ଦଶମନ୍ତପୁର,୦୧/୦୬: କୋରାପୁଟ ଜିଲ୍ଲା ଦଶମନ୍ତପୁର ବ୍ଲକ ଅନ୍ତର୍ଗତ ପିଣ୍ଡା ପଦର ପଞ୍ଚାୟତ ଅଧିନ ନାରଗଛ ଗାଁରେ ପାନୀୟ ଜଳର ଉତ୍କଟ ସମସ୍ୟା ଦେଖା ଦେଇଛି । ନଳକୂଅରୁ ଠିକ୍ ଭାବେ ପାଣି ବାହାରୁ ନାହିଁ । ପାଇପ୍ ଯୋଗେ ବିଶୁଦ୍ଧ ପାନୀୟ ଜଳ ଆସୁନାହିଁ। କୌଣସି ବିକଳ୍ପ ନ ପାଇ ଗାଁ ନିକଟସ୍ଥ ମୁରାନ ନଦୀ କୂଳରେ ବାହାରୁ ଥିବା ଏକ ଦୂଷିତ ଚୁଆ ପାଣିରେ ଶୋଷ ମେଣ୍ଟାଇ ଆସୁଛନ୍ତି ଗ୍ରାମବାସୀ । ଏନେଇ ଗ୍ରାମବାସୀ ଅଭିଯୋଗ କରିଛନ୍ତି ।
ଦୂଷିତ ପାଣି ପିଇ ଗାଁ ଲୋକ ବିଭିନ୍ନ ରୋଗର ଶୀକାର ହେଉଥିବା, ଗାଁର କାର୍ତ୍ତିକ ଜାନୀ, ଚନ୍ଦ୍ର ଜାନୀ, ବୁଟୁ ଦିଶାରି, ଦର ଦିଶାରି, ଇଷ ଦିଶାରି, ୱାର୍ଡ ସଭ୍ୟ ଭୀମ ମୁଦୁଲି ପ୍ରମୁଖ ପ୍ରକାଶ କରିଛନ୍ତି । ସେମାନେ କହିଛନ୍ତି ଯେ, ତାଙ୍କ ଗାଁରେ ୬୫ ପରିବାର ଆଦିବାସୀ ସଂପ୍ରଦାୟର ଲୋକମାନେ ବସବାସ କରନ୍ତି । ଜୀବିକା କହିଲେ ପୋଡୁଚାଷ । ବିଶେଷ କରି ବିଶୁଦ୍ଧ ପାନୀୟ ଜଳ ସୁବିଧା ନ ଥିବାରୁ ଗ୍ରାମବାସୀ ନାହଁ ନଥିବା ଅସୁବିଧାର ସମ୍ମୁଖିନ ହେଉଥିବା କୁହାଯାଇଛି।
ସୂଚନା ମୁତାବକ, ଗତ ୩ ବର୍ଷ ତଳେ ଜଳ ଓ ପରିମଳ ମିଶନ ବିଭାଗ ପକ୍ଷରୁ, ଅଟକଳ ମୂଲ୍ୟ ୨୫ ଲକ୍ଷ ଟଙ୍କା ବ୍ୟୟରେ, ୨୦ ହଜାର ଲିଟର କ୍ଷମତା ବିଶିଷ୍ଟ ଏକ ଟାଙ୍କି ନିର୍ମାଣ କରାଯାଇଥିଲା। ଏହି ଟାଙ୍କିର ବିଶୁଦ୍ଧ ପାନୀୟ ଜଳକୁ ନାରଗଛ ଗ୍ରାମବାସୀଙ୍କୁ ପାଇପ୍ ଯୋଗେ ଯୋଗାଇ ଦେବାକୁ, ଗାଁ ଦାଣ୍ଡରେ ଷ୍ଟାଣ୍ଡ ପୋଷ୍ଟ ନିର୍ମାଣ କରାଯାଇଥିଲା। ନିର୍ମାଣ କରାଯିବା କିଛି ମାସ, ଭଲ ଭାବେ ପାଣି ମିଳିଲା। ତା ପର ଠାରୁ ପାଇପ୍ ଫାଟି ଯିବାରୁ ପାଣି ନଷ୍ଟ ହୋଇଯାଉଛି। ଏ ସମ୍ପର୍କରେ ବିଭାଗୀୟ କନିଷ୍ଠ ଯନ୍ତ୍ରୀକୁ ମରାମତି ପାଇଁ ବାରମ୍ବାର ଗୁହାରି କଲେ ମଧ୍ୟ କେହି କର୍ଣ୍ଣପାତ କରୁନାହାନ୍ତି । ଶେଷରେ ବାଧ୍ୟ ହୋଇ, ଦୂଷିତ ପାଣି ବ୍ୟବହାର କରୁଥିବାରୁ ଗ୍ରାମବାସୀ ସେମାନଙ୍କ ଦୁଃଖ ପ୍ରକାଶ କରିଛନ୍ତି । ପ୍ରଶାସନର ଅବହେଳା ଯୋଗୁଁ ଗ୍ରାମ ବିଶୁଦ୍ଧ ପାନୀୟ ଜଳରୁ ବଞ୍ଚିତ ହୋଇ ଆସୁଥିବା କୁହାଯାଇଛି ।
