ଭୁବନେଶ୍ୱର,୧୩/୦୩: ରାଜଧାନୀ ଭୁବନେଶ୍ୱରର ଚେହେରା ବଦଳିବ । ରାଜଧାନୀରେ ଭିଡ଼ କମାଇବାକୁ ନୂଆ ରାସ୍ତା, ପୋଲ, ଫ୍ଲାଇ ଓଭର ବ୍ରିଜ୍ ଓ ରୋଡ୍ ଓଭରବ୍ରିଜ୍ ନିର୍ମାଣ କରାଯିବ । ଏହା ସହିତ ଏକାମ୍ର କ୍ଷେତ୍ରର ଐତିହ୍ୟ ସମୂହର ବିକାଶ ପାଇଁ ଚଳିତ ଆର୍ଥିକ ବର୍ଷରେ ୫୦ କୋଟି ଟଙ୍କାର ବ୍ୟୟବରାଦ କରାଯାଇଛି ବୋଲି ପୂର୍ତ୍ତ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ସୂଚନା ଦେଇଛନ୍ତି ।
ମନ୍ତ୍ରୀ ଶ୍ରୀ ହରିଚନ୍ଦନ କହିଛନ୍ତି, ରାଜଧାନୀର ରାଜରାସ୍ତାରେ ଯିବା ଆସିବା ପାଇଁ ଆଉ ଘଣ୍ଟା ଘଣ୍ଟା ଧରି ଅପେକ୍ଷା କରିବାକୁ ପଡ଼ିବ ନାହିଁ । ସହର ମୁଖ୍ୟ ରାସ୍ତାକୁ ଭିଡ଼ ହ୍ରାସ ଯୋଜନା (ଡିକଞ୍ଜେସନ୍ ପ୍ଲାନ୍) ପ୍ରସ୍ତାବ ପ୍ରସ୍ତୁତ କରାଯାଇଛି । ସଡ଼କ ନେଟୱାର୍କକୁ ବ୍ୟାପକ କରିବା ପାଇଁ ରାଜଧାନୀ ରାସ୍ତାର ଉନ୍ନତୀକରଣ କାର୍ଯ୍ୟକ୍ରମ ଆରମ୍ଭ କରାଯାଇଛି । ଏ ବାବଦରେ ଚଳିତ ଆର୍ଥିକ ବର୍ଷ(୨୦୨୫-୨୬)ରେ ୨୦୦ କୋଟି ଟଙ୍କା ବ୍ୟୟବରାଦ କରାଯାଇଛି । ଏହି ଯୋଜନାରେ ୨୦ କିଲୋମିଟର ରାସ୍ତାର ଉନ୍ନତୀକରଣ ପାଇଁ ପ୍ରସ୍ତାବ ଅଛି ।
ଜୟଦେବ ବିହାରରୁ ନନ୍ଦନକାନନ ପର୍ଯ୍ୟନ୍ତ ଏଲିଭେଟେଡ୍ କରିଡର୍ ନିର୍ମାଣ କରାଯିବ । ଏହା ସହିତ ବାରଙ୍ଗରୁ ପଟିଆ ଷ୍ଟେସନ୍ ଛକ ତଥା ଜାତୀୟ ରାଜପଥ-୧୬ ଓ ସୁଆଙ୍ଗ ମୌଜା ଦେଇ ଜଟଣୀକୁ ସଂଯୋଗ କରୁଥିବା କେନାଲ ବନ୍ଧ ରାସ୍ତା(ଦୟା ୱେଷ୍ଟ କେନାଲ୍) ର ଉନ୍ନତୀକରଣ କରାଯିବ । କଳ୍ପନା ଛକ ଓ ମ୍ୟୁଜିୟମ ଛକରେ ଫ୍ଲାଇ ଓଭର୍ ନିର୍ମାଣ ହେବ । ଶିଶୁ ଭବନ ଛକରୁ ମ୍ୟୁଜିୟମ ରାସ୍ତାରେ ରୋଡ୍ ଓଭରବ୍ରିଜ୍(ଆରଓବି) ନିର୍ମାଣ ହେବ । ଏଜି ଛକରେ ଭୂତଳ ରାସ୍ତା ନିର୍ମାଣ ହେବ । କଳାରାହାଙ୍ଗରୁ ବରିମୁଣ୍ଡ ଓ ଗୁରୁ କେଳୁଚରଣ ପାର୍କରୁ ଫୁଲନଖରା ପର୍ଯ୍ୟନ୍ତ ଗୋଟିଏ ନୂଆ ରାସ୍ତା ହେବ । ଏହି ରାସ୍ତାରେ ଏକ ନୂଆ ରେଳ ଓଭରବ୍ରିଜ୍ ନିର୍ମାଣ କରାଯିବ । ଭୁବନେଶ୍ୱର ଭିତରେ ଓ ବାହାରେ ରିଂ ରୋଡ୍ ନିର୍ମାଣ ହେବ।
