ଦୁବାଇ,୦୪/୦୩: ଚଳିତ ଚାମ୍ପିଅନ୍ସ ଟ୍ରଫିରେ ଭାରତ ଏକମାତ୍ର ଦଳ ଭାବେ ପାକିସ୍ତାନ ଯାତ୍ରା କରିନାହିଁ । ଭାରତୀୟ ଦଳର ସମସ୍ତ ମ୍ୟାଚ୍କୁ ଦୁବାଇରେ ଆୟୋଜନ କରାଯାଉଛି । ଅନ୍ୟ ସମସ୍ତ ଦଳ ମ୍ୟାଚ୍ ଖେଳିବା ପାଇଁ ଗୋଟିଏ ଭେନ୍ୟୁରୁ ଆଉ ଗୋଟିଏ ଭେନ୍ୟୁକୁ ଯାତ୍ରା କରୁଥିବାବେଳେ ଭାରତୀୟ ଦଳ ଦୁବାଇର ଏକ ହୋଟେଲରେ ଅବସ୍ଥାନ କରିବା ସହ ଅଭ୍ୟାସ କରୁଛି ଓ ମ୍ୟାଚ୍ ଖେଳୁଛି । ଟୁର୍ଣ୍ଣାମେଣ୍ଟରେ ଭାରତୀୟ ଦଳକୁ ଅଧିକ ସୁବିଧା ମିଳିଥିବା ଆପତ୍ତି ଉଠାଇବା ପରେ ଏହି ଘଟଣାକୁ ନେଇ ବେଶ୍ ଆଲୋଚନା ଚାଲିଥିଲା । ମାତ୍ର ରୋହିତ ଶର୍ମା ଆଜି ସମସ୍ତଙ୍କୁ ଚୁପ କରି ଦେଇଛନ୍ତି ।
ସୋମବାର ଅନୁଷ୍ଠିତ ସାମ୍ବାଦିକ ସମ୍ମିଳନୀ ଅବସରରେ ରୋହିତ କହିଛନ୍ତି, ଦୁବାଇ ଆମ ଘରୋଇ ଗ୍ରାଉଣ୍ଡ ନୁହେଁ । ଆମେ ଏଠାରେ ବେଶୀ ମ୍ୟାଚ୍ ଖେଳିନାହୁଁ । ତେଣୁ ଏଠାକାର ଜଳବାୟୁ,ପରିବେଶ ଓ ପିଚ୍ ସହ ଆମେ ପରିଚିତ ନୋହୁଁ । ଅନ୍ୟମାନଙ୍କ ଭଳି ଏଠାକାର ପିଚ୍ ମଧ୍ୟ ଆମ ପାଇଁ ନୂଆ । ଆମେ ଖେଳିଥିବା ୩ଟି ଯାକ ମ୍ୟାଚ୍ର ପିଚ୍ ଏକାଭଳି ରହିଥିଲେ ହେଁ ମ୍ୟାଚ୍ ସମୟ ଭିନ୍ନ ଭିନ୍ନ ଆଚରଣ କରିଥିଲା । ମଙ୍ଗଳବାର ଆମକୁ କେଉଁ ପିଚ ମିଳିବ, ତାହା ମଧ୍ୟ ଆମେ ଏପର୍ଯ୍ୟନ୍ତ ଯାଣି ନାହୁଁ । ଏଠାକାର ପିଚ୍ରେ ଖେଳିବା ସହଜ ନୁହେଁ । ପ୍ରତ୍ୟେକ ଦିନ ପିଚ୍ ରଙ୍ଗ ବଦଳାଉଛି କହିଲେ ଭୁଲ ହେବ ନାହିଁ । ନ୍ୟୁଜିଲାଣ୍ଡ ବିପକ୍ଷ ମ୍ୟାଚ୍ର ପିଚ୍ ପ୍ରାରମ୍ଭରୁ ପେସ୍ ବୋଲରଙ୍କୁ ସହାୟତା କରିଥିଲା। ସଂଧ୍ୟା ପରେ ତାପମାତ୍ର କମିଥିଲା ଓ ଥଣ୍ଡା ଅନୁଭୂତ ହୋଇଥିଲା । ଏଭଳି ସ୍ଥଳେ ଆମେ ଭାବିଥିଲୁ ପିଚ୍ରୁ ଆମ ପେସ୍ ବୋଲର ମଧ୍ୟ ଫାଇଦା ଉଠାଇବେ । ହେଲେ ସ୍ପିନରମାନଙ୍କୁ ପିଚ୍ ସହାୟତା କରିଥିଲା । ମଙ୍ଗଳବାର ପିଚ୍ କିଭଳି ଆଚରଣ କରିବ, ଏବେଠୁ କହିବା ମୁସ୍କିଲ। ହେଲେ ଆମେ ସବୁ ପରିସ୍ଥିତିରେ ଖେଳିବାକୁ ପ୍ରସ୍ତୁତ ରହିଛୁ ।
