ଭୁବନେଶ୍ୱର ୨୧/୧୨: ଜାଣନ୍ତି କି ଚା’ରେ ଚିନି ପରିବର୍ତ୍ତେ ଗୁଡ଼ ପକାଇବା ଦ୍ୱାରା କ'ଣ ଫାଇଦା ହୋଇଥାଏ? ଗୁଡ଼ ଶୀତଦିନେ ସ୍ୱାସ୍ଥ୍ୟ ପାଇଁ ଖୁବ୍ ଲାଭଦାୟକ ବୋଲି କୁହାଯାଏ । ଏହା ଶରୀରକୁ ଗରମ ରଖିବା ସହ ଅନେକ ସମସ୍ୟାକୁ ଦୂର କରିଥାଏ । ଘରର ବୟସ୍କ ଲୋକମାନେ ଶୀତଦିନେ ସମସ୍ତଙ୍କୁ ଗୁଡ଼ ଖାଇବାକୁ କହିଥାନ୍ତି । ଏହା ପଛରେ ଅନେକ କାରଣ ରହିଥାଏ । ଏଥିରେ ଆଇରନ୍, ପୋଟାସିୟମ୍, ମ୍ୟାଗ୍ନେସିୟମ୍, କ୍ୟାଲସିୟମ୍ ଓ ଫସ୍ଫରସ୍ ବହୁ ମାତ୍ରାରେ ରହିଥାଏ, ଯାହା ରୋଗ ପ୍ରତିରୋଧକ ଶକ୍ତି ବଢାଇବା ସହ ପାଚନ ଶକ୍ତକୁ ମଜଭୁତ କରିଥାଏ । ସେହିପରି ହାଡ଼ ଓ ହୃଦୟ ପାଇଁ ମଧ୍ୟ ଲାଭଦାୟକ । ଶୀତଦିନେ ଏମିତି ଜିନିଷ ଖାଇବା ଉଚିତ୍, ଯାହା ଶରୀରକୁ ଗରମ ଅନୁଭବ ଦେବା ସହ ରୋଗ ସହ ଲଢିବାରେ ସମର୍ଥ ହୋଇପାରିବ । ଚିନି ଚା’ ପରିବର୍ତ୍ତେ ଗୁଡ଼ ଚା’ ଶରୀରକୁ ଅଧିକ ଗରମର ଅନୁଭବ ଦେଇଥାଏ । ଚାଲନ୍ତୁ ଜାଣିବା ଗୁଡ଼ ଚା’ର ଫାଇଦା ।
ହଜମ ପ୍ରକ୍ରିୟାକୁ ସୁସ୍ଥ ରଖେ: ଗୁଡ଼ ପାଚନ କ୍ରିୟାକୁ ସୁଧାରିବାରେ ସହଯୋଗ କରେ । ଏହା ଅନ୍ତଃନଳୀର କାମକୁ ସହଜ କରିବା ସହ କବ୍ଚ ସମସ୍ୟାରୁ ମୁକ୍ତି ଦେଇଥାଏ । ଶୀତଦିନେ ମେଟାବଲିଜିମ୍ ଧୀମା ହୋଇଯାଇଥାଏ । ଏହି ସମୟରେ ଗୁଡ଼ ଚା’ ସ୍ୱାସ୍ଥ୍ୟ ପାଇଁ ଶ୍ରେଷ୍ଠ ବିକଳ୍ପ ।
ଶକ୍ତିର ସ୍ରୋତ: ଗୁଡ଼ରେ ପ୍ରାକୃତିକ ଶର୍କରା ରହିଥାଏ, ଯାହା ଶରୀରରେ ସତେଜତା ସହ ଶକ୍ତି ଭରିଥାଏ । ପ୍ରାକୃତିକ ଶର୍କରା ଶରୀରକୁ କୌଣସି କ୍ଷତି ପହଞ୍ଚାଇ ନଥାଏ । ସେଥିପାଇଁ ସୀମିତ ମାତ୍ରାର ଗୁଡ଼ ଖାଇବା ଦ୍ୱାରା ଶରୀରର କୌଣସି କ୍ଷତି ହୋଇ ନଥାଏ ।
ରକ୍ତର ଅଭାବକୁ ଦୂରାଏ: ଗୁଡ଼ ଆଇରନ୍ର ପ୍ରମୁଖ ସ୍ରୋତ, ଯାହା ରକ୍ତର ଅଭାବକୁ ଦୂର କରିଥାଏ । ଏପରିକି ହିମୋଗ୍ଲୋବିନ୍ ସ୍ତର ମଧ୍ୟ ବଢାଇଥାଏ । ବିଶେଷକରି ମହିଳାମାନଙ୍କ ପାଇଁ ଏହି ଗୁଡ଼ ଚା’ ବେଶୀ ହିତକର । ଏହା ସେମାନଙ୍କ ଆନେମିଆ ସମସ୍ୟା ଦୂର କରିଥାଏ ।
ରୋଗ ପ୍ରତିରୋଧକ ଶକ୍ତି ବଢାଏ: ଗୁଡ଼ରେ ଆଣ୍ଟିଅକ୍ସିଡାଣ୍ଟ ରହିଥାଏ, ଯାହା ସଂକ୍ରମଣ ଓ ରୋଗଠାରୁ ଦୂରେଇ ରଖେ । ଶରୀରରେ ରୋଗ ପ୍ରତିରୋଧକ ଶକ୍ତି ବଢାଇବା ସହ ଋତୁଜନିତ ସଂକ୍ରମଣଠାରୁ ଦୂରେଇ ରଖେ ।
ଓଜନ କମାଏ: ଗୁଡ଼ ଚା’ରେ କ୍ୟାଲୋରୀ କମ୍ ରହିଥାଏ । ସେହିପରି ଗୁଡ଼ରୁ ମିଳୁଥିବା ଶକ୍ତି ଶରୀରର ଓଜନକୁ ମଧ୍ୟ ନିୟନ୍ତ୍ରିତ କରିଥାଏ ।
ଚିନ୍ତା ଦୂରାଏ: ଗୁଡ଼ ଶରୀରରେ ସୋରୋଟୋନିନ୍ ଓ ଏଣ୍ଡୋଫିନ୍ ସ୍ତରକୁ ବଢାଇବା ସହ ମୁଡ଼କୁ ଭଲ କରିଥାଏ ।
