ଭୁବନେଶ୍ୱର,୧୬/୧୧: ରାଜ୍ୟରେ ପୁଣିଥରେ ଚାଲିଛି ହାତୀ ଗଣନା । ପୂର୍ଣ୍ଣମୀ ପକ୍ଷ ଥିବାରୁ ଗୁରୁବାର ଠାରୁ ତିନି ଦିନିଆ ହାତୀ ଗଣନା କରାଯାଉଛି । ରାଜ୍ୟର ୫୧ଟି ଡିଭିଜନରୁ ୪୮ଟି ଡିଭିଜନରେ ହାତୀ ଗଣନା ଚାଲିଛି । ୪୮ଟି ଡିଭିଜନର ଜଙ୍ଗଲରେ ୧୩୭୦ଟି ମଞ୍ଚାରେ ସମୁଦାୟ ୫୭୦୦ ବନ କର୍ମଚାରୀ ନିୟୋଜିତ ହୋଇଛନ୍ତି । ଗତ ହାତୀ ଗଣନାରେ ରାଜ୍ୟରେ ୨୦୯୮ ହାତୀ ଥିଲେ । ତେବେ ଶୀତଦିନେ ଖାଦ୍ୟ ଅନ୍ୱେଷଣରେ ସୀମାବର୍ତ୍ତୀ ରାଜ୍ୟ ଝାଡ଼ଖଣ୍ଡ, ଛତିଶଗଡ଼ ଓ ପଶ୍ଚିମବଙ୍ଗ ଜଙ୍ଗଲରୁ ହାତୀମାନେ ଓଡି଼ଶାକୁ ପଶି ଆସୁଛନ୍ତି । ତେଣୁ ଏହି ଗଣନାରେ ରାଜ୍ୟରେ ଏବେ କେତେ ହାତୀ ଅଛନ୍ତି, ତାହା ସ୍ପଷ୍ଟ ଜଣା ପଡ଼ିଯିବ ବୋଲି ପିସିସିଏଫ୍ ସୁଶାନ୍ତ ନନ୍ଦ ସୂଚନା ଦେଇଛନ୍ତି ।
ଗତ ମାର୍ଚ୍ଚମାସ ଗଣନାରେ ରାଜ୍ୟରେ ସମୁଦାୟ ୨୦୯୮ ହାତୀ ଥିବା ଜଣାପଡ଼ିଥିଲା । ସେମାନଙ୍କ ମଧ୍ୟରେ ମୋଟ ୩୧୩ ପ୍ରାପ୍ତବୟସ୍କ ଦନ୍ତା, ୧୩ଟି ପ୍ରାପ୍ତ ବୟସ୍କ ମାଖ୍ନା ହାତୀ, ୭୪୮ ପ୍ରାପ୍ତବୟସ୍କ ମାଈ ହାତୀ, ୧୪୮ଟି ଯୁବ ଅଣ୍ଡିରା ହାତୀ ଓ ୨୮୨ଟି ଯୁବ ମାଈ ହାତୀ ଥିବା ବେଳେ ୨୦୯ଟି ଛୁଆ ହାତୀ ଠାବ କରା ଯାଇଥିଲା । ସେହିପରି ୩୮୫ଟି ଶାବକଙ୍କୁ ମଧ୍ୟ ହାତୀ ଗଣନାରେ ଠାବ କରାଯାଇଥିଲା ।
ରାଜ୍ୟରେ ୩୮ଟି ବନଖଣ୍ଡରେ ହାତୀଙ୍କ ଉପସ୍ଥିତି ଜଣା ପଡ଼ିଥିଲା । ୧୩ ବନଖଣ୍ଡ ସଂପୂର୍ଣ୍ଣ ହାତୀଶୂନ୍ୟ ଥିଲା । ଅନୁଗୋଳ, ଆଠଗଡ଼, ଢ଼େଙ୍କାନାଳ, ବାରିପଦା, ଚନ୍ଦକା, ଖୋର୍ଦ୍ଧା ଓ କେନ୍ଦୁଝରରେ ହାତୀ ସଂଖ୍ୟା ଅପ୍ରତ୍ୟାଶିତ ଭାବେ ବଢ଼ିଥିବା ଜଣା ପଡ଼ିଥିଲା । କିନ୍ତୁ ଶିମିଳିପାଳ, ବାଲେଶ୍ୱର, ରାଇରଙ୍ଗପୁର, ବଲାଙ୍ଗୀର ଓ ପାରଳାଖେମୁଣ୍ଡିରେ ପୂର୍ବ ଅପେକ୍ଷା ହାତୀ କମିଥିଲେ । ଅନୁଗୁଳ ସର୍କଲରେ ସର୍ବାଧିକ ୭୭୯ଟି ହାତୀଙ୍କୁ ଚିହ୍ନଟ କରା ଯାଇଥିବାବେଳେ ଏହି ସର୍କଲ ଅଧୀନସ୍ଥ କେବଳ ଢ଼େଙ୍କାନାଳ ବନଖଣ୍ଡରେ ୨୩୯ ହାତୀ ଥିଲେ । ଆଠଗଡ଼ରେ ୧୭୮ଟି, ସାତକୋଶିଆରେ ୧୩୮ଟି, ଅନୁଗୋଳ ବନଖଣ୍ଡରେ ୧୧୯ଟି ହାତୀ ଚଳପ୍ରଚଳ କରୁଥିଲେ । ସର୍କଲ ତାଲିକା ଅନୁସାରେ ଦ୍ୱିତୀୟ ସର୍ବାଧିକ ୪୩୧ଟି ହାତୀ ବାରିପଦାରୁ ଠାବ ହୋଇଥିଲେ । ସେଠାକାର ବାରିପଦା ବନଖଣ୍ଡରେ ୧୦୫, ଉତ୍ତର ଶିମିଳିପାଳରେ ୧୦୩ ଓ ଦକ୍ଷିଣ ଶିମିଳିପାଳରେ ୧୦୧ ହାତୀଙ୍କ ଚଳପ୍ରଚଳ ରହିଥିବା ଜଣା ପଡ଼ିଥିଲା । ଏଥର ହାତୀ ଗଣନାରେ ଡ୍ରୋନ କ୍ୟାମେରା ବ୍ୟବହାର କରାଯାଉଛି । ଶନିବାର ଗଣନା ସରିବାକୁ ଥିବା ବେଳେ ରିପୋର୍ଟ ମାସ ଶେଷସୁଦ୍ଧା ପ୍ରକାଶ ପାଇବ ବୋଲି ପିସିସିଏଫ୍ ଶ୍ରୀ ନନ୍ଦ କହିଛନ୍ତି।
