ପାଟନା: ଭାରତୀୟ ନିର୍ବାଚନ ଆୟୋଗ ବିହାରର ଭୋଟର ତାଲିକାରୁ ଆଉ ୩ ଲକ୍ଷ ନାମ ହଟାଇବାକୁ ପ୍ରସ୍ତୁତି କରୁଥିବା ନେଇ ଶୁକ୍ରବାର ସୂଚନା ମିଳିଛି। ଏହି ପ୍ରକ୍ରିୟା ସ୍ପେଶାଲ ଇଣ୍ଟେନ୍ସିଭ୍ ରିଭିଜନ(SIR)ର ଅଂଶ ଭାବେ ପରିଗଣିତ ହେବ। ଯେଉଁଥିରେ ଭୋଟରମାନେ ନାମ ଯୋଗ କିମ୍ବା ସଂଶୋଧନ ପାଇଁ ଦାବି ଓ ଆପତ୍ତି ଦାଖଲ କରିପାରନ୍ତି। ଏହା ଆଉ ଦୁଇ ଦିନ ମଧ୍ୟରେ ଶେଷ ହେବ।

ଅଧିକାରୀଙ୍କ କହିବା ଅନୁସାରେ, ଯେଉଁମାନେ ନୋଟିସ ସତ୍ତ୍ୱେ ପରିଚୟ ପତ୍ର ଜମା କରିନାହାଁନ୍ତି, ସେମାନଙ୍କ ନାମ ହଟାଯାଉଛି। ଅଗଷ୍ଟ ୧ରେ ପ୍ରକାଶିତ ଡ୍ରାଫ୍ଟ ତାଲିକା ଅନୁଯାୟୀ, ପୂର୍ବରୁ ୬୫ ଲକ୍ଷ ନାମ ହଟାଯାଇଛି। ନୂଆ ହଟାଯାଇଥିବା ନାମଗୁଡ଼ିକ ମୁଖ୍ୟତଃ ସିମାଞ୍ଚଳର ପୁର୍ଣ୍ଣିଆ, ଅରାରିଆ, କିଶନଗଞ୍ଜ, ସୁପୌଲ ଓ କଟିହାର ଜିଲ୍ଲାରୁ ରହିଛି। 

ଆୟୋଗ ଶୀଘ୍ର ଏନେଇ ଏକ ବିସ୍ତୃତ ତାଲିକା ପ୍ରକାଶ କରିବ। ଯାହା ଭୋଟରମାନଙ୍କୁ ନିଜ ଦାବି ଉପସ୍ଥାପନ କରିବାର ଶେଷ ସୁଯୋଗ ଦେବ। ଏହା ନିର୍ବାଚନରେ ସ୍ୱଚ୍ଛତା ଓ ନିର୍ଭୁଲତା ବଜାୟ ରଖିବାକୁ ଲକ୍ଷ୍ୟ ରଖିଛି।

ତଥ୍ୟ ମୁତାବକ, ଅଗଷ୍ଟ ମାସ ୧ ତାରିଖରୁ ୨୯ ତାରିଖ ମଧ୍ୟରେ ବିହାରର ବିଭିନ୍ନ ରାଜନୌତିକ ଦଳ ପକ୍ଷରୁ ମୋଟ୍ ୧୧୭ଟି ଦାବି ଉପସ୍ଥାପନ କରାଯାଇଛି। ଏହା ମଧ୍ୟକୁ ଆରଜେଡି ପକ୍ଷରୁ ମୋଟ୍ ୯ଟି ଦାବି ଉପସ୍ଥାପନ କରାଯାଇଥିବା ବେଳେ ସିପିଆଇ-ଏମଏଲ ପକ୍ଷରୁ ୧୦୮ଟି ଦାବି ଉପସ୍ଥାପନ କରାଯାଇଛି। ଏହା ବାଦେ ବିହାରର ବିଭିନ୍ନ ଅଞ୍ଚଳରୁ ମୋଟ୍ ୨,୧୧,୬୫୦ ଜଣ ଲୋକ ନିଜ ନାମ ଭୋଟର ଲିଷ୍ଟରେ ନଥିବା ନେଇ ଅଭିଯୋଗ ଆଣିଛନ୍ତି। 

ସମାନ ଢଙ୍ଗରେ ଇସି ମୋଟ୍ ୧୧.୩୬ ଲକ୍ଷରୁ ଅଧିକ ଫର୍ମ ନମ୍ୱର ୬ ହାସଲ କରିଛନ୍ତି। ଯେଉଁଥିରୁ ୪୮ ହଜାର ୭୯୭ ଜଣ ଲୋକଙ୍କ ନାମ ବାଦ ଦିଆଯାଇ ଅନ୍ୟ ସମସ୍ତଙ୍କ ନାମରେ ନୂଆ ଭୋଟର କାର୍ଡ ଇସ୍ୟୁ କରାଯିବ ବୋଲି ସୂଚନା ମିଳିଛି।