ପୁରୀ,୨୫/୦୭: ସୁରକ୍ଷା ଓ ସଚେତନତାର ବାର୍ତ୍ତା ସହ ରାକ୍ଷୀପୂର୍ଣ୍ଣିମା ପାଳନ ହେବ । ରାକ୍ଷୀରେ ଦିନକୁ ଦିନ ପ୍ଲାଷ୍ଟିକ ଓ ଜରିର ବ୍ୟବହାର ବଢି ଚାଲିଛି । ଯାହା ଫଳରେ ଭଉଣୀର ସୁରକ୍ଷା କରୁକରୁ ମା’ ମାଟିର ଓ ପରିବେଶ ସୁରକ୍ଷା କଥା ଆମେ ଭୁଲିଯାଉଛୁ । ଏଣୁ ଏହାର ବିକଳ୍ପ ଚିନ୍ତା କରି ଗୋବରରେ ରାକ୍ଷୀ ପ୍ରସ୍ତୁତ କରିଛନ୍ତି ସନ୍ତୋଷ କୁମାର ରାଉତ । ଏହି ଗୋବର ରାକ୍ଷୀ ଦେଖିବାକୁ ଫ୍ୟାନ୍ସି ରାକ୍ଷୀଠାରୁ କୌଣସି ଗୁଣରେ କମ୍ ନୁହେଁ । ତେବେ ଏହା ମାଟିରେ ପଡ଼ିଲେ ପରିବେଶ ପାଇଁ କ୍ଷତି ହେବନି । ବରଂ ଏକ ଗଛ ଉଠିବ ।
ସନ୍ତୋଷ ଅନ୍ୱେଷଣ ଚାଟଶାଳୀର ଛାତ୍ରଛାତ୍ରୀଙ୍କ ସହଯୋଗରେ ଏହି ରାକ୍ଷୀ ସବୁ ପ୍ରସ୍ତୁତ କରିଛନ୍ତି । ଗୋବର ସହ ଗୋମୂତ୍ର, କ୍ଷୀର, ଦହି ଏବଂ ଘିଅ ଆଦିକୁ ମିଶ୍ରଣ କରି ଏହି ରାକ୍ଷୀ ପ୍ରସ୍ତୁତ ହୋଇଛି । ଗୋ ମାତାଠାରୁ ମିଳୁଥିବା ୫ ଉପାଦାନକୁ ନେଇ ଏହି ରାକ୍ଷୀ ପ୍ରସ୍ତୁତ ହୋଇଥିବାରୁ ଏହା ପଞ୍ଚଗବ୍ୟ ରାକ୍ଷୀ ଭାବେ ନାମିତ ହୋଇଛି । ସନ୍ତୋଷ ବିଭିନ୍ନ ଗୋଶାଳା ସହ ଜଡ଼ିତ ଥିବାରୁ ଏଠାରୁ ବାହାରୁଥିବା ବର୍ଜ୍ୟରୁ କିଛି ନୂଆ କରି ଦେଖାଇବାର ପ୍ରୟାସରେ ପଞ୍ଚଗବ୍ୟ ରାକ୍ଷୀକୁ ପରୀକ୍ଷାମୂଳକ ଭାବେ ପ୍ରସ୍ତୁତ କରିଥିଲେ । ଏହା ତାଙ୍କର ନିଜସ୍ୱ ଆବିଷ୍କାର । ୪ରୁ ୫ ବର୍ଷ ହେବ ସେ ଏହି ପଞ୍ଚଗବ୍ୟ ରାକ୍ଷୀ ପ୍ରସ୍ତୁତ କରୁଛନ୍ତି । ଏହି ପଞ୍ଚଗବ୍ୟ ରାକ୍ଷୀ ବଜାରରେ ମିଳୁଥିବା ଫ୍ୟାନ୍ସି ରାକ୍ଷୀଠାରୁ କୌଣସି ଗୁଣରେ କମ୍ ନୁହେଁ । ଏହା ଦେଖିବାକୁ ଫ୍ୟାନ୍ସି ରାକ୍ଷୀ ଭଳି ହୋଇଥିବା ବେଳେ ଏହାର ଦର ମଧ୍ୟ ପ୍ରାୟ ଫ୍ୟାନ୍ସି ରାକ୍ଷୀ ସହ ସମାନ ।
ପାଖାପାଖି ୩ରୁ ୪ ମାସ ପୂର୍ବରୁ ରାକ୍ଷୀ ପ୍ରସ୍ତୁତ ଆରମ୍ଭ ହୋଇଯାଇଥିଲା । ପଞ୍ଚଗବ୍ୟରେ ମୁଲତାନି ମାଟି ମିଶାଇ ପ୍ରସ୍ତୁତ ହୋଇଥିବା ସମ୍ମିଶ୍ରଣକୁ ବିଭିନ୍ନ କଳାକୃତି, ଫୁଲ, ପତ୍ର, ପ୍ରଜାପତି, ଜଗନ୍ନାଥ ଭଳି ବିଭିନ୍ନ ଆକାର ଦିଆଯାଇଥାଏ । ଏହି ସମ୍ମିଶ୍ରଣରେ ବିଭିନ୍ନ ଗଛର ମଞ୍ଜି ମଧ୍ୟ ମିଶିଛି । ଫଳରେ ଏଥିରୁ ଗଛ ଉଠିପାରିବ । ସନ୍ତୋଷଙ୍କ କହିବା ମୁତାବକ, ଏହି ରାକ୍ଷୀ ଗାଈର ପାଞ୍ଚଟି ତତ୍ତ୍ୱକୁ ନେଇ ପ୍ରସ୍ତୁତ ହୋଇଥିବାରୁ ଧାର୍ମିକ ଦୃଷ୍ଟିକୋଣରୁ ମଧ୍ୟ ପବିତ୍ର ।
