ରିଆମାଳ, ୧୮/୦୨ : ବିପଦରେ ଗଜରାଜ। ବିଦ୍ୟୁତ୍ ତାର ସଂସ୍ପର୍ଶରେ ଆସି ଦନ୍ତା ହାତୀ ମୃତ। ରିଆମାଳ ରେଞ୍ଜ କୁଣ୍ଢେଇଗୋଳା ସେକ୍ସନ ଅନ୍ତର୍ଗତ ଗରିଆପାଲିରୁ ଏକ ଦନ୍ତା ହାତୀର ମୃତଦେହ ଉଦ୍ଧାର ହୋଇଛି।
ସୂଚନା ଅନୁସାରେ, ସୋମବାର ରାତିରେ ହାତୀଟି ଦେଝରଣ ଅଞ୍ଚଳରୁ ଗରିଆପାଲିକୁ ଆସିଥିଲା। ମଙ୍ଗଳବାର ସକାଳୁ ସ୍ଥାନୀୟ ଲୋକେ ହାତୀର ମୃତଦେହ ପଡିଥିବା ଦେଖି ବନ ବିଭାଗକୁ ଖବର ଦେଇଥିଲେ। ଘଟଣା ବିଷୟରେ ଜାଣି ରେଞ୍ଜର ନିରଞ୍ଜନ ଧରୁଆ ଓ ସ୍ଥାନୀୟ ଫରେଷ୍ଟର ତପନ ନାୟକ ଘଟଣା ସ୍ଥଳରେ ପହଁଚି ତଦନ୍ତ ଆରମ୍ଭ କରିଛନ୍ତି। ମୃତ ହାତୀର ପାଞ୍ଚ ଫୁଟ ଦୂରରେ ଶିକାର ଉଦ୍ଦେଶ୍ୟରେ ବୋତଲ ଓ ବାଉଁଶ ଷ୍ଟିକରେ ତାର ଲଗାଯାଇ ରଖା ଯାଇଛି ଏବଂ ମୁଖ୍ୟ ଲାଇନ୍ ଠାରୁ ୩୦୦ ମିଟର ଦୂରରେ ହାତୀଟି ମରିଥିବା ଦେଖିବାକୁ ମିଳିଛି। ହାତୀର ମୁହଁରେ ଏକ ଘା ରହିଛି। ବ୍ୟବଚ୍ଛେଦ ପରେ ହାତୀ ମୃତ୍ୟୁର କାରଣ ସ୍ପଷ୍ଟ ହେବ ବୋଲି କୁହାଯାଉଛି। ସ୍ଥାନୀୟ ଲୋକଙ୍କ କହିବା ଅନୁସାରେ ବନ୍ୟଜନ୍ତୁ ଶିକାର ଉଦ୍ଦେଶ୍ୟରେ ବ୍ୟବହୃତ ତାରରେ ଲାଗି ହାତୀର ମୃତ୍ୟୁ ହୋଇଛି।
ଏହି ଖବରଟିକୁ ପଢନ୍ତୁ-ଓଲଟିଲା ମଦ ବୋଝେଇ ଟ୍ରକ୍ : ହେଲପର୍ ମୃତ, ଡ୍ରାଇଭର ଆହତ
