ନୂଆଦିଲ୍ଲୀ,୨୩/୦୫: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ତାଗିଦ୍ ସତ୍ତେ୍ୱ ଭାରତରେ ନିଜର ସମ୍ପ୍ରସାରଣ ଯୋଜନା ନେଇ ଦୃଢ଼ ରହିଛି ଆପଲ୍ । କମ୍ପାନି ଚୀନ୍ରୁ ଯୋଗାଣ ଶୃଙ୍ଖଳକୁ ଭାରତକୁ ସ୍ଥାନାନ୍ତର କରୁଥିବାବେଳେ ଏହାର ପ୍ରମୁଖ କଣ୍ଟ୍ରାକ୍ଟ ଉତ୍ପାଦନକାରୀ ଫକ୍ସକନ୍ ଭାରତରେ ୩୦୦ ଏକର ଆଇଫୋନ୍ କ୍ୟାମ୍ପସ୍ ପାଇଁ ପ୍ରସ୍ତୁତିକୁ ଜୋରଦାର କରିଥିବା ଜଣାପଡ଼ିଛି । ଫକ୍ସକନ୍ ଦେବାନ୍ହଲି ପ୍ଲାଣ୍ଟର ୩୦,୦୦୦ କର୍ମଚାରୀଙ୍କ ରହିବା ପାଇଁ ଆବାସିକ କମ୍ପେ୍ଲକ୍ସ୍ ନିର୍ମାଣ କାର୍ଯ୍ୟ ଅଗ୍ରିମ ସ୍ତରରେ ରହିଛି । ଖୁବ୍ଶୀଘ୍ର ଏହି ୟୁନିଟ୍ରୁ ଆମେରିକାକୁ ରପ୍ତାନି ହେବ ଆଇଫୋନ୍ । ଭାରତ ବଦଳରେ ଆମେରିକାକୁ ଆଇଫୋନ୍ ନିର୍ମାଣ ସ୍ଥାନାନ୍ତର କରିବା ପାଇଁ ଟ୍ରମ୍ପଙ୍କ ଆହ୍ୱାନ ଫଳପ୍ରଦ ହୋଇନାହିଁ ।
ସୂଚନାଯୋଗ୍ୟ, ନିକଟରେ ଟ୍ରମ୍ପ କତାର ଯାତ୍ରା ଅବସରରେ ଆପଲ ସିଇଓ ଟିମ୍ କୁକ୍ଙ୍କ ସହ ଆଲୋଚନା କରିଥିଲେ । ସେ କହିଥିଲେ ଯେ, ଟିମ୍ କୁକ୍ଙ୍କ ସହ ସାମାନ୍ୟ ଯୁକ୍ତିତର୍କ ହୋଇଛି । କୁକ୍ ଭାରତରେ ପ୍ଲାଣ୍ଟ ବନାଉଛନ୍ତି ଏବଂ ମୁଁ ଚାହେଁନାହିଁ ଯେ ଭାରତରେ ଆପଲ୍ ପ୍ଲାଣ୍ଟ ବସାଉ । ଟ୍ରମ୍ପ ସ୍ପଷ୍ଟ ଭାବେ କହିଥିଲେ ଯେ, ଭାରତରେ ପ୍ଲାଣ୍ଟ ବସାଇବା ପାଇଁ ଆମର କୌଣସି ପ୍ରକାର ଆଗ୍ରହ ନାହିଁ । ଭାରତ ନିଜ ଧ୍ୟାନ ନିଜେ ରଖିପାରିବ ।
ଟ୍ରମ୍ପଙ୍କ ତାଗିଦ୍ ସତ୍ତେ୍ୱ ଆପଲ୍ ସିଇଓ ଟିମ୍ କୁକ୍ ଭାରତ ପାଇଁ କମ୍ପାନିର ସମ୍ପ୍ରସାରଣ ନେଇ ଦୃଢ଼ମନା ରହିଛନ୍ତି । କର୍ଣ୍ଣାଟକ ପ୍ଲାଣ୍ଟ କାର୍ଯ୍ୟ ଜୋରସୋର ଚାଲିଛି । ଜୁନ୍ ସୁଦ୍ଧା ଏହି ପ୍ଲାଣ୍ଟରୁ ପ୍ରସ୍ତୁତ ଆଇଫୋନ୍ ଆମେରିକା ବଜାରରେ ପହଞ୍ଚିବ । ଆମେରିକା ବଜାର ପାଇଁ ସର୍ବାଧିକ ଆଇଫୋନ୍ ଚୀନ୍ ବଦଳରେ ଭାରତରେ ନିର୍ମାଣ ହେବ ବୋଲି କୁକ୍ ସ୍ପଷ୍ଟ ଅଛନ୍ତି । ଏହି କ୍ରମରେ କମ୍ପାନି ଦ୍ରୁତ ବେଗରେ ଆଗକୁ ବଢୁଛି ।
