ସୋନପୁର,୧୯l୬(ଆପ୍ର): ସୋନପୁର ବ୍ଲକ ଲଛିପୁର ପ୍ୟାକ୍ସ ଅଧୀନରେ ବାଲପୁର ଗ୍ରାମରେ ଏକ ଧାନ କ୍ରୟ ସମ୍ପ୍ରସାରଣ କେନ୍ଦ୍ର ରହିଛି I ଏହି ଧାନ କ୍ରୟ କେନ୍ଦ୍ରରେ ବାଲପୁର ଗ୍ରାମର ଚାଷୀମାନେ ଧାନ ବିକ୍ରୟ କରିଥାନ୍ତି I ତେବେ ଧାନ କ୍ରୟ ସଂସ୍ଥା ଟାର୍ଗେଟ ସରିଥିବା ଏବଂ ନୁଆ ଟାର୍ଗେଟ ଆସିନଥିବା କହି ଧାନ କ୍ରୟ କରୁନାହିଁ I ଏହା ଫଳରେ ବାଲପୁର ଗ୍ରାମର ଚାଷୀମାନେ ଏହି ଧାନ କ୍ରୟ କେନ୍ଦ୍ରକୁ ଧାନ ବିକିବା ପାଇଁ ଆଣିଛନ୍ତି I 

୧୫ ଦିନରୁ ଅଧିକ ହେଲାଣି ନୂତନ ଟାର୍ଗେଟ ଆସିନଥିବାରୁ ସେମାନେ ଧାନ ବିକ୍ରି କରି ପାରୁନାହାନ୍ତି I ଉକ୍ତ ଧାନ କ୍ରୟ କେନ୍ଦ୍ରରେ କୌଣସି ଛାଉଣିର ବ୍ୟବସ୍ଥା ନାହିଁ I ଫଳରେ ଗତ କିଛି ଦିନ ହେଲା ବର୍ଷା ଯୋଗୁଁ ଚାଷୀଙ୍କ ଧାନ ଭିଜି ଗଜା ହୋଉଥିବା ନେଇ ଚାଷୀ ଅଭିଯୋଗ କରିଛନ୍ତି I 

ଉକ୍ତ ଧାନ କ୍ରୟ କେନ୍ଦ୍ରରୁ ଚାଷୀଙ୍କ ଧାନ ଶୀଘ୍ର ଉଠାଇବା ଦାବିରେ ଗୁରୁବାର ଚାଷୀମାନେ ଜିଲ୍ଲା ମୁଖ୍ୟ ଯୋଗାଣ ଅଧିକାରୀ ନିରଜ ରଞ୍ଜନ ଦାସଙ୍କୁ ଭେଟି ନିବେଦନ କରିଛନ୍ତି I ନୁଆ ଟାର୍ଗେଟ ଆସିବା ନେଇ ପ୍ରସ୍ତୁତି ଚାଲିଛି ଦିନେ ଦୁଇ ଦିନ ମଧ୍ୟରେ ଏହାର ସମାଧାନ ହେବ ବୋଲି ଚାଷୀମାନଙ୍କୁ ପ୍ରତିଶ୍ରୁତି ଦେଇଛନ୍ତି I ଶଙ୍କର ପ୍ରସାଦ ସାଙ୍କ ନେତୃତ୍ୱରେ ବାଲପୁର ଗ୍ରାମର ଶତାଧିକ ଚାଷୀ ଜିଲ୍ଲା ମୁଖ୍ୟ ଯୋଗାଣ ଅଧିକାରୀଙ୍କୁ ଭେଟିଥିଲେ l