ଘଟଗାଁ, ୨୦/୦୯: ଶନିବାର ସକାଳୁ କେନ୍ଦୁଝର ଜିଲ୍ଲା ଦୈତାରୀ ବନାଞ୍ଚଳ ବ୍ରାହ୍ମଣୀପାଳ ବଜାର ଭିତରକୁ ଏକ ହାତୀ ପଶି ଆସିଥିଲା। ବଜାରରେ କିଛି ସମୟ ବୁଲିବା ପରେ ବନ କର୍ମଚାରୀ ହାତୀଟିକୁ ଜଙ୍ଗଲକୁ ଘଉଡ଼ାଇ ଦେଇଥିଲେ।
ସୂଚନା ମୁତାବକ, ହାତୀଟି ପ୍ରଥମେ ଟାଟା ଫେରୋକ୍ରୋମ କଲୋନୀ ଗେଟ ଭାଙ୍ଗି କଲୋନୀ ମଧ୍ୟରେ ପ୍ରବେଶ କରିଥିଲା । ଏହା ଦେଖି ସ୍ଥାନୀୟଲୋକେ ହାତୀକୁ ଘଉଡ଼ାଇବାକୁ ଚେଷ୍ଟା କରିଥିଲେ । ଘଉଡ଼ାଇବାରୁ ହାତୀଟି ବଜାର ଭିତରକୁ ପଶି ଆସି କିଛି ସମୟ ବୁଲିଥିଲା । ଏସମ୍ପର୍କରେ ଖବର ପାଇ ବନ କର୍ମଚାରୀ ହାତୀ ଓ ସାଧାରଣ ଲୋକଙ୍କ ସୁରକ୍ଷା ପ୍ରତି ଧ୍ୟାନ ରଖିଥିଲେ । କିଛି ସମୟ ମଧ୍ୟରେ ହାତୀଟିକୁ ବଜାର ଅଞ୍ଚଳରୁ ଘଉଡ଼ାଇ ଦେଇଥିଲେ । ବନ କର୍ମଚାରୀ ହାତୀଟିକୁ କୁଶେଇ ନଦୀ ପାରି କରି ଜଙ୍ଗଲକୁ ଘଉଡ଼ାଇ ଦେଇଥିବା ଜଣାପଡିଛି ।