କମ୍ପାନିର ଏହି ପ୍ରତିବଦ୍ଧତାର ପ୍ରମାଣ କର୍ଣ୍ଣାଟକସ୍ଥିତ ଫକ୍ସକନ୍ର ଦେବାନ୍ହଲି ୟୁନିଟ୍ରେ ସ୍ପଷ୍ଟ ଦୃଶ୍ୟମାନ ହେଉଛି । ତାଇୱାନ୍ଭିତ୍ତିକ କଣ୍ଟ୍ରାକ୍ଟ ମାନୁଫ୍ୟାକ୍ଚର୍ର ଏହି ୩୦୦ ଏକର ପ୍ଲାଣ୍ଟ ସାଇଟ୍ରେ କାର୍ଯ୍ୟ ସ୍ୱାଭାବିକ ରହିଛି । ଟ୍ରମ୍ପଙ୍କ ତାଗିଦ୍ର ପ୍ରଭାବ ଏହା ଉପରେ ପଡ଼ିନାହିଁ । କର୍ମଚାରୀଙ୍କ ରହିବା ପାଇଁ ବିଲ୍ଡିଂ ନିର୍ମାଣ କାର୍ଯ୍ୟ ଜୋରସୋର ଚାଲିଛି, ଯାହାକି ଫକ୍ସକନ୍ର ପରିଚାଳନାଗତ ଢ଼ାଞ୍ଚା ପାଇଁ ଅତ୍ୟନ୍ତ ଜରୁରୀ । ଆପଲ୍ର ସର୍ବବୃହତ୍ କଣ୍ଟ୍ରାକ୍ଟ ଉତ୍ପାଦନକାରୀ ହେଉଛି ଫକ୍ସକନ୍ ।
ଫକ୍ସକନ୍ ଏହାର ଦେବାନ୍ହଲି ୟୁନିଟ୍ର ପରିଚାଳନା ଲାଗି ବଡ଼ ଆକାରରେ ପୁଞ୍ଜି ଖଟାଉଛି । ଏହି ୟୁନିଟ୍ ବେଙ୍ଗାଲୁରୁର କେମ୍ପେଗୌଡ଼ା ଅନ୍ତର୍ଜାତୀୟ ବିମାନ ବନ୍ଦରରୁ ୩୪ କିଲୋମିଟର ଦୂରରେ ଅବସ୍ଥିତ । ଏହି ଫ୍ୟାସିଲିଟିରେ କମ୍ପାନି ୨୧,୯୧୧ କୋଟି ଟଙ୍କାର ପୁଞ୍ଜିନିବେଶ କରିଛି ।
ଦେବାନ୍ହଲି ପ୍ଲାଣ୍ଟସ୍ଥିତ ଆବାସିକ କମ୍ପେ୍ଲକ୍ସର କ୍ଷମତା ୩୦,୦୦୦ ଷ୍ଟାଫ୍ଙ୍କ ପାଇଁ ରହିଛି । ଏଥିସହିତ ଏହା ହେବ ଭାରତର ସର୍ବବୃହତ୍ ଷ୍ଟାଫ୍ ଆକମଡେସନ୍ କମ୍ପେ୍ଲକ୍ସ । ଡିସେମ୍ବର ସୁଦ୍ଧା ନିର୍ମାଣ କାର୍ଯ୍ୟ ଶେଷ ହେବ । ଫ୍ୟାକ୍ଟ୍ରି କର୍ମଚାରୀ, ଯେଉଁମାନେ ଆଇଫୋନ୍ ଆସେମ୍ବଲ କାର୍ଯ୍ୟ କରିଥାନ୍ତି, ସେମାନଙ୍କ ପାଇଁ ସ୍ୱତନ୍ତ୍ର ଭାବେ ଏହି ଆକମଡେସନ୍ କମ୍ପେ୍ଲକ୍ସକୁ ପ୍ରସ୍ତୁତ କରାଯାଉଛି ।
