ଦଶରଥପୁର, ୦୩/୦୭: ଯାଜପୁର ଜିଲ୍ଲା ଦଶରଥପୁର ବ୍ଲକ ତଳିହା ପଞ୍ଚାୟତ ସୁନ୍ଦରାଇମୁହଁ ବୈତରଣୀ ନଦୀ ଘାଟକୁ ଗତ ବୁଧବାର ସକାଳେ ଗାଧୋଇବାକୁ ଯାଇ ନିଖୋଜ ହୋଇଥିଲେ ବୃଦ୍ଧ । ତାଙ୍କୁ ମୃତ ଅବସ୍ଥାରେ ସ୍ଥାନୀୟ ମତ୍ସ୍ୟଜୀବୀଙ୍କ ଜାଲରୁ ଉଦ୍ଧାର କରାଯାଇଛି। ମୃତକ ହେଉଛନ୍ତି ବିରଜାପୁର ପଞ୍ଚାୟତ ବାମଦେବପୁର ମଝିସାହି ଅଞ୍ଚଳର ବିଦ୍ୟାଧର ଦାସ ଓରଫ ଫୁକୁନା ।
ସୂଚନା ମୁତାବକ, ବିଦ୍ୟାଧର ସବୁଦିନ ଭଳି ଗତ ବୁଧବାର ସକାଳୁ ସୁନ୍ଦରାଇମୁହଁ ବୈତରଣୀ ନଦୀ ଘାଟକୁ ଗାଧୋଇବାକୁ ଯାଇ ନିଖୋଜ ଥିଲେ। ଖବର ପାଇ ଯାଜପୁର ଅଗ୍ନିଶମ ବାହିନୀ ପହଞ୍ଚି ବିଦ୍ୟାଧରଙ୍କୁ ଉଦ୍ଧାର କରିବାକୁ ନାକେଦମ ହୋଇଥିଲେ । ହେଲେ ସନ୍ଧ୍ୟା ପର୍ଯ୍ୟନ୍ତ ତାଙ୍କର କୌଣସି ପତ୍ତା ମିଳି ନଥିଲା । ତେବେ ଆଜି ସକାଳେ ଓଡ୍ରାଫ ଟିମ ପହଞ୍ଚି ତାଙ୍କୁ ଠାବ କରିବାକୁ ପ୍ରସ୍ତୁତି କରୁଥିବା ବେଳେ ନଦୀରୁ ମାଛ ଧରୁଥିବା ସ୍ଥାନୀୟ ମତ୍ସ୍ୟଜୀବୀଙ୍କ ଜାଲରେ ବିଦ୍ୟାଧରଙ୍କ ମୃତଦେହ ଲାଗିଥିଲା । ମୃତଦେହ ଉଦ୍ଧାର ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଥିଲା। ମୃତ ବିଦ୍ୟାଧର ସ୍ଥାନୀୟ ଅଞ୍ଚଳରେ ଜଣେ ସମାଜସେବୀ ରୂପେ ପରିଚିତ ଥିବା ବେଳେ ତାଙ୍କ ମୃତ୍ୟୁରେ ସୁନ୍ଦରାଇମୁହଁ ବଜାର ଆଜି ବନ୍ଦ ରହିଥିଲା।
