କଟକ, ୦୪/୦୩ : କଟକ ଜିଲ୍ଲା ନରସିଂହପୁର ଅଞ୍ଚଳରେ ହାତୀ ଉପଦ୍ରବ। ଖାଦ୍ୟ ଅନ୍ଵେଷଣରେ ଜଙ୍ଗଲ ଛାଡ଼ି ଗାଁ ମୁହାଁ ହେଉଛନ୍ତି ହାତୀପଲ। ଉଜାଡ଼ୁଛନ୍ତି ଫସଲ। ସେପଟେ ଚାଷ ନଷ୍ଟ ଯୋଗୁଁ ଚିନ୍ତାରେ ଚାଷୀକୂଳ। ଥମୁନି ହାତୀ-ମଣିଷଙ୍କ ଭିତରେ ଲଢେଇ। ନରସିଂହପୁର ପାର୍ବତୀପୁର ଶାସନ ଗ୍ରାମରେ ପଶି ୧୨ରୁ ଶହରୁ ଉର୍ଦ୍ଧ୍ଵ କଦଳୀ ଗଛ ନଷ୍ଟ କଲେ ହାତୀପଲ।
ସୂଚନାନୁଯାୟୀ, ନରସିଂହପୁର ପାର୍ବତୀପୁର ଶାସନ ଗ୍ରାମର ବିଜୟାନନ୍ଦ ଦାଶ ଜନନ୍ତାରିଆ ନିକଟରେ ଲକ୍ଷାଧିକ ଟଙ୍କା ଖର୍ଚ୍ଚ କରି ୨ ଏକର ଜମିରେ ପ୍ରାୟ ୧୩ ଶହ ରୁ ୧୬ଶହ ଦେଶୀ କଦଳୀ ଗଛ ଲଗାଇ ଚାଷ କରୁଥିଲେ। ଏହି କଦଳୀ ବଗିଚାରେ ପ୍ରାୟ ୮ ଶହରୁ ଅଧିକ ଗଛରେ କଦଳୀ କାନ୍ଧି ଆସିଥିଲା। ହେଲେ ହାତୀପଲ ଦାଉ ସାଧିଲେ। କିଛି ଦିନ ହେବ ଏକ ହାତୀ ପଲ ନିୟମିତ ଟ୍ରେଞ୍ଜ୍ ଅତିକ୍ରମ କରି କଦଳୀ ବଗିଚାରେ ପଶି କଦଳୀ ଗଛ ଭାଙ୍ଗି ଖାଇଯାଉଛନ୍ତି। ଏହି ହାତୀପଲରେ ପ୍ରାୟ ୮ଟି ହାତୀ ଅଛନ୍ତି।
ବାରମ୍ବାର ଅଭିଯୋଗ ପରେ ମଧ୍ୟ ବନ ବିଭାଗ ପକ୍ଷରୁ ଆବଶ୍ୟକୀୟ ପଦକ୍ଷେପ ନିଆଯାଉନାହିଁ। ଚାଷୀଙ୍କୁ ଉପଯୁକ୍ତ କ୍ଷତିପୂରଣ ମଧ୍ୟ ମିଳୁନି। ଫଳରେ ବାଧ୍ୟହୋଇ ଚାଷୀ ଚାଷ ଛାଡ଼ୁଛନ୍ତି। ଯାହାକୁ ନେଇ ଚାଷୀ ମହଲରେ ଅସନ୍ତୋଷ ପ୍ରକାଶ ପାଇଛି। ସଂରକ୍ଷିତ ଜଙ୍ଗଲରେ ବ୍ୟାପକ ପରିମାଣର ହାତୀ ଖାଦ୍ୟ ଜଙ୍ଗଲ ସୃଷ୍ଟି କରିବା ସହ ହାତୀମାନେ କିପରି ଗାଁ ମୁଁହା ନହେବେ ସେଥିପାଇଁ ପଦକ୍ଷେପ ଗ୍ରହଣ କରିବାକୁ ଦାବି ହୋଇଛି। ଏହା ସହ କ୍ଷତିଗ୍ରସ୍ତ ଚାଷୀଙ୍କୁ ଆବଶ୍ୟକୀୟ କ୍ଷତିପୂରଣ ଯୋଗାଇ ଦେବାକୁ ଦାବି ହେଉଛି।
ଏହି ଖବରଟିକୁ ପଢନ୍ତୁ-ରକ୍ତରେ ଭିଜିଲା ରକ୍ତ ସମ୍ପର୍କ, ବାପାକୁ ହତ୍ୟା କରି ମୁଣ୍ଡ କାଟି ନେଲା ପୁଅ
