ସେମାନେ ଅନ୍ୟ ପିଲା ସହ ନିଜ ପିଲାର ତୁଳନା କରିଥାନ୍ତି, ଯାହା ଆଦୌ ଠିକ୍ ନୁହେଁ । ଏପରି କରିବା ଦ୍ୱାରା ଲାଭ କମ୍ କ୍ଷତି ଅଧିକ ହୋଇଥାଏ । ପିଲାର ମାନସିକ ସ୍ୱାସ୍ଥ୍ୟବସ୍ଥା ଉପରେ ଏହାର ନକାରାତ୍ମକ ପ୍ରଭାବ ପଡିଥାଏ । ଏପରିକି ପିଲାର ଆତ୍ମବିଶ୍ୱାସ ମଧ୍ୟ ଦୋହଲି ଯାଇଥାଏ ।
ଅନ୍ୟ ପିଲା ସହ ତୁଳନା ନୁହେଁ, ବରଂ କରନ୍ତୁ ଉତ୍ସାହିତ
ପିଲାଙ୍କୁ ମଣିଷ କରି ଗଢିତୋଳିବା ଆଦୌ ସହଜ ନୁହେଁ । ପ୍ୟାରେଣ୍ଟିଂ ବିଶେଷଜ୍ଞଙ୍କ କହିବା କଥା ଆଜିକାଲିର ପିଲାଙ୍କୁ ଠିକ୍ ଭାବେ ଗଢି ତୋଳିବା ପାଇଁ ଅଭିଭାବକଙ୍କୁ ସଚେତନ ହେବାକୁ ପଡିବ । ଅତୀତର ଏବଂ ଏବେକାର ଅଭିଭାବିକପଣିଆରେ ବହୁ ପାର୍ଥକ୍ୟ ରହିଛି । ଅବଶ୍ୟ ଏଥିପାଇଁ ସମସ୍ତଙ୍କର ଦୃଷ୍ଟିକୋଣ ଭିନ୍ନ । ତଥାପି ପିଲାଙ୍କୁ ମଣିଷ କରିବା ସମୟରେ କେତେକ ବିଶେଷ ଦିଗ ପ୍ରତି ଧ୍ୟାନ ଦେବା ଖୁବ୍ ଜରୁରି । ଯେପରିକି ନିଜ ପିଲାକୁ ଅନ୍ୟ ସହ ତୁଳନା କରିବା ଅନୁଚିତ୍ ।
ତୁଳନା କରିବା କାହିଁକି ଭୁଲ୍?
ତୁଳନା କରିବା ଦ୍ୱାରା ପିଲା ଭିତରେ ନକାରାତ୍ମକ ଚିନ୍ତାଧାରା ବଢିଚାଲେ । କ୍ରମଶଃ ପିଲା ଏକା ପଡିଯାଇଥାଏ । କାରଣ ତୁଳନା କରିବା ଦ୍ୱାରା ପିଲା ଭିତରେ ଇର୍ଷା ଉତ୍ପନ୍ନ ହୋଇଥାଏ । ବାହାର ପିଲା ହୁଅନ୍ତୁ ଅବା ଭାଇଭଉଣୀ ତୁଳନା କରିବା ଦ୍ୱାରା ପରସ୍ପରଙ୍କ ଭିତରେ ଇର୍ଷା ସୃଷ୍ଟି ହେବା ସହ ଭଲ ପାଇବା କମିଯାଏ ।
ଅଭିଭାବକଙ୍କଠାରୁ ଦୂରେଇ ଯାଏ ପିଲା
ଅଭିଭାବିକ ପିଲାର ତୁଳନା କରିବା ଦ୍ୱାରା ସେ ବାପାମା’ ସହ ମନ ଖୋଲା ଭାବେ କଥା ହୋଇପାରେନା । ବରଂ ସବୁ କାମରେ ସେ ଅନ୍ୟ ସହ ନିଜର ତୁଳନା ହୋଇପାରେ ବୋଲି ଆଶା ରଖିଥାଏ । ଏହାଦ୍ୱାରା ସେ ଏକା ହୋଇପଡେ । ଆଉ ଅଭିଭାବକଙ୍କଠାରୁ ଦୂରେଇବା ଦ୍ୱାରା ସମସ୍ୟାକୁ ଦୃଢତାର ସହ ମୁକାବଲା କରିପାରେନା । ଫଳରେ ସେ ବଡ଼ ହେବା ପରେ ମଧ୍ୟ ସମସ୍ୟାକୁ ସାମ୍ନା କରିବାକୁ ଡରିଥାଏ।
ପିଲାର ଟ୍ୟାଲେଣ୍ଟ୍ ମରିଯାଏ
ଅନ୍ୟ ସହ ପିଲାର ତୁଳନା କରିବା ପରେ ସେ କୌଣସି କାମ ପ୍ରତି ଆଗ୍ରହୀ ହୋଇ ନଥାଏ । ବରଂ ଉଦାସୀନ ହୋଇପଡେ । ଫଳରେ ତା’ ଭିତରେ ଥିବା ଟ୍ୟାଲେଣ୍ଟ୍ ଚାପି ହୋଇଯାଇଥାଏ । ଫଳରେ ପିଲାର ଟ୍ୟାଲେଣ୍ଟ୍ ଆପେ ଆପେ ମରିଚାଲେ ।
ପିଲା ଚିନ୍ତାରେ ରହେ..
ତୁଳନା କରିବା ଦ୍ୱାରା ପିଲା ସବୁବେଳେ ଭଲ ପ୍ରଦର୍ଶନ କରିବାକୁ ନେଇ ଚିନ୍ତାରେ ରହିଥାଏ । ତେଣୁ ମୁକ୍ତ ଭାବେ କିଛି ଭାବି ପାରେନା । ଫଳରେ ସେ ଚାହୁଁଥିବା କାମକୁ ଭଲରେ କରିବା ପରିବର୍ତ୍ତେ ବିଗାଡି ଦେଇଥାଏ ।
ଆତ୍ମବିଶ୍ୱାସ କମିଚାଲେ
ତୁଳନା କରିବା ଦ୍ୱାରା ପିଲାରେ ବିଶ୍ୱାସ ହୋଇଯାଏ ଯେ ସେ ସାମ୍ନା ପିଲାଠାରୁ ଦୁର୍ବଳ । ଫଳରେ ତା’ ଭିତରେ କୌଣସି କାମକୁ ନେଇ ଉତ୍ସାହ ନୁହେଁ, ବରଂ ଆତ୍ମବିଶ୍ୱାସର ଅଭାବ ଦେଖିବାକୁ ମିଳିଥାଏ । ତେଣୁ ପିଲାକୁ ତୁଳନାଠାରୁ ଦୂରେଇ ରଖନ୍ତୁ ।
