ଭୁବନେଶ୍ୱର ୦୩/୧୦: ଆସୁଛନ୍ତି ଜଗତ୍ଜନନୀ । ସେଥିପାଇଁ ବିଭିନ୍ନ ଅନୁଷ୍ଠାନଠୁ ବଜାରପର୍ଯ୍ୟନ୍ତ ଚଳଚଞ୍ଚଳ । ଦୋକାନୀମାନେ ଦୋକାନରେ ସଜେଇସାରିଲେଣି ଭଳିକି ଭଳି ସାମଗ୍ରୀ । ଶାଢି, ପୋଷାକ, ଜୋତା, ଅଳଙ୍କାର, ଆସବାବପତ୍ର ଆଦି ଭଳିକି ଭଳି ସାମଗ୍ରୀରେ ବଜାର ପୁରା ସରଗରମ । ଗ୍ରାହକଙ୍କୁ ପୂଜା ବଜାରରେ ଆକର୍ଷିତ କରିବା ପାଇଁ ଦୋକାନୀମାନେ ମଧ୍ୟ ସ୍ୱତନ୍ତ୍ର ରିହାତି ବ୍ୟବସ୍ଥା କରିଛନ୍ତି । କିଏ ୨୦ ପ୍ରତିଶତ ରିହାତି ଦେଉଛନ୍ତି ତ କିଏ ୩୦ ପ୍ରତିଶତ । ଏ ଭିତରେ ମହିଳାମାନଙ୍କ ମନକୁ ଛୁଇଁବା ପାଇଁ ବଜାରକୁ ଆସିଛି ‘ନବଦୁର୍ଗା ଶାଢି’ । ଯେଉଁଥିରେ ମା’ଦୁର୍ଗାଙ୍କ ୯ଟି ରୂପ ଦେଖିବାକୁ ମିଳୁଛି ।
ସେଥିରେ ମା’ଶୈଳପୁତ୍ରୀ, ମା’ ବ୍ରହ୍ମଚାରିଣୀ, ମା’ ଚନ୍ଦ୍ରଘଣ୍ଟା, ମା’ସ୍କନ୍ଦମାତା, ମା’କାତ୍ୟାୟନୀ, ମା’ କାଳରାତ୍ରୀ, ମା’ ମହାଗୌରୀ, ମା’ ସିଦ୍ଧିଦାତ୍ରୀ ରୂପ ଶୋଭାପାଉଛି । ଶାଢ଼ିଟି ବୋମକାଇ ସିଲ୍କରେ ପଟ୍ଟଚିତ୍ର କାମ କରାଯାଇଛି । ଯାହାର ମୂଲ୍ୟ ୧୯ ହଜାର ଟଙ୍କା । ଏଥିସହିତ ମଣ୍ଡପରେ ମା’ ଦଶଭୁଜାଙ୍କ ଆବାହନ, ମା’ ଦୁର୍ଗାଙ୍କ ଆବିର୍ଭାବ ଭଳି ବିଭିନ୍ନ ପ୍ରସଙ୍ଗ ଆଧାରିତ ଶାଢି ରହିଛି । ପଟ୍ଟଚିତ୍ର କାମଗୁଡ଼ିକ କାଞ୍ଜିବରମ ସିଲ୍କ୍, ସମ୍ବଲପୁରୀ ସିଲ୍କ୍, ସମ୍ବଲପୁରୀ ପାଟ ଶାଢି, ବୋମ୍କାଇ ସିଲ୍କ ଭଳି ହସ୍ତତନ୍ତ ଶାଢିରେ ପ୍ରସ୍ତୁତ ହୋଇଛି । ଶାଢିର କପଡ଼ା ଓ କାମକୁ ନେଇ ଏହାର ମୂଲ୍ୟ ୧୫ ହଜାରରୁ ଆରମ୍ଭ ହୋଇ ୫୦ ହଜାର ପର୍ଯ୍ୟନ୍ତ ରହିଛି । କେବଳ ଶାଢ଼ି କାହିଁକି ପୋଷାକରେ ମତଧ୍ୟ ଦୁର୍ଗା ମା’ଙ୍କ ପ୍ରତିଛବି ରହିଛି । ଯାହାର ମୂଲ୍ୟ ୧ ହଜାର ଟଙ୍କାରୁ ୩ ହଜାର ଟଙ୍କା ପର୍ଯ୍ୟନ୍ତ ରହିଛି । ବିଶେଷକରି ଧଳା ଓ ଲାଲ ରଙ୍ଗ ମିଶା ଶାଢି ଅଧିକ ଖୋଜାପଡ଼ୁଛି ।
ସେହିପରି ଏମ୍ବ୍ରୋଡୋରୀ କାମ ହୋଇଥିବା ପାକିସ୍ତାନୀ ସୁଟ୍, କକ୍ଟେଲ୍ ଗାଉନ, କଟନ ନାଇରା ସୁଟ୍, ଚିକନ୍କରୀ ସୁଟ୍, ଏ ଲାଇନ କୁର୍ତ୍ତାକୁ ମଧ୍ୟ ମହିଳାମାନେ ବେଶ୍ ପସନ୍ଦ କରୁଛନ୍ତି । ଯାହା ୧ ହଜାର ଟଙ୍କାରୁ ୩ ହଜାର ଟଙ୍କାରେ ମିଳୁଛି । ଭି-କଟିଙ୍ଗ ସୁଟ୍ ପ୍ରତି ମହିଳାମାନେ ଅଧିକ ଆକର୍ଷିତ ହେଉଛନ୍ତି । ବିଗ୍ରେନ୍ ହସ୍ତତନ୍ତ ଦୋକାନ ସ୍ୱତ୍ତ୍ୱାଧିକାରୀ ନିବେଦିତା ରାୟଙ୍କ କହିବା କଥା, ବର୍ତ୍ତମାନ ଦୁର୍ଗା ପୂଜାକୁ ଲକ୍ଷ୍ୟ କରି ଆମେ ପ୍ରସଙ୍ଗ ଭିତ୍ତିକ ଶାଢିର ପସରା ଲଗାଇଛୁ । ମହିଳାମାନେ ମଧ୍ୟ ଏହି ଶାଢିକୁ ପସନ୍ଦ କରୁଛନ୍ତି । ଗ୍ରାହକମାନଙ୍କ ପାଇଁ ଏହି ପଟ୍ଟଚିତ୍ର ଶାଢିରେ ଆମେ ୨୫ ପ୍ରତିଶତ ରିହାତି ଦେବା ସହିତ ଅନ୍ୟାନ୍ୟ ହସ୍ତତନ୍ତ ଶାଢିରେ ୨୦ ପ୍ରତିଶତରୁ ୪୦ ପ୍ରତିଶତ ପର୍ଯ୍ୟନ୍ତ ରିହାତି ଦେଉଛୁ । ଗ୍ରାହକମାନେ କିସ୍ତି ଆକାରରେ ଟଙ୍କା ଦେବାର ବ୍ୟବସ୍ଥା ରଖିଛୁ । ଅନ୍ଲାଇନ କିଣାକିଣିରେ ମଧ୍ୟ ଉତ୍ସାହଜନକ ରିହାତି ରହିଛି । ପ୍ରାୟ ସବୁଥିରେ ମିଳୁଛି ଦମଦାର ଅଫର । ସେଥିପାଇଁ ଅନେକ ଘରେ ବସି ବେଶ୍ ଭଲ କିଣାକିଣି କରୁଛନ୍ତି। ଯେଉଁଥିରେ ୩୦ରୁ ୬୦ ପ୍ରତିଶତ ରିହାତି ମିଳିଯାଉଛି ।
