ବର୍ତ୍ତମାନ ସମୟରେ ହୃଦରୋଗ ସମସ୍ତଙ୍କ ପାଇଁ ଏକ ଚିନ୍ତାଜନକ ବିଷୟ । ହୃଦୟକୁ ସୁସ୍ଥ ରଖିବା ପାଇଁ ଅନେକ ଜିନିଷ ଆବଶ୍ୟକ, ଯେପରିକି ସୁସ୍ଥ ଖାଦ୍ୟ, ବ୍ୟାୟାମ, ପର୍ଯ୍ୟାପ୍ତ ନିଦ, ଚାପ ହ୍ରାସ କରିବା ଏବଂ ଧୂମପାନ, ମଦ୍ୟପାନରୁ ନକରିବା ଇତ୍ୟାଦି ।ବିଶେଷଜ୍ଞଙ୍କ ମତରେ, ହାଇ କୋଲେଷ୍ଟ୍ରଲ୍ ହୃଦଘାତ କିମ୍ବା ହାର୍ଟ ଷ୍ଟ୍ରୋକ ମଧ୍ୟ ସୃଷ୍ଟି କରିପାରେ । ତେଣୁ ନିୟମିତ ଭାବରେ ରକ୍ତଚାପ ଏବଂ କୋଲେଷ୍ଟ୍ରଲ୍ ଯାଞ୍ଚ କରିବା ଗୁରୁତ୍ୱପୂର୍ଣ୍ଣ । ଏହା ସହିତ ଆପଣଙ୍କ ଖାଦ୍ୟରେ ବାଦାମ ଭଳି ହୃଦୟ ପାଇଁ ଭଲ ଖାଦ୍ୟ ଅନ୍ତର୍ଭୁକ୍ତ କରିବା ଆବଶ୍ୟକ। କାରଣ ଏହା ସୁସ୍ଥ ଚର୍ବି, ଫାଇବର ଏବଂ ଆଣ୍ଟିଅକ୍ସିଡାଣ୍ଟରରେ ଭରପୁର ରହିଥାଏ। ତେବେ ଆସନ୍ତୁ ଜାଣିବା ଆଲମଣ୍ଡ ବାଦାମ ଖାଇବା ଦ୍ବାରା ଶରୀରକୁ କେତେ ଲାଭ ମିଳିଥାଏ। 

ସୁସ୍ଥ ଚର୍ବିରେ ଭରପୁର: ବାଦାମରେ ମନୋଅନସାଚୁରେଟେଡ୍ ଏବଂ ପଲିଅନସାଚୁରେଟେଡ୍ ଫ୍ୟାଟ୍ ଭରପୁର ଥାଏ। ଯାହା ହାର୍ଟ ପାଇଁ ଭଲ ବୋଲି ବିବେଚନା କରାଯାଏ । ଏହି ସୁସ୍ଥ ଚର୍ବି ଶରୀରରେ ଖରାପ କୋଲେଷ୍ଟ୍ରଲ  ହ୍ରାସ କରେ ଏବଂ ଭଲ କୋଲେଷ୍ଟ୍ରଲ ବୃଦ୍ଧି କରେ, ଯାହା ଫଳରେ ଧମନୀରେ ପ୍ଲକ୍ ଜମା ହେବାର ଆଶଙ୍କା ହ୍ରାସ ପାଏ ଏବଂ ହୃଦରୋଗର ସମ୍ଭାବନା ହ୍ରାସ ପାଏ ।

ଆଣ୍ଟିଅକ୍ସିଡାଣ୍ଟରେ ଭରପୁର: ବାଦାମରେ ଭିଟାମିନ-ଇ ଏବଂ ଅନ୍ୟାନ୍ୟ ଆଣ୍ଟିଅକ୍ସିଡାଣ୍ଟ ଥାଏ । ଯାହା ଶରୀରରେ ମୁକ୍ତ ରାଡିକାଲ୍ସ ସହିତ ଲଢ଼େ ଏବଂ ଅକ୍ସିଡେଟିଭ୍ ଚାପ ହ୍ରାସ କରେ । ଏହା ହାର୍ଟକୁ ସୁସ୍ଥ ରଖି ହୃଦୟ ଧମନୀକୁ ପ୍ରଦାହ ଏବଂ କ୍ଷତିରୁ ରକ୍ଷା କରେ ।

ଓଜନ ନିୟନ୍ତ୍ରଣରେ ସାହାଯ୍ୟ କରେ: ମେଦ ବହୁଳତା ହୃଦରୋଗର ଏକ ପ୍ରମୁଖ ବିପଦ କାରଣ । ବାଦାମରେ ଭରପୁର ପରିମାଣରେ ଫାଇବର ଏବଂ ପ୍ରୋଟିନ୍ ଥାଏ, ଯାହା ପେଟକୁ ଦୀର୍ଘ ସମୟ ପର୍ଯ୍ୟନ୍ତ ପୂର୍ଣ୍ଣ ରଖେ ଏବଂ ଅସ୍ୱାସ୍ଥ୍ୟ କର ଖାଦ୍ୟ ଅଭ୍ୟାସକୁ ହ୍ରାସ କରେ । ଏହା ଓଜନ ନିୟନ୍ତ୍ରଣରେ ରଖେ ଯାହା ହୃଦୟ ସ୍ୱାସ୍ଥ୍ୟ ପାଇଁ ଭଲ ।

ରକ୍ତରେ ଶର୍କରା ସ୍ତରକୁ ସନ୍ତୁଳିତ କରେ: ବାଦାମର ଗ୍ଲାଇସେମିକ୍ ଇଣ୍ଡେକ୍ସ କମ୍ ଥାଏ । ଯାହା ରକ୍ତରେ ଶର୍କରା ସ୍ତରକୁ ନିୟନ୍ତ୍ରଣ କରିବାରେ ସାହାଯ୍ୟ କରେ । ମଧୁମେହ ହୃଦରୋଗର ଆଶଙ୍କା ବଢ଼ାଇଥାଏ, ତେଣୁ ବାଦାମ ଖାଇବା ମଧୁମେହ ଏବଂ ହୃଦୟ ସ୍ୱାସ୍ଥ୍ୟ ଉଭୟ ପାଇଁ ଲାଭଦାୟକ ।

କୋଲେଷ୍ଟ୍ରଲ୍ ହ୍ରାସ : ବାଦାମର ନିୟମିତ ସେବନ LDL ସ୍ତରକୁ ହ୍ରାସ କରେ, ଯାହା ହୃଦରୋଗର ଏକ ପ୍ରମୁଖ କାରଣ । ପ୍ରତିଦିନ ମୁଠାଏ ବାଦାମ ଖାଇବା ଦ୍ୱାରା କୋଲେଷ୍ଟ୍ରଲ୍ ସ୍ତର ସନ୍ତୁଳିତ ରହିଥାଏ ।

ରକ୍ତଚାପ ନିୟନ୍ତ୍ରଣ କରେ: ବାଦାମରେ ମ୍ୟାଗ୍ନେସିୟମ୍ ଭରପୁର ମାତ୍ରାରେ ଥାଏ। ଯାହା ରକ୍ତଚାପ ନିୟନ୍ତ୍ରଣ କରିବାରେ ସାହାଯ୍ୟ କରେ । ଉଚ୍ଚ ରକ୍ତଚାପ ହୃଦରୋଗ ଏବଂ ଷ୍ଟ୍ରୋକର ଏକ ପ୍ରମୁଖ କାରଣ ।