କଟକ,୨୪/୦୩: ଶେଷ ହେବାକୁ ବସିଛି ରମ୍ଜାନ୍ ମାସ । ସପ୍ତାହକ ପରେ ପାଳନ କରାଯିବ ପବିତ୍ର ଇଦ୍ ଉଲ୍ ଫିତର୍(ଇଦ୍) । ମୁସଲମାନ ସମ୍ପ୍ରଦାୟର ବଡ଼ ପର୍ବ ଏହି ଇଦ୍ ପାଳନ କରିବାକୁ ଏବେଠୁ ଆରମ୍ଭ ହୋଇଗଲାଣି ପ୍ରସ୍ତୁତି । ବିଶେଷକରି କଟକରେ ଇଦ୍ର ବଜାର ଜମି ଆସିଲାଣି । ପୋଷାକ ସୋ’ରୁମ୍ରେ ଆକର୍ଷଣୀୟ ଅଫର୍ ଲାଗିଥିଲା ବେଳେ ଟେଲର୍ ଦୋକାନରେ ମାଳ ମାଳ ଅର୍ଡର । ଏଭଳି ସ୍ଥିତିରେ ଚଳିତ ବର୍ଷ ଇଦ୍ ବଜାରରେ ଟ୍ରେଣ୍ଡିଂରେ ରହିଛି ବଲିଉଡ୍ ଫିଲ୍ମ ‘ସିକନ୍ଦର୍’ କୁର୍ତ୍ତା । ଏଥିରେ ଅଭିନେତା ସଲ୍ମାନ୍ ଖାଁ ପିନ୍ଧିଥିବା ପାର୍ସି ଡିଜାଇନ୍ର କୁର୍ତ୍ତାକୁ ବେଶ୍ ପସନ୍ଦ କରୁଛନ୍ତି ଯୁବ ପିଢ଼ି । ସେହିଭଳି ଝିଅଙ୍କ ପାଇଁ ପାକିସ୍ତାନୀ ଓ ପଠାନି ସୁଟ୍ ବେଶ୍ ଲୋକପ୍ରିୟ ହୋଇଛି ।
ମୁସଲିମ୍ ସମ୍ପ୍ରଦାୟର ଏକ ପ୍ରମୁଖ ପର୍ବ ହେଉଛି ଇଦ୍ । ଏହାକୁ ବେଶ୍ ଧୁମ୍ଧାମ୍ରେ ପାଳନ କରାଯାଇଥାଏ । ଏଥିପାଇଁ କଟକ ସହରକୁ ସାଜସଜ୍ଜା କରାଯାଇଥାଏ । ଗଳିକନ୍ଦିରେ ଭାଇଚାରାର ସହରରେ ସମସ୍ତେ ଏକତ୍ରିତ ହୋଇ ଏହାକୁ ପାଳିଥାନ୍ତି । ତେବେ ଚଳିତ ବର୍ଷ ଏବେ ରମ୍ଜାନ୍ ମାସ ଚାଲିଛି । ଯେଉଁଥିରେ ଲୋକେ ଦିନ ତମାମ ଉପବାସ ରଖି ପ୍ରାର୍ଥନା କରୁଛନ୍ତି । ଏହା ଧାର୍ମିକ ମାସ ହୋଇ ଥିବାରୁ ମୁସଲିମ୍ ସମ୍ପ୍ରଦାୟର ଲୋକମାନେ ଅଧିକ ସମୟ ପ୍ରାର୍ଥନାରେ ଅତିବାହିତ କରୁଛନ୍ତି । ତେବେ ରମ୍ଜାନ ମାସ ଶେଷ ହେବା ପରେ ଇଦ୍ ପାଳନ କରିବାକୁ ସମସ୍ତଙ୍କ ମଧ୍ୟରେ ଭରପୂର ଉତ୍ସାହ। ତେଣୁ ନୂଆ ପୋଷାକ କିଣାକିଣି କରିବାକୁ ସକାଳୁ ରାତି ପର୍ଯ୍ୟନ୍ତ କଟକ ବଜାରରେ ଭିଡ଼ ଦେଖିବାକୁ ମିଳୁଛି ।
ଏଥିପାଇଁ ବକ୍ସିବଜାର, ଦରଘାବଜାର ସମେତ ଆଦି ସ୍ଥାନରେ ଥିବା ଦୋକାନରେ ଇଦ୍ ସ୍ପେସାଲ୍ ଅଫର୍ ଲାଗିଛି । ତାହାବାଦ୍ ପୁଅଙ୍କ ମଧ୍ୟରେ ବଲିଉଡ୍ ଫିଲ୍ମର ସ୍ୱତନ୍ତ୍ର କୁର୍ତ୍ତା ଟ୍ରେଣ୍ଡିଂରେ ଥିବାରୁ ବିକ୍ରି ହେଉଛି । ଏହାର ମୂଲ୍ୟ ୧୨ ଶହ ଟଙ୍କାରୁ ଆରମ୍ଭ ହୋଇ ୧୮ଶହ ପର୍ଯ୍ୟନ୍ତ ରହିଛି । ତାହାବାଦ୍ ସହରରେ ଥିବା ଅଧିକାଂଶ ଟେଲର୍ ଦୋକାନରେ ଏବେ କୁର୍ତ୍ତା ପାଇଜାମା ତିଆରି କରିବାକୁ ଢେର ଅର୍ଡର ରହିଥିବାରୁ ଏବେ ଆଉ ନୂଆ ଅର୍ଡର ରଖିବାକୁ ମଙ୍ଗୁନାହାନ୍ତି । ଇଦ୍ ବଜାରରେ ଭଲ ବ୍ୟବସାୟ କରିବାକୁ ବ୍ୟବସାୟୀମାନେ ଆଶା କରିଛନ୍ତି ।
