ନୂଆଦିଲ୍ଲୀ ୦୨/୧୧: ଦୀପାବଳି ସନ୍ଧ୍ୟାରେ ଉତ୍ତରପ୍ରଦେଶର ହରଦୋଇ ଜିଲ୍ଲାରୁ ଏକ ଅଜବ ମାମଲା ସାମ୍ନାକୁ ଆସିଲା । ଜଣେ ବ୍ୟକ୍ତିଙ୍କର ଏମର୍ଜେନ୍ସି ଫୋନ୍ କଲ୍ ପାଇବା ପରେ ପୁଲିସ ଟିମ୍ ଘଟଣାସ୍ଥଳରେ ପହଞ୍ଚିଲା । ସ୍ଥାନୀୟ ବାସିନ୍ଦା ବିଜୟ ବର୍ମାଙ୍କ ସ୍ଥିତି ଭଲ ନ ଥିଲା । ତାଙ୍କୁ ଫୋନ୍ କଲ୍ ବିଷୟରେ ପଚାରିବାରୁ ଜଣାପଡ଼ିଲା, ବିଜୟ ମଦ୍ୟପାନ କରିଛନ୍ତି । ସେ ଏକ ଚୋରି ବିଷୟରେ ରିପୋର୍ଟ କରିଥିଲେ, ଯାହା ଶୁଣି ପୁଲିସ ମୁଣ୍ଡରେ ହାତ ଦେଲା । ତାଙ୍କ ଘରୁ ୨୫୦ ଗ୍ରାମ୍ ଚୋପାଛଡ଼ା ଆଳୁ ଚୋରି ହୋଇଥିବା ସେ ପୁଲିସକୁ ଅଭିଯୋଗ କଲେ । ସେତିକି ନୁହେଁ, ଆଳୁ ଚୋରି ମାମଲାର ଯାଞ୍ଚ୍ ହେଉ ବୋଲି ବିଜୟ ଜୋର ଦେଇ କହିଲେ ।
ଆହୁରି କହିଲେ, ମଦ୍ୟପାନ କରିବା ପରେ ଆଳୁକୁ ରୋଷେଇ କରି ଖାଇବେ ବୋଲି ସେ ଚିନ୍ତା କରିଥିଲେ । କିନ୍ତୁ ଘରକୁ ଫେରି ଦେଖିଲେ, ଆଳୁ ନାହିଁ । ପୁଲିସ ତାଙ୍କ କଥାବାର୍ତ୍ତାର ଭିଡିଓ ରେକର୍ଡ କଲା, ଯାହା ଏବେ ସୋସିଆଲ ମିଡିଆରେ ଭାଇରାଲ ହେଉଛି । ନିଜର ମଦ୍ୟପାନ ଅଭ୍ୟାସ ବିଷୟରେ ବିଜୟ ପୁଲିସକୁ କହିଲେ, ଆମେ କଠିନ ପରିଶ୍ରମ କରୁ ଏବଂ ସନ୍ଧ୍ୟାରେ ବେଳେବେଳେ ମଦ୍ୟପାନ କରିଥାଉ । କିନ୍ତୁ ପ୍ରଶ୍ନ ମଦକୁ ନେଇ ନୁହେଁ, ଆଳୁକୁ ନେଇ । ମୋ ହଜିଥିବା ଆଳୁ ଖୋଜନ୍ତୁ । ଘଟଣାଟି ଭରପୂର ହସର ଖୋରାକ ଯୋଗାଉଛି ।
